Pika (NSS) - ဖေဖော်ဝါရီ ၁၂ 

နိုင်ဂျီးရီးယားနိုင်ငံ၏ အကြီးဆုံးဘဏ်ကို ပူးတွဲတည်ထောင်သူ အပါအဝင် လူခြောက်ဦးကို တင်ဆောင်လာသည့် ရဟတ်ယာဉ်တစ်စင်းသည် အမေရိကန်နိုင်ငံ ကယ်လီဖိုနီးယားပြည်နယ် တောင်ပိုင်း သဲကန္တာရရှိ Mojave National Preserve နေရာအနီးတွင် ပျက်ကျခဲ့ခြင်းဖြစ်ကြောင်း အာဏာပိုင်များက ပြောကြားခဲ့သည်။

ရဟတ်ယာဉ်ပျက်ကျမှုအတွင်း သေဆုံးသူများထဲတွင် Access Bank ၏ ပူးတွဲတည်ထောင်သူ အသက်(၅၇)နှစ်အရွယ် ဟားဗတ်ဝစ်ဝီပါဝင်ကြောင်း နိုင်ဂျီးရီးယားနိုင်ငံ Isiokpo မြို့ရှိ ၎င်း၏ မိသားစုဝင်များက ပြောကြားခဲ့သည်။

၂ဝ၁၇ ခုနှစ်မှ ၂ဝ၂၁ ခုနှစ်အထိ နိုင်ဂျီးရီးယား စတော့အိတ်ချိန်း၏ အမျိုးသားကောင်စီဥက္ကဋ္ဌအဖြစ် တာဝန် ထမ်းဆောင်ခဲ့ဖူးသလို ၂ဝ၂၁ ခုနှစ်မှ ၂ဝ၂၂ ခုနှစ်အထိ Nigerian Exchange Group Plc ၏ အဖွဲ့ဥက္ကဋ္ဌအဖြစ် တာဝန်ထမ်းဆောင်ခဲ့ဖူးသည့် အသက်(၆၁)နှစ်အရွယ် Abimbola Ogunbanjo သည်လည်း သေဆုံးသူများထဲတွင် ပါဝင်ကြောင်း နိုင်ဂျီးရီးယားနိုင်ငံ  Lagos မြို့ရှိ ၎င်း၏ မိသားစုဝင်များက အတည်ပြုပြောကြားခဲ့သည်။

အဆိုပါ Eurocopter EC 130 ရဟတ်ယာဉ်သည် ဖေဖော်ဝါရီလ(၉)ရက် ည(၁ဝ)နာရီအချိန်တွင် ပျက်ကျခဲ့ခြင်းဖြစ် ကြောင်း Federal Aviation Administration (FAA) က ပြောကြားခဲ့သည်။ ရဟတ်ယာဉ်ပျက်ကျရသည့်အကြောင်း အရင်းများကို အမျိုးသားသယ်ယူပို့ဆောင်ရေးဘေးကင်းရေးဘုတ်အဖွဲ့နှင့်အတူ စုံစမ်းစစ်ဆေးမှုများ ဆက်လက် လုပ်ဆောင်သွားမည်ဖြစ်ကြောင်း (FAA) က ပြောကြားခဲ့သည်။

Eurocopter EC 130 ရဟတ်ယာဉ် ပျက်ကျသည့်နေရာသည် နီဗားဒါးပြည်နယ် နယ်စပ်နီးတွင် ဖြစ်ကြောင်းလည်း သိရသည်။ ယင်းရဟတ်ယာဉ်သည် နီဗားဒါးပြည်နယ် Boulde မြို့သို့ ဦးတည်သွားနေခြင်းဖြစ်ကြောင်း KABC သတင်းဌာနကဖော်ပြခဲ့သည်။ San Bernardino County Sheriff-Croner Department က "ရဟတ်ယာဉ်ပျက်ကျ တဲ့နေရာဟာ Halloran Springs လမ်းအနီး၊ 15-Freeway ရဲ့ အရှေ့ဘက်မှာလို့ ဆုံးဖြတ်ထားပါတယ်။  ရဟတ်ယာဉ်ပျက်ကျမှုအတွင်း အသက်ရှင်ကျန်ရစ်တဲ့သူရှိပုံ မပေါ်ပါဘူး" ဟုပြောခဲ့သည်။

Access Holdings ကုမ္ပဏီက "ရဟတ်ယာဉ်ပျက်ကျမှုအတွင်း ကုမ္ပဏီစီအီးအို ဟားဗတ်ဝစ်ဝီ၊ သူ့ရဲ့ဇနီးနဲ့ သားဖြစ်သူတို့လည်း ပါဝင်ပါတယ်" ဟု ပြောခဲ့သည်။