မြူနစ် (NSS) - ဇန်နဝါရီ ၁၇

ဘုရားစေတီများကိုဖျက်ဆီး၍ ဘာသာရေးအဓိကရုဏ်းများ ဖြစ်ပေါ်စေရန် အကြမ်းဖက်များ၏ ရည်ရွယ်လှုပ်ရှားများကို အသင်းအဖွဲ့ပေါင်း (၂၀)ကျော်က ကန့်ကွက်ရှုတ်ချလိုက်သည်။

မြန်မာနိုင်ငံစစ်မှုထမ်းဟောင်းအဖွဲ့၊ ဘာသာရေးအသင်းအဖွဲ့အပါအဝင် အဖွဲ့အစည်းပေါင်း(၂၀)ကျော်က ယမန်နေ့(ဇန်နဝါရီ လ ၁၆ ရက်)တွင် အသီးသီး ကန့်ကွက်ရှုတ်ချထားသည်။

ကိုးကန့်လက်နက်ကိုင်အဖွဲ့ MNDAA ၏ အဖွဲ့ဝင်အချို့သည် ဇန်နဝါရီလ ၈ ရက်တွင် လောက်ကိုင်မြို့ရှိ စေတီတစ်ဆူအား တုဖြင့် ထုကာဖျက်ဆီးခဲ့သော ဖြစ်စဉ်ဖြစ်ပွားခဲ့သည်။

အလားတူ ဗုဒ္ဓဘာသာဝင်များ အထွဋ်အမြတ်ထားရာ ဘုရားဆင်းတုတော်များကိုလည်း ဖျက်ဆီးနေသည့် ရုပ်သံဖိုင်များသည်လည်း လတ်တလော၌ လူမှုကွန်ရက်စာမျက်နှာများတွင် ပျံ့နှံ့နေလျက်ရှိသည်။

ထို့ပြင် အကြမ်းဖက်သမားများအနေဖြင့် တိုင်းနှင့် ပြည်နယ်အချို့ရှိ ဘုရား၊ စေတီ၊ ပုထိုးများ၊ ဘာသာရေးဆိုင်ရာအဆောက်အဦးများနှင့် ဘုရားရှိခိုးကျောင်းများကိုလည်း ဗုံးများ ပစ်ချတိုက်ခိုက်ခြင်း၊ လက်နက်ကြီးများဖြင့် ပစ်ခတ်တိုက်ခိုက် ခြင်း နှင့် ဘုရားစေတီများကို အကာအကွယ်ယူကာ ခံစစ်စခန်းများ ပြုလုပ်ခြင်းများကို ကျူးလွန်လျက်ရှိသည်ဟုလည်း နစကမှ ဆိုသည်။

ထို့ကြောင့် ဗုဒ္ဓဘာသာဝင်များ အထွဋ်အမြတ်ထားရာ ဘုရား၊ စေတီ၊ ဆင်းတုတော်များကို ဖျက်ဆီးနေသည့် အကြမ်းဖက် များ၏ လုပ်ရပ်အပေါ် ဗုဒ္ဓဘာသာကလျာဏယုဝအသင်း YMBA (ဗဟို)၊ ဘာသာပေါင်းစုံချစ်ကြည်ညီညွတ်ရေးအဖွဲ့(ဗဟို)၊ မြန်မာနိုင်ငံ ဧဝံဂေလိခရစ်ယာန်မဟာမိတ်အဖွဲ့ချုပ်၊ ပြည်ထောင်စုမြန်မာနိုင်ငံ မက်သဒစ်အသင်းတော် (အောက်မြန်မာပြည်)၊ ယုံကြည်ခြင်းဧဝံဂေလိအသင်းတော်(ပဲခူး)၊ လွတ်မြောက်ခြင်းအသင်းတော်(ရန်ကုန်)၊ မြန်မာနိုင်ငံလုံးဆိုင်ရာ ဟိန္ဒူ ဘာသာရေးဗဟိုအဖွဲ့ချုပ်၊ မြန်မာနိုင်ငံလုံးဆိုင်ရာတမီလ်ဟိန္ဒူ ဖောင်ဒေးရှင်း(ဗဟို)၊ သနန္တဓမ္မပါလက(ဟိန္ဒူ) အဖွဲ့ချုပ်၊ မြန်မာနိုင်ငံလုံးဆိုင်ရာအစ္စလာမ် ဘာသာရေးအဖွဲ့ကြီးတို့က ကန့်ကွက်ရှုတ်ချထားသည်။

အလားတူ ပိန္နဲကုန်းရခိုင်ဂျာမေဗလီ၊ ဘူးသီးတောင်မောင်တော ဒေသဖွံ့ဖြိုးရေးအသင်း၊ မြန်မာနိုင်ငံစစ်မှုထမ်းဟောင်းအဖွဲ့၊ မြန်မာနိုင်ငံသတင်းမီဒီယာကောင်စီ၊ မြန်မာနိုင်ငံအားကစားမီဒီယာများ အဖွဲ့ချုပ်၊ မြန်မာနိုင်ငံရုပ်ရှင် အစည်းအရုံး၊ မြန်မာ  နိုင်ငံပန်းချီပန်းပုအစည်းအရုံး(ဗဟို)၊ မြန်မာနိုင်ငံသဘင်အစည်းအရုံး(ဗဟို)၊ မြန်မာနိုင်ငံဟာသပညာရှင်များအစည်း အရုံး၊ မြန်မာနိုင်ငံစာရေးဆရာအသင်းနှင့် ဗုဒ္ဓဘာသာကိုးကန့်ဓမ္မာရုံ လူမှုရေးရာစီမံခန့်ခွဲရေးကော်မတီမန္တလေးမြို့တို့ကလည်း အပြင်းအထန်ကန့်ကွက်ထားသည်။

စစ်ရေးနှင့်မသက်ဆိုင်သော ဘုရား၊ စေတီ၊ ပုထိုးများအပါအဝင် အခြားဘာသာရေးဆိုင်ရာအဆောက်အဦးများနှင့် ဘုရှားရှိခိုးကျောင်းများကို ဖျက်ဆီးခြင်းသည် ဘာသာရေးအဓိကရုဏ်းများ၊ လူမျိုးရေးအဓိကရိုဏ်းများဖြစ်ပေါ်စေရန်ရည်ရွယ်၍ လုပ် ဆောင်နေသည့် လက်နက်ကိုင်များအားလုံးကို ပြင်းထန်စွာရှုတ်ချသည်ဟု စစ်မှုထမ်းဟောင်းအဖွဲ့က သဘောထားထုတ်ပြန်ထားသည်။

“အဓိက ကတော့ ဗုဒ္ဓဘာသာက မြန်မာနိုင်ငံမှာ လူအများစုကိုးကွယ်တဲ့ ဘာသာဖြစ်တယ်။ အခြေခံဥပဒေမှာလည်း အသိ အမှတ်ပြုထားတယ်။ ဆိုတော့ လူအများကိုးကွယ်တဲ့ ဘာသာအပေါ်မှာ အခုလိုလက်နက်ကိုင်အကြမ်းဖက်အဖွဲ့က စော်ကားတာဟာ ဘယ်လိုမှ မဖြစ်သင့်တဲ့ကိစ္စပဲ။ ဘယ်လိုမှ လက်သင့်ခံလို့ မရတဲ့ကိစ္စပဲ။ အဲဒါကို ကျွန်တော်တို့ ပါတီအနေနဲ့ ပြင်းပြင်း ထန်ထန် ရှုတ်ချတယ်”ဟု အမျိုးသားဒီမိုကရေစီပါတီသစ် (NNDP)မှ တာဝန်ရှိသူတစ်ဦးက NSS ကို ပြောသည်။

ထို့ပြင် ဘုရားစေတီများကို ဖျက်ဆီးသည့်လုပ်ရပ်များနှင့်ပတ်သက်၍လည်း နိုင်ငံအတွင်းရှိ မြို့ပေါင်း (၃၀)ကျော်၌ ရဟန်း သံဃာတော်များနှင့် လူပုဂ္ဂိုလ်အများအပြားက ကန့်ကွက်ဆန္ဒပြမှုများ ပြုလုပ်ထားသည်။