သန့်ဇင် (NSS) - ဇန်နဝါရီ ၂၅

တိရစ္ဆာန်မျိုးစိတ်အသစ်များထပ်မံဖြည့်တင်းပြသရန်စီစဉ်နေသည့် ရန်ကုန် တိုင်း၊ ဗဟန်းမြို့နယ်ရှိ ရန်ကုန်တိရစ္ဆာန်ဥယျာဉ်၏ (၁၁၈)နှစ် ပြည့် နှစ်ပတ် လည်ပွဲတော်အခမ်းအနားကို ယနေ့(ဇန်နဝါရီလ ၂၅ ရက်)မှစတင်ကာ စည်ကားသိုက်မြိုက်စွာကျင်းပလျက်ရှိသည်။

ရန်ကုန်တိရစ္ဆာန်ဥယျာဉ်၏ (၁၁၈)နှစ်ပြည့် နှစ်ပတ်လည်ပွဲတော်အခမ်း အနားကို ယနေ့(ဇန်နဝါရီလ ၂၅ ရက်)မှစတင်ကာ ဇန်နဝါရီလ ၂၈ ရက်အထိ (၄)ရက်တိုင်တိုင် ကျင်းပပြုလုပ်သွားမည်ဖြစ်ကြောင်း သိရသည်။

လက်ရှိ ရန်ကုန်တိရစ္ဆာဥယျာဉ်၌ ထိန်သိမ်းပြသထားသည့် တိရစ္ဆာန်မျိုးစိတ်ပေါင်း(၁၃၅)ခုမှ တိရစ္ဆာန်အကောင်ရေပေါင်း (၁၀၆၅)ကောင်ရှိပြီး ပြည်ပနိုင်ငံများနှင့်ဆက်သွယ်ကာ မျိုးစိတ်အသစ်များကို ထပ်မံဖြည့်တင်းပြသရန် စီစဉ်ဆောင်ရွက်နေခြင်းဖြစ်ကြောင်း သိရသည်။

“လက်ရှိကာလမှာတော့ Animal exchange ပေါ့နော်။ ပြည်ပနိုင်ငံတွေနဲ့ ဆက်သွယ်ပြီးဆောင်ရွက်ရတာပေါ့။ နိုင်ငံခြားမျိုးစိတ်တွေကျတော့ ပြည်ပနဲ့ချိတ်ဆက်ပြီးတော့မှ ဆောင်ရွက်သွားဖို့တော့ရှိပါတယ်”ဟု ရန်ကုန်တိရစ္ဆာန် ဥယျာဉ်မှအုပ်ချုပ်ရေးမှူး ဦးသန်းမြင့်ထွန်းက NSS ကို ပြောသည်။

လက်ရှိကျင်းပပြုလုပ်လျက်ရှိသည့် ရန်ကုန်တိရစ္ဆာန်ဥယျာဉ်(၁၁၈) နှစ်ပြည့်နှစ်ပတ်လည်ပွဲတော်တွင် လူသုံးကုန်ပစ္စည်များ နှင့် အစားအသောက်ရောင်းချပေးသည့် ဆိုင်ခန်းများစွာလည်း ပါဝင်ခင်းကျင်းပြသရောင်းချနေကာ တေးဂီတဖျော်ဖြေပွဲ၊ မျက်လှည့်ပွဲ၊ တိရိစ္ဆာန်များ နှင့် ဓာတ်ပုံရိုက်ကူးခွင့်များ၊ အကဖျော်ဖြေမှုများ နှင့် Game ပြိုင်ပွဲများလည်းပါဝင်ကြောင်း သိရသည်။

“လက်ရှိအခြေအနေကတော့ တနင်္လာနေ့ကနေစပြီး သောကြာနေ့ထိဆိုရင် လူ(၁၀၀၀)ကျော်ရှိပါတယ်။ စနေ၊ တနင်္ဂနွေလို ရုံးပိတ်ရက်တွေနဲ့ဆိုရင်တော့ တစ်ပတ်ကို လူ(၃၀၀၀)ကနေ (၅၀၀၀)ထိလာရောက်လည်ပတ်သူတွေရှိပါတယ်”ဟု ၎င်းကဆက်လက်ပြောသည်။

ရန်ကုန်တိရစ္ဆာန်ဥယျာဉ်ကို ပြည်တွင်းလာရောက်လည်ပတ်သူများအပြင် နိုင်ငံခြားသားများလည်း စိတ်ပါဝင်စားစွာ လာရောက်လည်ပတ်မှုများလည်း ရှိကြောင်းလည်း သိရသည်။