နိုင်ငံရေးပဋိပက္ခကြောင့် ကောက်ခံရန်ကျန်ရှိခဲ့သော မီတာခကြွေးကျန်များကို (၉၆)ရာခိုင်နှုန်းအထိ ကောက်ခံရရှိထားပြီးဖြစ်ဟုဆို
ယွန်း (NSS) - ဇန်နဝါရီ ၉
နိုင်ငံရေးပဋိပက္ခကြောင့် ကောက်ခံရန်ကျန်ရှိခဲ့သော မီတာခကြွေးကျန်များကို လက်ရှိအချိန်၌ (၉၆)ရာခိုင်နှုန်းအထိ ကောက် ခံရရှိထားပြီးဖြစ်ကြောင်း လျှပ်စစ်စွမ်းအားဝန်ကြီးဌာနထံမှ သိရသည်။
မီတာကြွေးကျန်များကို ပြီးခဲ့သည့် ၂၀၂၁ ခုနှစ်၊ ဧပြီလမှ ၂၀၂၃ ခုနှစ်၊ ဒီဇင်ဘာလအထိ ကောက်ခံလျက်ရှိရာ (၉၆) ရာခိုင်နှုန်းအထိ ကောက်ခံရရှိခဲ့ပြီးဖြစ်ကြောင်း သိရသည်။
“မီတာခကြွေးကျန်အနေနဲ့ ၂၀၂၁ ခုနှစ်၊ ဧပြီလကနေ ၂၀၂၃ ခုနှစ်၊ ဒီဇင်ဘာလအထိကို ၉၆ ရာခိုင်နှုန်းအထိ ကောက်ခံရရှိခဲ့ပြီး တော့ ကျန်တဲ့ ၄ ရာခိုင်နှုန်းကို တိုင်းနဲ့ပြည်နယ်တွေမှာရှိတဲ့ သက်ဆိုင်ရာအုပ်ချုပ်ရေးအဖွဲ့အစည်းတွေနဲ့ ပေါင်းစပ်ပြီး ကောက်ခံနေပါတယ်”ဟု လျှပ်စစ်စွမ်းအားဝန်ကြီးဌာနမှ တာဝန်ရှိသူတစ်ဦးက NSS ကိုပြောသည်။
ထိုသို့ ကောက်ခံလျက်ရှိရာ မီတာခပေးဆောင်ရန် ပျက်ကွက်သူများကို ပထမလတွင် သတိပေးခြင်း၊ ပထမလမှ တတိယလအထိ ရက်လွန်ဒဏ်ကြေး ကောက်ခံခြင်းများကို ဆောင်ရွက်နေကြောင်း လျှပ်စစ်စွမ်းအားဝန်ကြီးဌာနက အသိပေးထားသည်။
ထို့ပြင် စတုတ္ထလတွင် လအလိုက်ပေးဆောင်ရမည့် မီတာခနှင့် ရက်လွန်ဒဏ်ကြေးများကို ပေးဆောင်ခြင်းမရှိပါက ဓာတ်အားဆက်သွယ်မှု ဖြတ်တောက်ခြင်းနှင့် မီတာပုံးဖြုတ်သိမ်းခြင်းနှင့်အတူ ဥပဒေကြောင်းအရ အရေးယူမှုများ ဆောင်ရွက်နေကြောင်း သိရသည်။
တပ်မတော်က နိုင်ငံတော်အာဏာရယူခဲ့သည့် ၂၀၂၁ ခုနှစ်၊ ဖေဖော်ဝါရီလနောက်ပိုင်းမှစ၍ ၂၀၂၂ ခုနှစ်၊ မေလအထိ လျှပ်စစ်မီတာခ မပေးဆောင်မှုများကြောင့် မီတာခကြွေးကျန် ငွေကျပ်(၅၁၀ ဒသမ ၄၅၅)ဘီလျံရှိခဲ့ကြောင်း သိရသည်။
ထို့ကြောင့် လိုက်လံကောက်ခံမှုများ ဆောင်ရွက်ခဲ့ရာ ငွေကျပ် (၂၆၅)ဘီလျံသာရရှိခဲ့ပြီး ၂၀၂၃ ခုနှစ်၊ ဇူလိုင်လအထိ ဆက်လက်တောင်းခံရန် ကျန်ရှိနေသည့် လျှပ်စစ်မီတာခကြွေးကျန်သည် ငွေကျပ်(၂၄၄ ဒသမ ၆၁၉)ဘီလျံရှိခဲ့ရာ လက်ရှိအချိန်၌ (၉၆) ရာခိုင်နှုန်းအထိ ကောက်ခံပြီးဖြစ်ကြောင်း သိရသည်။
၂၀၂၃ ခုနှစ်၊ ဇူလိုင်လ၌ ဓာတ်အားခပေးဆောင်ခြင်းမရှိသဖြင့် မြို့ပေါ်ရပ်ကွက်များရှိ မီးသုံးသူ (၁၄၅၀၀၀)ကျော် နှင့် ကျေးရွာများရှိ မီးသုံးသူဦးရေ (၇၀၀၀၀)ကျော်ကို ဓာတ်အားဖြတ်တောက်ခဲ့ကြောင်း လျှပ်စစ်စွမ်းအားဝန်ကြီးဌာနက အသိပေးထားသည်။
ထို့ပြင် လျှပ်စစ်ဓာတ်အားသုံးစွဲနေပြီး (၄)လနှင့်အထက် ဓာတ်အားခပေးဆောင်ခြင်းမရှိသည့် မီတာများကိုလည်း ဖြုတ်သိမ်းခဲ့ရာ တိုင်းနှင့်ပြည်နယ် အသီးသီး၌ ၂၀၂၃ ခုနှစ်၊ ဇူလိုင်လအထိ မီတာလုံးရေ(၁၉၃၈၈)လုံးကို ဖြုတ်သိမ်းခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
လားရှိုးမြို့သည် အားလုံးအေးချမ်းနေပြီဖြစ်ကြောင်း မန်ဆူဆရာတော်ကြီး မိန့်ကြား
RELATED POSTS
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း