Pika (NSS) - ဇန်နဝါရီ ၂၁ 

အမေရိကန်စစ်တပ်သည် ဇန်နဝါရီလ(၂၀)ရက်တွင် ယီမင်အခြေစိုက်ဟူသီလက်နက်ကိုင်အဖွဲ့များ၏ ပစ်မှတ်များကို (၅)ကြိမ်မြောက် ပစ်ခတ်တိုက်ခိုက်မှုများ လုပ်ဆောင်ခဲ့ကြောင်း သိရသည်။

အဆိုပါ(၅)ကြိမ်မြောက်တိုက်ခိုက်မှုသည် အေဒင်ပင်လယ်ကွေ့ရှိသင်္ဘောများကို တိုက်ခိုက်ရန်အတွက် ပြင်ဆင်ထားသော ဟူသီလက်နက်ကိုင်အဖွဲ့၏သင်္ဘောဖျက်ဒုံးကျည်များကို ပစ်မှတ်ထားတိုက်ခိုက်ခဲ့ခြင်းဖြစ်ကြောင်း အမေရိကန်စစ်တပ်က ပြောကြားခဲ့သည်။ 

ဟူသီလက်နက်ကိုင်အဖွဲ့သည် ပင်လယ်နီအတွင်းရှိသင်္ဘောများကို တိုက်ခိုက်မှုများအား ဆက်လက်လုပ်ဆောင်နေ ခြင်းကြောင့် အမေရိကန်အစိုးရသည် အီရန်ကျောထောက်နောက်ခံပြုဟူသီလက်နက်ကိုင်အဖွဲ့၏ စွမ်းဆောင်ရည် များကို လျှော့ချနိုင်ရန် ကြိုးပမ်းလျက်ရှိကြောင်းလည်း သိရသည်။ ပင်လယ်နီအတွင်းရှိ ကုန်တင်သင်္ဘောများကို ပစ်မှတ်ထားတိုက်ခိုက်မှုများအား ဆက်လက်တိုးမြှင့်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ကတိပြုခဲ့သည်။

အမေရိကန်ဗဟိုကွပ်ကဲမှုဌာနချုပ်က "ဇန်နဝါရီလ(၂ဝ)ရက် နံနက်(၄)နာရီဝန်းကျင်မှာ အမေရိကန်တပ်ဖွဲ့တွေဟာ အေဒင်ပင်လယ်ကွေ့ကို ချိန်ရွယ်ထားပြီး ပစ်လွှတ်ဖို့ပြင်ဆင်ထားတဲ့ ဟူသီလက်နက်ကိုင်အဖွဲ့ရဲ့ သင်္ဘောဖျက် ဒုံးကျည်တွေကို လေကြောင်းကနေ တိုက်ခိုက်မှုတွေလုပ်ဆောင်ခဲ့ပါတယ်။ အဲဒီဒုံးကျည်တွေဟာ ဒေသအတွင်းမှာရှိ တဲ့ အမေရိကန်ရေတပ်သင်္ဘောတွေနဲ့ ကုန်တင်သင်္ဘောတွေကို ခြိမ်းခြောက်မှုတွေ လုပ်ဆောင်လာနိုင်တာမလို့ လေကြောင်းကနေ တိုက်ခိုက်ပြီး ဒုံးကျည်တွေကို ဖျက်ဆီးပစ်ခဲ့ပါတယ်။ ဒီလုပ်ရပ်ဟာ အမေရိကန်ရေတပ်သင်္ဘော တွေနဲ့ ကုန်တင်သင်္ဘောတွေအတွက် နိုင်ငံတကာရေပိုင်နက်တွေမှာ သွားလာမှုကို ပိုမိုလုံခြုံစေမှာဖြစ်ပါတယ်" ဟု ပြောဆိုခဲ့သည်။

အစ္စရေး-ဟားမက်စစ်ပွဲဖြစ်ပွားပြီးနောက် ယီမင်အခြေစိုက်ဟူသီလက်နက်ကိုင်အဖွဲ့သည် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် ပင်လယ်နီအတွင်းရှိ အစ္စရေးနှင့်ဆက်နွယ်သော သင်္ဘောများ ကို ပြီးခဲ့သည့်နှစ်နိုဝင်ဘာလတွင် စတင်တိုက်ခိုက်ခဲ့ခြင်းဖြစ်သည်။ ထို့အပြင် ပင်လယ်နီအတွင်းရှိ အမေရိကန်နှင့် ဗြိတိန်တို့၏ ကုန်တင်သင်္ဘောများကိုလည်း ပစ်မှတ်ထားတိုက်ခိုက်သွားမည်ဖြစ်ကြောင်း ဟူသီလက်နက်ကိုင်အဖွဲ့ က ထုတ်ပြန်ကြေညာခဲ့သည်။