Pika (NSS) - ဇန်နဝါရီ ၁၈ 

အမေရိကန်နှင့် ဗြိတိန်တို့၏တပ်ဖွဲ့များသည် ယီမင်နိုင်ငံ နယ်မြေလေးခုရှိ ဟူသီလက်နက်ကိုင်အဖွဲ့၏ ပစ်မှတ်များ ကို လေးကြိမ်မြောက် တိုက်ခိုက်မှုများလုပ်ဆောင်ခဲ့ကြောင်း ဟူသီလက်နက်ကိုင်အဖွဲ့မီဒီယာက ဇန်နဝါရီလ(၁၈) ရက်တွင် ရေးသားဖော်ပြခဲ့သည်။

ဟူသီလက်နက်ကိုင်အဖွဲ့က ပင်လယ်နီအတွင်းရှိ ကုန်တင်သင်္ဘောများနှင့် အမေရိကန်ပိုင်သင်္ဘောများအား တိုက်ခိုက်မှုများ ဆက်တိုက်လုပ်ဆောင်နေခြင်းကို လက်တုံ့ပြန်သည့်အနေဖြင့် အမေရိကန် နှင့် ဗြိတိန်တို့က ယခုကဲ့သို့တိုက်ခိုက်မှုများပြန်လည် လုပ်ဆောင်ခဲ့ခြင်းဖြစ်သည်။ 

"အမေရိကန်နဲ့ ဗြိတိန်တပ်ဖွဲ့တွေဟာ Al-Hodeida၊Taiz၊ Dhamar၊ Al-Bayda နဲ့ Saada မြို့တွေကို ပစ်မှတ်ထား တိုက်ခိုက်ခဲ့တာပါ" ဟု ဟူသီလက်နက်ကိုင်အဖွဲ့၏ Al-Masirah TV က ပြောခဲ့သည်။ 

သို့သော်လည်း ပင်လယ်နီအတွင်းရှိ ကုန်တင်သင်္ဘောများကို တိုက်ခိုက်မှုများ ဆက်လက်လုပ်ဆောင်သွားမည်ဖြစ် ကြောင်း အီရန်ကျောထောက်နောက်ခံပြုဟူသီလက်နက်ကိုင်အဖွဲ့က ကတိပြုခဲ့သည်။ ဟူသီလက်နက်ကိုင်အဖွဲ့ အရာရှိတစ်ဦး က "အမေရိကန်နဲ့ ဗြိတိန်တပ်ဖွဲ့တွေက ကျွန်တော်တို့ရဲ့တိုက်ခိုက်မှုတွေကို တားဆီးဖို့ကြိုးပမ်းနေ ပေမယ့်လည်း အစ္စရေးကိုဦးတည်သွားမယ့်သင်္ဘောတွေကို ဆက်လက်ပစ်မှတ်ထား တိုက်ခိုက်သွားမှာပါ" ဟု ပြောခဲ့သည်။

အစ္စရေး-ဟားမက်စစ်ပွဲဖြစ်ပွားပြီးနောက် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့် အနေဖြင့် ပင်လယ်နီအတွင်းရှိ သင်္ဘောများကို ပစ်မှတ်ထားတိုက်ခိုက်နေခြင်းဖြစ်ကြောင်း ဟူသီလက်နက်ကိုင်အဖွဲ့ က ပြောကြားခဲ့သည်။ 

ထို့အပြင် ပင်လယ်နီအတွင်းရှိ အမေရိကန်ပိုင်ကုန်တင်သင်္ဘောများကိုလည်း ပစ်မှတ်ထားတိုက်ခိုက်မှုများအား ပိုမိုတိုးမြှင့်လုပ်ဆောင်သွားမည်ဖြစ်ကြောင်း ဟူသီလက်နက်ကိုင်အဖွဲ့က ပြီးခဲ့သည့်ရက်ပိုင်းတွင် ကတိပြုပြောခဲ့ သည်။ အမေရိကန် နှင့် ဗြိတိန်တပ်ဖွဲ့တို့သည် ဟူသီလက်နက်ကိုင်အဖွဲ့အား ပစ်မှတ်ထားတိုက်ခိုက်မှုများကို ပြီးခဲ့သည့်သီတင်းပတ်အတွင်း စတင်လုပ်ဆောင်ခဲ့ခြင်းဖြစ်ကြောင်း သိရသည်။