Pearl (NSS) - ဖေဖော်ဝါရီ ၂၄

မလေးရှားနိုင်ငံသို့ သယ်ဆောင်မည့် ငွေကျပ် (၄၅) ဘီလျံကျော် တန်ဖိုးရှိ မူးယစ်ဆေးဝါးများနှင့်အတူ မူးယစ် မှောင်ခိုဂိုဏ်းအဖွဲ့အား ဖမ်းဆီးရမိခဲ့ကြောင်း မြန်မာနိုင်ငံမူးယစ်ဆေးဝါးတားဆီးနှိမ်နင်းရေး ရဲတပ်ဖွဲ့ထံမှ သတင်း ရရှိသည်။ 

တပ်မတော်(ရေ)က ပြီးခဲ့သည့်ဇန်နဝါရီလ ၂၂ ရက်၊ ညနေပိုင်းတွင် ဧရာဝတီတိုင်း၊ ဟိုင်းကြီးကျွန်းမြို့အနီး ပင်လယ်ပြင်၌ “အေးမြတ်အောင်” စက်လှေကို စစ်ဆေးခဲ့ရာ မူးယစ်ဆေးဝါးများလွှဲပြောင်းလက်ခံသယ်ဆောင်ရန် စောင့်ဆိုင်းနေသည့် ဇော်မင်းဦး၊ ကိုကိုဇော်၊ လွှမ်းအောင်၊ သူရစိုး နှင့် ထွန်းဦး တို့အားတွေ့ရှိ၍ စစ်ဆေးဖော်ထုတ် ခဲ့ရာ ဇန်နဝါရီလ ၂၆ ရက်တွင် ပုသိမ်မြို့၌ စက်လှေပိုင်ရှင် တင်ရှိန်၊ စိုးရန်နိုင် နှင့် ဇန်နဝါရီလ ၂၈ ရက်တွင် ကျောင်းကုန်းမြို့နယ်၌ ဌေးအောင်အား ဖမ်းဆီးရမိခဲ့ကြောင်း သိရသည်။

၎င်းတို့၏ ဖော်ထုတ်ချက်အရ ဖေဖော်ဝါရီလ ၁၂ ရက်တွင် ပုသိမ်မြို့နယ်၊ ကုလားချောင်းကျေးရွာ၌ နိုင်ဦးအား ဖမ်းဆီးရမိခဲ့ပြီး ယင်းနေ့ ည ၇ နာရီခွဲတွင် ပုသိမ်မြို့နယ်၊ သမ္ဗန်ချိုင်ကျေးရွာရှိ တင်ထွန်း၏ ဂိုဒေါင်မှ အိုက်စ် (မက်သ်အဖက်တမင်း) ၁ ဒသမ ၅ တန် ကို သိမ်းဆည်းရမိခဲ့ကြောင်း သိရသည်။ 

ဆက်လက်ဖော်ထုတ်ချက်အရ ဖေဖော်ဝါရီလ ၁၃ ရက်တွင် ပုသိမ်မြို့နယ်၊ မကျီးဇင်ကျေးရွာ၌ ထွန်းလင်းနိုင် ၊ ဇော်ထွေးလွင်၊ ရဲလွင်ကို၊ ကျော်ဇင်ထက် နှင့် ကျော်မင်း တို့အား ကမ်းရိုးတန်းသွား စက်လှေတစ်စီးနှင့်အတူ ဆက်လက်ဖမ်းဆီးရမိခဲ့ကြောင်း ရဲတပ်ဖွဲ့မှ ထုတ်ပြန်ထားသည်။

အလားတူ ဖေဖော်ဝါရီလ ၁၄ ရက်တွင် တနင်္သာရီတိုင်း ၊ မြိတ်မြို့ ရှိ တင်ရှိန်၏နေအိမ်မှ ပစ္စတိုသေနတ် ၁ လက်၊ ကျည်အိမ် ၁ ခု၊ ကျည် ၄၅ တောင့်၊ ၁၂ ဗို့ ပြောင်းချောကျည် ၂၃ တောင့်၊ ငွေကျပ်သိန်း ၃၀၊ မော်တော်ယာဉ် ၂ စီးနှင့် လည်းကောင်း၊ တနင်္သာရီမြို့၊ ချောင်းငယ်ရပ်ကွက်ရှိ ၎င်း၏ နေအိမ်မှ ပြောင်းချောသေနတ် ၁ လက်၊ ၁၂ ဗို့ကျည် ၂၃ တောင့်တို့ကို သိမ်းဆည်းရမိခဲ့ပြီး အိုက်စ်(မက်သ်အဖက်တမင်း)များအား မန္တလေးမှ ပုသိမ်သို့ Dump Truck မော်တော်ယာဉ်နှင့်သယ်ဆောင်ခဲ့သည့် ကျော်ရဲမြင့် နှင့် စိုးမောင်မောင်တို့ကိုလည်း ရေကြည်မြို့နယ်၊ ရေနံ့သာ ကျေးရွာတွင် ထပ်မံ ဖမ်းဆီးရမိ ခဲ့ကြောင်း သိရသည်။

ထို့ပြင် ဖေဖော်ဝါရီလ ၁၆ ရက်နေ့တွင် အိုက်စ်(မက်သ်အဖက်တမင်း)များကို တာဝန်ခံသယ်ဆောင်သူ ရဲခေါင်ထွန်း ငှားရမ်း ထားသည့် ပြည်ကြီးတံခွန်မြို့နယ်ရှိခြံဝင်းတစ်ခုအတွင်းမှ ထိန်းချုပ်ဓာတုပစ္စည်းများ ဖြစ်သည့် Methylamine ၁၆၄၀၀ လီတာ၊ Sulphuric Acid ၁၂၀၀ လီတာ၊ Hydrochloric Acid ၅၆၀ လီတာ၊ Benzyl Cyanide ၁၂၄၀၀ လီတာတို့ကို သိမ်းဆည်းရမိခဲ့သဖြင့် သိမ်းဆည်းရမိ အိုက်စ်(မက်သ်အဖက်တမင်း)များနှင့် ဓာတုပစ္စည်း စုစုပေါင်း ဒေသကာလတန်ဖိုးငွေကျပ် ၄၅ ဒသမ ၂၈ ဘီလျံကျော်နှင့် ပင်လယ်ပြင်သွားစက်လှေ ၁ စီး၊ ကမ်းရိုးတန်းသုံး စက်လှေ ၁ စီး၊ မော်တော်ယာဉ် ၃ စီးတို့အား သိမ်းဆည်းရမိခဲ့ခြင်းဖြစ်ကြောင်း သိရသည်။ 

စစ်ဆေးဖော်ထုတ်ချက်များအရ သိမ်းဆည်းရမိ အိုက်စ်(မက်သ်အဖက်တမင်း)များအား ရှမ်းပြည်နယ်မှ မန္တလေးသို့ သယ်ဆောင်၍ မန္တလေးတွင် သိုလှောင်ကာ ဧရာဝတီတိုင်း၊ ပုသိမ်သို့ သယ်ဆောင်ပြီး ၎င်းမှတစ်ဆင့် မလေးရှား နိုင်ငံရေပိုက်နက်သို့  သယ်ဆောင်ခြင်းဖြစ်ကြောင်း သိရှိရသဖြင့် ၎င်းမူးယစ်မှောင်ခိုဂိုဏ်းအဖွဲ့အား ဥပဒေအရ အရေးယူထားရှိပြီး ကွင်းဆက်ပြစ်မှုကျူးလွန်သူများအား ဆက်လက်ဖော်ထုတ်လျက်ရှိကြောင်း ရဲတပ်ဖွဲ့မှ ထုတ်ပြန်ထားသည်။