ရှမ်းတောင်၌ တိုက်ပွဲဖြစ်ပွားခြင်း မရှိ၊ ကား(၆)စီးဖြင့် မှောင်ခိုသယ်လာသည့် လက်နက်ခဲယမ်းအများအပြား ဟိုပုံးမြို့နယ်၌ ပေါက်ကွဲပျက်စီးခဲ့
မြူနစ် (NSS) - ဇန်နဝါရီ ၂၁
ရှမ်းပြည်နယ်တောင်ပိုင်းဒေသ၌ တိုက်ပွဲဖြစ်ပွားခြင်း မရှိဘဲ ကား(၆)စီးဖြင့် မှောင်ခိုသယ်ဆောင်လာသည့် လက်နက်ခဲယမ်းအများအပြား ဟိုပုံးမြို့နယ်အတွင်း၌ ပေါက်ကွဲပျက်စီးခဲ့ကြောင်း ဒေသခံများထံမှ သိရသည်။
PNLO/PNLA ယူနီဖောင်းဝတ်ဆင်ထားသော လက်နက်ကိုင်များသည် ယနေ့(ဇန်နဝါရီလ ၂၁ ရက်)၊ နံနက် ၁၁ နာရီဝန်းကျင်အချိန်တွင် ဟိုပုံးမြို့နယ်၊ စံဖူးကျေးရွာရှိ လမ်းပေါ်၌ ၎င်းတို့ သယ်ဆောင်လာသည့် လက်နက်ခဲယမ်းများကို ဖောက်ခွဲဖျက်ဆီးခဲ့သည်ဟု ဆိုသည်။
"ကယားဘက်ကို သယ်ဖို့က PNLA ရဲ့ နယ်မြေထဲကို ဖြတ်သယ်ရတာကို။ အဲဒီလက်နက်တွေကို ဒေသခံ PNLA က ကြားထဲကနေ သယ်ပေးတဲ့သဘောရှိတယ်။ တပ်မတော်ကလည်း သတင်းရတော့ စစ်ဆေးတာပေါ့။ ညှိနှိုင်းသေး တယ်လို့လည်း ကြားတယ်။ ဒါပေမဲ့ ဒီနေ့ ၁၁ နာရီလောက်မှာ သူတို့ သယ်လာတဲ့လက်နက်တွေကို သူတို့မီးရှို့ဖျက် ဆီးပစ်လိုက်တယ်"ဟု ဟိုပုံးဒေသခံတစ်ဦးက NSS ကို ပြောသည်။
လက်နက်အကြီးအသေးအပါအဝင် ခဲယမ်းမျိုးစုံကို စုစုပေါင်းကား (၆)စီးဖြင့် ကယားပြည်နယ်ဘက်သို့ မှောင်ခိုသယ် ဆောင်ခြင်းဖြစ်နိုင်ကြောင်းလည်း ဒေသခံများက သုံးသပ်ထားသည်။
ယင်းကဲ့သို့ ကား(၆)စီးဖြင့် လက်နက်ခဲယမ်းမျိုးစုံကို PNLO/PNLA ယူနီဖောင်းဝတ်ဆင်ထားသော လက်နက်ကိုင်များက စံဖူးကျေးရွာရှိ လမ်းပေါ်တွင် ဖျက်ဆီးခဲ့သည့်အတွက် မီးလောင်ပေါက်ကွဲမှုများ ဖြစ်ပေါ်ခဲ့ကြောင်း သိရသည်။
ယင်းကဲ့သို့ မီးလောင်ပေါက်ကွဲမှုကြောင့် စံဖူးကျေးရွာရှိ ဒေသခံပြည်သူလူထုနေအိမ် (၂၆)လုံးထက်မနည်း မီးလောင် ဆုံးရှုံးသွားခဲ့ကြောင်း ဒေသခံများက ပြောသည်။
ထို့ပြင် လက်နက်ခဲယမ်းမျိုးစုံကို မှောင်ခိုသယ်ဆောင်လာသည့် ကား(၆)စီးအနက် ကား(၅)စီးသည် မီးလောင်ပျက်စီး သွားခဲ့ပြီး ကျန်ကားတစ်စီးသည် မောင်းနှင်ထွက်ပြေးသွားခဲ့သည်ဟုလည်း ဒေသခံများက ထပ်မံပြောသည်။
လက်ရှိတွင် ရှမ်းပြည်နယ်တောင်ပိုင်းအတွင်း၌ တိုက်ပွဲဖြစ်ပွားခြင်းမျိုး တစ်စုံတစ်ရာမရှိကြောင်းလည်း သိရသည်။
"တိုက်ပွဲ မဖြစ်ပါဘူး။ တစ်ချို့မီဒီယာတွေ ရေးနေတာရှိတယ်။ နစကနဲ့ PNLO တို့ တိုက်ပွဲပြင်းထန်တယ်ဆိုပြီး ရေးထားတာရှိတယ်။ ဒါပေမဲ့ အဲဒါတွေက မဟုတ်ဘူး။ သူတို့ရဲ့ လက်နက်ခဲယမ်းတွေ သယ်လာတဲ့ ကားပေါ်မှာက RPG တွေ၊ ဗုံးတွေ ပါတယ်။ အဲဒါတွေ ပါလာတဲ့အခါကြတော့ မီးရှို့လိုက်တော့ ပေါက်ကွဲသံတွေ ထွက်တာပေါ့။ တိုက်ပွဲဖြစ်သလိုမျိုး အသံတွေက ထွက်တာပေါ့ လက်နက်အကြီးရော၊ အသေးရော အသံက မျိုးစုံဖြစ်သွားတာပေါ့။ တိုက်ပွဲမဖြစ်ဘူး"ဟု ဟိုပုံးဒေသခံက ဆက်လက်ပြောသည်။
ပြီးခဲ့သော ၂၀၂၃ ခုနှစ်၊ နိုဝင်ဘာလ ၁၇ ရက်တွင်လည်း ကယားပြည်နယ်၊ လွိုင်ကော်မြို့၌ မြို့သိမ်းတိုက်ပွဲဖော်ဆောင်နေသော KNPP၊ PDF အဖွဲ့များထံ ပို့ဆောင်မည့် လက်နက်ခဲယမ်းအများအပြားကို ရှမ်းပြည်နယ်၊ ပင်လုံမြို့နယ်အတွင်း၌ ဖမ်းဆီးရမိခဲ့ဖူးသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
အီရတ်နိုင်ငံရှိ အီရန်လိုလားတဲ့လက်နက်ကိုင်အုပ်စုတွေကို လက်တုံ့ပြန်သွားမယ်လို့ အမေရိကန်အစိုးရပြော
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း