Pearl (NSS) - ဖေဖော်ဝါရီ ၆

စစ်ကိုင်းတိုင်းရှိ No-More Dictatorship-NMD အဖွဲ့ထံသို့ ပို့ဆောင်မည့် လက်နက်ခဲယမ်းများနှင့်အတူ ထောက်ပို့ (၃) ဦးအား မန္တလေး၌ ဖမ်းဆီးရမိခဲ့ကြောင်း နစကမှ သတင်းထုတ်ပြန်ထားသည်။ 

ပြီးခဲ့သည့် ဖေဖော်ဝါရီလ (၄)  ရက်၊  ညနေပိုင်းတွင် မန္တလေးတိုင်း၊ အောင်မြေသာစံမြို့နယ်၊ မင်းတဲအီကင်းရပ်ကွက် ၌ မသီတာစိုး (ခ) မစိုးနှင့် တိုးညွန့်တို့အား ကားဂီယာဘောက်အဟောင်းအတွင်း သိုဝှက်သိမ်းဆည်းထားသည့် SIG SAUER ပစ္စတို ၅ လက်၊ ANSAR ပစ္စတို ၁ လက်၊ BLOW ပစ္စတို ၂ လက်၊ ကျည်အိမ်မျိုးစုံ ၁၆ ခု၊ လက်ပစ်ဗုံး ၁ လုံး၊ ၉ မမ ကျည် ၁ဝဝ တောင့်၊ ပွိုင့်-၃၈၀ ကျည် ၂ဝဝ တောင့်တို့နှင့်အတူ ဖမ်းဆီးရမိခဲ့ကြောင်း သိရသည်။ 

ဖမ်းဆီးရမိသော မသီတာစိုး၏ ထွက်ဆိုချက်အရ အောင်မြေသာစံမြို့နယ်၊ ပြည်ကြီးရန်လုံရပ်ကွက်၌ ကေခိုင် (ခ) ကေကေအား ထပ်မံဖမ်းဆီးရမိခဲ့သဖြင့် ဖြစ်စဉ်အတွင်း အမျိုးသား ၁ ဦး၊ အမျိုးသမီး ၂ ဦးနှင့်အတူ ပစ္စတိုမျိုးစုံ ၈ လက်၊ ကျည်အိမ်မျိုးစုံ ၁၆ ခု၊ လက်ပစ်ဗုံး ၁ လုံး၊ ကျည်မျိုးစုံ ၃ဝဝ တောင့်တို့အား ဖမ်းဆီးရမိခဲ့ကြောင်း သိရသည်။ 

အလားတူ ဖမ်းဆီးရမိသော မသီတာစိုး ၏ ထွက်ဆိုချက်အရ ၎င်းသည် NLD ပါတီဝင်တစ်ဦးဖြစ်ပြီး မန္တလေးမြို့ အတွင်း ဆန္ဒပြမှုများ၌ ဦးဆောင်ပါဝင်ခဲ့သူဖြစ်ကြောင်း၊  ၂၀၂၂ ခုနှစ်၊ ဧပြီလတွင် လိုင်ဇာသို့ သွားရောက်၍ KIA အဖွဲ့ထံ၌ သင်တန်းတစ်လ တက်ရောက်ခဲ့ကြောင်း သိရသည်။

ထိုသို့ သင်တန်းတက်ရောက်စဉ် No-More Dictatorship-NMD အဖွဲ့မှ ဖမ်းဆီးရန်ကျန် မျိုးမင်းရန်နိုင်နှင့် ရင်းနှီးခဲ့ ပြီး အဆိုပါအဖွဲ့သို့ဝင်ရောက်ခဲ့ကြောင်း နှင့် သင်တန်းဆင်းပြီးနောက် အောင်မြေသာစံမြို့နယ်ရှိ နေအိမ်သို့ ပြန်လည်နေထိုင်ခဲ့ပြီး ၎င်း၏ သူငယ်ချင်းဖြစ်သူ ကေခိုင်၊ တိုးညွန့်တို့နှင့်အတူ NMD အဖွဲ့အတွက် ထောက်ပို့ လုပ်ငန်းများ ဆောင်ရွက်ခဲ့ကြောင်း ဖော်ထုတ် သိရသည်ဟု နစက မှ ဆိုသည်။ 

အလားတူ ဖမ်းဆီးရမိသူများ၏ ထွက်ဆိုချက်များအရ ကရင်ပြည်နယ်၊ ကြာအင်းဆိပ်ကြီးမြို့‌နေ ဖမ်းဆီးရန်ကျန်သူ တစ်ဦးမှ အဆိုပါလက်နက်/ခဲယမ်းများအား ကားဂီယာဘောက်အဟောင်းများအတွင်း သိုဝှက်ထည့်သွင်း၍ ခရီးသည်တင်ယာဉ်များဖြင့် ပို့ဆောင်ပေးခဲ့ခြင်းဖြစ်ပြီး မန္တလေးသို့ရောက်ရှိစဉ် ၎င်းတို့မှ ကားဂိတ်တွင် သွားရောက် ယူဆောင်ကာ စစ်ကိုင်းမြို့နယ်၊ ၁၄ မိုင် ကျေးရွာအနီးရှိ NMD အဖွဲ့မှ ဖမ်းဆီးရန်ကျန် မျိုးမင်းရန်နိုင်ထံသို့ ပို့ဆောင် ပေးရမည်ဖြစ်ကြောင်း သိရသည်။ 

ထို့ပြင် ၂၀၂၃ ခုနှစ် နိုဝင်ဘာလမှ ၂၀၂၄ ခုနှစ် ဇန်နဝါရီလအထိ လက်နက်/ ခဲယမ်းများအား ၄ ကြိမ် ပို့ဆောင်ပေးခဲ့ ကြောင်း ဖော်ထုတ်သိရှိရပြီး လက်ရှိတွင် ဖမ်းဆီးရမိသူများအား ဥပဒေအရထိရောက်စွာ အရေးယူနိုင်ရေး ဆက်လက်ဆောင်ရွက်သွားမည်ဖြစ်ကြောင်း နစကမှ သတင်းထုတ်ပြန်ထားသည်။