နျူကလီးယားပစ္စည်းများ သယ်ယူပို့ဆောင်ရန် ပူးပေါင်းကြံစည်မှုဖြင့် ဂျပန်မာဖီးယားဂိုဏ်းအဖွဲ့ဝင်တစ်ဦးကို အမေရိကန်အစိုးရရှေ့နေများက စွဲချက်တင်
Pika (NSS) - ဖေဖော်ဝါရီ ၂၂
အမေရိကန်အစိုးရရှေ့နေများသည် ဂျပန်မာဖီးယားဂိုဏ်းအဖွဲ့ဝင်တစ်ဦးကို နျူကလီးယားပစ္စည်းများ သယ်ယူပို့ဆောင်ရန် ပူးပေါင်းကြံစည်မှုဖြင့် စွဲချက်တင်ခဲ့ကြောင်း သိရသည်။
အသက်(၆၀)နှစ်အရွယ် တာကာရှီအီဘီဆာဝါသည် နျူကလီးယားဗုံးတည်ဆောက်ရန်အတွက် အီရန်သို့ လွှဲပြောင်း ပေးမည်ဟု ယူဆရသည့် ယူရေနီယမ်နှင့် ပလူတိုနီယမ်တို့ကို ရောင်းချရန်ကြိုးပမ်းခဲ့သည်ဟု စွပ်စွဲခံခဲ့ရကြောင်း သိရသည်။
ထို့အပြင် တာကာရှီအီဘီဆာဝါနှင့် ထိုင်းပူးတွဲတရားခံတစ်ဦးတို့သည် ၂ဝ၂၂ ခုနှစ် ဧပြီလတွင် လက်နက်နှင့် မူးယစ်ဆေးစွဲချက်များဖြင့် စွဲချက်တင်ခံခဲ့ရကြောင်းလည်း သိရသည်။ တာကာရှီအီဘီဆာဝါသည် နောက်ဆုံး စွဲချက်များအရ ပြစ်မှုထင်ရှားခဲ့မည်ဆိုပါက ထောင်ဒဏ်တစ်သက်တစ်ကျွန်း ချမှတ်ခံရမည်ဖြစ်ကြောင်း သိရသည်။
လက်ရှိအချိန်တွင် ဘရွတ်ကလင်းအကျဉ်းထောင်မှာ ထိန်းသိမ်းခံထားရသော တာကာရှီအီဘီဆာဝါသည် သီရိလင်္ကာ၊ မြန်မာ၊ ထိုင်း နှင့် အမေရိကန်တို့တွင် စစ်ဆင်ရေးများလုပ်ဆောင်နေသည့် ယာကူဇာဟု လူသိများသော ဂျပန်ရာဇဝတ်ဂိုဏ်း၏ အကြီးတန်းအရာရှိတစ်ဦးဖြစ်ကြောင်း အမေရိကန်အာဏာပိုင်များက ပြောကြားခဲ့သည်။ တာကာရှီအီဘီဆာဝါ နှင့် ၎င်း၏ကြံရာပါများသည် ထိုင်းနိုင်ငံရှိ နျူကလီးယားပစ္စည်းနမူနာများကို US Drug Enforcement Agency (DEA)မှ လျှို့ဝှက်အေးဂျင့်အား ပြသခဲ့ခြင်းဖြစ်ကြောင်း အမေရိကန်တရားရေးဌာန က ပြောကြားခဲ့သည်။
အဆိုပါအေးဂျင့်သည် အီရန်ဗိုလ်ချုပ်ကြီးတစ်ဦးနှင့်အချိတ်အဆက်များရှိသည့် မူးယစ်ဆေးဝါးနှင့် လက်နက် မှောင်ခိုရောင်းဝယ်သူအဖြစ် ဟန်ဆောင်ထားခြင်းဖြစ်ကြောင်းလည်း သိရသည်။ မြန်မာနိုင်ငံမှလာသော နျူကလီးယားပစ္စည်းနမူနာများကို ထိုင်းအာဏာပိုင်များက သိမ်းဆည်းရမိခဲ့ခြင်းဖြစ်ပြီး အမေရိကန် စုံစမ်း စစ်ဆေးရေးမှူးများထံ လွှဲပြောင်းပေးခဲ့ခြင်းဖြစ်ကြောင်း သိရသည်။
အဆိုပါပစ္စည်းများတွင် ယူရေနီယမ်နှင့် ပလူတိုနီယမ်တို့ပါဝင်ကြောင်း အမေရိကန်ဓါတ်ခွဲခန်းတစ်ခုက အတည်ပြုခဲ့ သည်။ ထို့အပြင် တာကာရှိအီဘီဆာဝါသည် မြန်မာနိုင်ငံမှ အမည်မဖော်ပြထားသော လက်နက်ကိုင်အဖွဲ့တစ်ဖွဲ့ ကိုယ်စား စစ်ဘက်အဆင့် လက်နက်အမြောက်အမြားကို ရယူရန်ကြိုးပမ်းခဲ့ကြောင်း အမေရိကန်အစိုးရရှေ့နေ များက ထပ်မံစွပ်စွဲခဲ့သည်။
ယင်းစစ်လက်နက်ပစ္စည်းများတွင် မြေပြင်မှ ဝေဟင်ပစ်ဒုံးကျည်များ၊ သေနတ်များ၊ စနိုက်ပါရိုင်ဖယ်များ၊ စက်သေနတ်များ၊ အရွယ်အစားအမျိုးမျိုးရှိသော ဒုံးပျံများနှင့် မဟာဗျူဟာမြောက်ပစ္စည်း ကိရိယာများ ပါဝင်ကြောင်း သိရသည်။
အမေရိကန်လက်ထောက်ရှေ့နေချုပ် မက်သရူးဂျီအိုလ်ဒန်က"ဒီလိုကြိုးပမ်းအားထုတ်မှုတွေ အောင်မြင်သွားခဲ့မယ် ဆိုရင် ဖြစ်လာမယ့်နောက်ဆက်တွဲအကျိုးဆက်တွေကို တွေးကြည့်ရတာက တကယ်ကိုထိတ်လန့်ဖို့ ကောင်းပါတယ်။ အမေရိကန်တရားရေးဌာနဟာ အမေရိကန်ရဲ့လုံခြုံရေးနဲ့ နိုင်ငံတကာလုံခြုံရေးကို ခြိမ်းခြောက် နိုင်တဲ့ ဒီလိုပစ္စည်းတွေ မှောင်ခိုလုပ်နေတဲ့လူတွေကို သေချာကိုင်တွယ်သင့်ပါတယ်" ဟု ပြောခဲ့သည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ထိုင်းသြဇာကြီး ဝန်ကြီးချုပ်ဟောင်းက ကမ္ဘောဒီးယား၏ မဟာမိတ်ဟောင်းဟွန်ဆန်ထံ သွားရောက်လည်ပတ်
RELATED POSTS
18 Sep 2024 | မှုခင်း,ပြည်တွင်း
17 Sep 2024 | မှုခင်း,နိုင်ငံတကာ