Pika (NSS) - ဇန်နဝါရီ ၁၅ 

ယခုသီတင်းပတ်အတွင်း အီရန်ရေတပ်က ဖမ်းဆီးထိန်းသိမ်းထားသော ရေနံတင်သင်္ဘောမှ သင်္ဘောအမှုထမ်း အားလုံး ဘေးကင်းကြောင်း သင်္ဘောကုမ္ပဏီပိုင်ရှင်က ဇန်နဝါရီလ(၁၄)ရက်တွင် ပြောကြားခဲ့သည်။ 

သင်္ဘောကုမ္ပဏီ၏ တာဝန်ရှိသူများသည် အီရန်အာဏာပိုင်များကို ဆက်သွယ်ခဲ့ပြီး St Nikolas ရေနံတင်သင်္ဘော ပေါ်မှ သင်္ဘောသားများအားလုံး ဘေးကင်းကြောင်း နှင့် ကျန်းမာရေးကောင်းမွန်သည့်အခြေအနေတွင်ရှိကြောင်း အင်ပါယာရေကြောင်း သွားလာရေးက ထုတ်ပြန်ချက်တစ်ခုတွင် ရေးသားဖော်ပြထားသည်။

အီရန်နိုင်ငံ Bandar Abbas မြို့ရှိ ဆိပ်ကမ်းတွင် ကျောက်ချရပ်နားထားသော Marshall ကျွန်းစုအလံလွှင့်တင်ထား သော ရေနံတင်သင်္ဘောပေါ်မှ သင်္ဘောသား(၁၉)ဦးကို တိုက်ရိုက်ဆက်သွယ်နိုင်ခြင်းမျိုးမရှိသေးကြောင်း သင်္ဘောကုမ္ပဏီပိုင်ရှင်က ပြောကြားခဲ့သည်။

အဆိုပါရေနံတင်သင်္ဘောပေါ်ရှိ သင်္ဘောသားများမှာ ဖိလစ်ပိုင်နိုင်ငံသား(၁၈)ဦး နှင့် ဂရိနိုင်ငံသားတစ်ဦးတို့ဖြစ် ကြောင်း သိရသည်။ အီရန်အစိုးရသည် ဇန်နဝါရီလ(၁၁)ရက်တွင် St Nikolas ရေနံတင်သင်္ဘောကို ဖမ်းဆီး ထိန်းသိမ်းခဲ့ခြင်းဖြစ်ကြောင်း သိရသည်။ ပြီးခဲ့သည့်နှစ် ဧပြီလတွင် အီရန်ရေနံများတင်ဆောင်လာသည့် အဆိုပါ သင်္ဘောကို အမေရိကန်အစိုးရက ဖမ်းဆီးထိန်းသိမ်းခဲ့ခြင်းနှင့်ပတ်သက်ပြီး လက်တုံ့ပြန်သည့်အနေဖြင့် ယခုကဲ့သို့ ဖမ်းဆီးထိန်းသိမ်းမှုများ ပြန်လည်လုပ်ဆောင်ခဲ့ခြင်းဖြစ်ကြောင်း အီရန်အစိုးရက ပြောကြားခဲ့သည်။

St Nikolas ရေနံတင်သင်္ဘောကို တရားမဝင်ဖမ်းဆီးထိန်းသိမ်းခဲ့သည့် အီရန်အစိုးရ၏ လုပ်ရပ်ကို အမေရိကန်က ပြစ်တင်ရှုတ်ချခဲ့ကြောင်းလည်း သိရသည်။ 

ထို့အပြင် အဆိုပါသင်္ဘောနှင့် သင်္ဘောအမှုထမ်းများအားလုံးကို ပြန်လွှတ်ပေးရန် အမေရိကန်အစိုးရက တောင်းဆိုခဲ့ကြောင်းလည်းသိရသည်။ St Nikolas ရေနံတင်သင်္ဘောသည် အီရတ်နိုင်ငံ Basra မြို့တွင် ရေနံစိမ်းတန်ချိန်ပေါင်း (၁၄၅၀၀၀)ကို တင်ဆောင်လာခဲ့ခြင်းဖြစ်ပြီး Suez တူးမြောင်းမှတစ်ဆင့် တူရကီနိုင်ငံ Aliaga မြူနီစီပယ်သို့ ဦးတည်သွားနေခြင်းဖြစ်ကြောင်းသိရသည်။ 

အိုမန်နှင့် အီရန်နိုင်ငံတို့ကို ပိုင်းခြားထားသော ရေနံတင်ပို့သည့်လုပ်ငန်းအတွက် အဓိကလမ်းကြောင်းဖြစ်သည့် အိုမန်ပင်လယ်ကွေ့တွင် ပြီးခဲ့သည့်နှစ်များအတွင်း ပြန်ပေးဆွဲမှုများနှင့် တိုက်ခိုက်မှုများ မကြာခဏဖြစ်ပွားခဲ့ကြောင်းသိရသည်။