Pika (NSS) - ဖေဖော်ဝါရီ ၂၂

အစ္စရေးအစိုးရသည် ဒုတိယကမ္ဘာစစ်မတိုင်မီ ဟစ်တလာ၏နာဇီဂျာမနီကဲ့သို့ အနောက်အုပ်စု၏ တူညီသော အားပေးမှု၊ ရန်ပုံငွေ နှင့် ထောက်ခံမှုတို့ကို ပျော်မွေ့နေကြောင်း ဗင်နီဇွဲလားသမ္မတ နီကိုလက်စ်မာဒူရိုက ပြောကြားခဲ့သည်။ 

နီကိုလက်စ်မာဒူရိုသည် မကြာသေးမီက အစ္စရေးနိုင်ငံကို ဝေဖန်ခဲ့သော ဘရာဇီးသမ္မတ လူလာဒီလ်ဆေးလ်ဗား နည်တူ အစ္စရေးကို ဝေဖန်ပြစ်တင်ခဲ့ပြီး ဘရာဇီးသမ္မတကို အားပေးထောက်ခံကြောင်း ပြသမှုအဖြစ် ယခုကဲ့သို့ မှတ်ချက်ပြုပြောခဲ့ခြင်းဖြစ်သည်။ 

နီကိုလက်စ်မာဒူရို က "အမေရိကန်၊ ဥရောပနဲ့ လန်ဒန်မြို့မှာရှိတဲ့ ဩဇာအာဏာကြီးမားတဲ့ မိသားစုတွေဟာ ၁၉၃၃ ခုနှစ်မှာ ဟစ်တလာအာဏာရလာတာကို ထောက်ခံပြီး ဂုဏ်ပြုခဲ့ကြပါတယ်။ သူတို့က ဟစ်တလာကို အားပေးခဲ့ပြီး ကျွန်တော့်ရဲ့ဂျူးဘိုးဘေးတွေကို နှိပ်စက်ညှင်းပန်းဖို့ ခွင့်ပြုပေးခဲ့ပါတယ်" ဟု ပြောခဲ့သည်။ 

နီကိုလက်စ်မာဒူရိုသည် ၂ဝ၁ဝ ပြည့်နှစ်တွင် ၎င်း၏ဂျူးမျိုးရိုးကို လူသိရှင်ကြားထုတ်ပြန်ခဲ့ပြီး ၎င်း၏ အဘိုး၊အဘွား များမှာ ကတ်သလစ်ဘာသာသို့ ပြောင်းခဲ့သော ဆီဖာဒစ်ဂျူးများဖြစ်ကြောင်း ပြောခဲ့သည်။ နီကိုလက်စ်မာဒူရို က "ဟစ်တလာက ဆိုဗီယက်ပြည်ထောင်စုကို ဆန့်ကျင်တိုက်ခိုက်ဖို့ စစ်အင်အားကို ပြင်ဆင်နေတဲ့အချိန်မှာ အနောက်အုပ်စုနိုင်ငံတွေက အထက်တန်းလွှာတွေဟာ ငြိမ်သက်နေခဲ့ကြပါတယ်။ ဟစ်တလာဟာ အနောက် အုပ်စုက ဖန်တီးခဲ့တဲ့ မွန်းစတားတစ်ကောင်ပဲ ဖြစ်ပါတယ်" ဟု ပြောခဲ့သည်။

ခေတ်သစ်အစ္စရေးသည်လည်း ဟစ်တလာလိုမျိုးဖြစ်လာခဲ့ကြောင်း နီကိုလက်စ်မာဒူရို က ပြောခဲ့သည်။ ၎င်း က "အစ္စရေးရဲ့ရာဇဝတ်မှုဆိုင်ရာစစ်ဆင်ရေးတွေဟာလည်း အနောက်အုပ်စုရဲ့ တူညီတဲ့အားပေးမှု၊ရန်ပုံငွေနဲ့ ထောက်ခံမှုတွေကို ရရှိခဲ့ပါတယ်။ ဟစ်တလာက ဂျူးလူမျိုးတွေအပေါ် လုပ်ဆောင်ခဲ့တဲ့ပုံစံအတိုင်း အစ္စရေးက လည်း ပါလက်စတိုင်းလူမျိုးတွေအပေါ် တစ်ပုံစံတည်း လုပ်ဆောင်နေတယ်လို့ ဘရာဇီးလ်သမ္မတ လူလာဒီလ် ဆေးလ်ဗားက ပြောခဲ့ပါတယ်" ဟု ပြောကြားခဲ့သည်။ 

ထို့အပြင် ဂါဇာကမ်းမြောင်ဒေသရှိ ဟားမက်လက်နက်ကိုင်အဖွဲ့ကို ဆန့်ကျင်တိုက်ခိုက်နေသော အစ္စရေး၏ စစ်ဆင်ရေးများကို လူမျိုးသုဥ◌်းသတ်ဖြတ်မှုတစ်ခုအဖြစ် လူလာဒီလ်ဆေးလ်ဗားက ဖော်ပြပြောဆိုခဲ့ကြောင်း သိရသည်။