Pika (NSS) - ဖေဖော်ဝါရီ ၁၂ 

အမေရိကန်သမ္မတဂျိုးဘိုင်ဒန်၏ ကမ်းပိန်းသည် နိုင်ငံရေးအရ အငြင်းပွားမှုများရှိနေသော ဆိုရှယ်မီဒီယာအပ်ပ် တစ်ခုဖြစ်သည့် TikTok တွင် ပါဝင်လာပြီဖြစ်ကြောင်း သိရသည်။

ဂျိုးဘိုင်ဒန် ကမ်းပိန်းကလုပ်ဆောင်သော Biden-Harris HQ သည် ၎င်း၏ပထမဆုံး TikTok ပို့စ်ကို ဖေဖော်ဝါရီလ (၁၁)ရက် ညပိုင်းတွင် တင်ခဲ့ခြင်းဖြစ်ကြောင်း သိရသည်။ အဆိုပါပို့စ်တွင် ဂျိုးဘိုင်ဒန်သည် Super Bowl ဘောလုံး အားကစားနှင့်ပတ်သက်သည့်မေးခွန်းများကို ဖြေကြားပေးခဲ့ကြောင်းလည်း သိရသည်။ 

Super Bowl ဘောလုံးအားကစား အသင်းများဖြစ်သည့် Kansas City Chiefs (သို့မဟုတ်) the San Francisco 49ers အသင်းတို့ကို အားပေးနေသလားဆိုသည့်မေးခွန်းများကို ဂျိုးဘိုင်ဒန်က ဖြေကြားခဲ့ခြင်းဖြစ်ကြောင်း သိရသည်။ 

ဂျိုးဘိုင်ဒန် က "ကျွန်တော်ကတော့ Philadelphia Eagles အသင်းကိုပဲ အားပေးပါတယ်။ ဘာကြောင့်လဲဆိုတော့ ကျွန်တော့်ရဲ့ဇနီးဖြစ်သူက Philadelphia က မို့လို့ပါပဲ။ နို့မို့ဆို ကျွန်တော်တစ်ယောက်တည်း အိပ်နေရပါလိမ့်မယ်" ဟု ဖြေကြားခဲ့သည်။ တရုတ်နိုင်ငံ၏ TikTok အပ်ပ်နှင့်ပတ်သက်ပြီး အငြင်းပွားမှုများရှိနေသည့်အချိန်တွင် ဂျိုးဘိုင်ဒန်ကမ်းပိန်းက အဆိုပါဆိုရှယ်မီဒီယာပလက်ဖောင်းတွင် ပါဝင်ရန် ဆုံးဖြတ်ချက်ထွက်ပေါ်လာခြင်းဖြစ် ကြောင်း သိရသည်။ 

လုံခြုံရေးစိုးရိမ်မှုများနှင့်ပတ်သက်ပြီး TikTok အပ်ပ် အသုံးပြုမှုအား တားမြစ်ပိတ်ပင်ရန် နှစ်ဖက်ပါတီများရှိ လွှတ်တော်ခေါင်းဆောင်များက တောင်းဆိုခဲ့ကြကြောင်း သိရသည်။ ပြီးခဲ့သည့်နှစ်တွင် အမေရိကန်အစိုးရသည် အစိုးရပိုင်စက်ပစ္စည်းများအားလုံးတွင် TikTok အပ်ပ်ကို ဖယ်ရှားရန် ဖက်ဒရယ်အေဂျင်စီများကို ရက်ပေါင်း(၃ဝ) အချိန်ပေးခဲ့ကြောင်း သိရသည်။

ထို့အပြင် အမေရိကန်၏ ပြည်နယ်အများစုသည် အစိုးရပိုင်စက်ပစ္စည်းများတွင် TikTok အပ်ပ် အသုံးပြုမှုကို တားမြစ်ပိတ်ပင်ခဲ့ကြောင်းလည်း သိရသည်။ သို့သော်လည်း TikTok သည် အသက်(၃ဝ)နှစ်အောက် အမေရိကန်နိုင်ငံသားများကြားတွင် အလွန်ရေပန်းစားနေသည့် အပ်ပ်တစ်ခုဖြစ်ကြောင်းလည်း သိရသည်။ အမေရိကန်နိုင်ငံရှိ ဆယ်ကျော်သက်များ၏(၆၃)ရာခိုင်နှုန်းသည် TikTok ကို အသုံးပြုနေကြောင်း Pew သုတေသန စင်တာက ပြောကြားခဲ့သည်။ ဂျိုးဘိုင်ဒန်သည် လူငယ်မဲဆန္ဒရှင်များထံမှ ထောက်ခံမှုများရရှိရန် ရုန်းကန်နေရသည့် အချိန်တွင် TikTokမှာ ဂျိုးဘိုင်ဒန်ကမ်းပိန်းထွက်ပေါ်လာခြင်းဖြစ်သည်။