Pika (NSS) - ဇန်နဝါရီ ၁၅ 

မြောက်ကိုရီးယားအစိုးရသည် ဇန်နဝါရီလ(၁၄)ရက်က တာလတ်ပစ် လောင်စာဆီအခဲသုံး အသံထက်မြန်သည့် ဒုံးကျည်အသစ်ကို အောင်မြင်စွာစမ်းသပ်ပစ်လွှတ်နိုင်ခဲ့ကြောင်း KNCA သတင်းဌာနက ဖော်ပြခဲ့သည်။

သို့သော်လည်း အဆိုပါစမ်းသပ်ပစ်လွှတ်မှုသည် အိမ်နီးချင်းနိုင်ငံများကို လုံခြုံရေးခြိမ်းခြောက်မှုများ မဖြစ်စေခဲ့ကြောင်း မြောက်ကိုရီးယားအစိုးရက ပြောကြားခဲ့သည်။

အဆိုပါစမ်းသပ်ပစ်လွှတ်မှုသည် တွန်းအားမြင့်လောင်စာဆီ အခဲသုံးအင်ဂျင်များ နှင့် တာလတ်ပစ် အသံထက်မြန် သော ထိန်းချုပ်နိုင်သည့် ဒုံးကျည်ထိပ်ဖူးများ၏ ယုံကြည်စိတ်ချမှုကို စမ်းသပ်ရန် ရည်ရွယ်ထားကြောင်း KCNA သတင်းဌာန၏ ဖော်ပြချက်အရ သိရသည်။

မြောက်ကိုရီးယားနိုင်ငံခြားရေးဝန်ကြီး Choe Son Hui ဦးဆောင်သော ကိုယ်စားလှယ်အဖွဲ့သည် ရုရှားနိုင်ငံသို့ သွားရောက်ရန်အတွက် ပြုံးယမ်းမြို့မှ ထွက်ခွာခဲ့သည့်နေ့တွင် အဆိုပါစမ်းသပ်ပစ်လွှတ်မှု ထွက်ပေါ်လာခြင်း ဖြစ်ကြောင်းလည်း သိရသည်။ 

မြောက်ကိုရီးယား၏ တိုက်ချင်းပစ်ပဲ့ထိန်းဒုံးကျည်စမ်းသပ်ပစ်လွှတ်မှုများ၊ ပထမဆုံးစစ်ဘက်သုံး စပိုင်ဂြိုလ်တု လွှတ်တင်ခြင်းများအပြင် ရုရှားနှင့်ဆက်ဆံရေးများ ပိုမိုနက်ရှိုင်းလာခြင်းကြောင့် ကိုရီးယားနှစ်နိုင်ငံကြား တင်းမာမှုများ မြင့်တက်လာချိန်တွင် တာလတ်ပစ် လောင်စာဆီအခဲသုံး အသံထက်မြန်သည့်ဒုံးကျည် စမ်းသပ် ပစ်လွှတ်မှုနှင့် ရုရှားနိုင်ငံသို့သွားရောက်လည်ပတ်သည့်ခရီးစဉ်တို့ ထွက်ပေါ်လာခြင်းဖြစ်သည်။

တောင်ကိုရီးယားနိုင်ငံသည် စစ်ရေးလေ့ကျင့်မှုများနှင့် လက်နက်တပ်ဆင်မှုများ လုပ်ဆောင်နေခြင်းကြောင့် ဒေသအတွင်းတွင် တင်းမာမှုများပိုမိုမြင့်တက်လာခဲ့ခြင်းဖြစ်သည်ဟု မြောက်ကိုရီးယားအစိုးရက စွပ်စွဲပြောဆိုခဲ့ကြောင်း KCNA က ဖော်ပြခဲ့သည်။

KCNA က "သေးငယ်တဲ့မီးပွားလေးတစ်ခုကတောင် ရန်လိုနေတဲ့ နှစ်နိုင်ငံကြားမှာ ကြီးမားတဲ့ပဋိပက္ခဖြစ်လာဖို့ ဖြစ်စေနိုင်ပါတယ်" ဟု ရေးသားဖော်ပြထားသည်။ မြောက်ကိုရီးယားသည် တောင်ကိုရီးယားနိုင်ငံကို ရန်သူအဖြစ် သတ်မှတ်ရန်အတွက် မကြာသေးမီက အပြောင်းအလဲများပြုလုပ်ခဲ့ပြီး ကိုရီးယားနှစ်နိုင်ငံကြား ငြိမ်းချမ်းစွာ ပြန်လည်ပေါင်းစည်းရန်မှာ မဖြစ်နိုင်တော့ကြောင်း မြောက်ကိုရီးယားခေါင်းဆောင်ကင်ဂျုံအန်း က ပြောကြားခဲ့ သည်။ 

ဇန်နဝါရီလ(၁၄)ရက် နေ့လည်(၂)နာရီ(၅၅)မိနစ်တွင် ပြုံးယမ်းမြို့မှ ပစ်လွှတ်လိုက်သော ဒုံးကျည်သည် မြောက်ကိုရီးယားနိုင်ငံ အရှေ့ဖက်ကမ်းရိုးတန်းမှ အကွာအဝေးကီလိုမီတာ(၁ဝဝဝ)ခန့်အထိ ပျံသန်းသွားခဲ့ကြောင်း တောင်ကိုရီးယားစစ်တပ်က ပြောကြားခဲ့သည်။ အဆိုပါဒုံးကျည် ပျံသန်းသည့်အမြင့်မှာ ကီလိုမီတာ(၅၀)ခန့်အကွာ မှ ဖြစ်ကြောင်း ဂျပန်ကာကွယ်ရေးဝန်ကြီးဌာန က ပြောကြားခဲ့သည်။