Pika (NSS) - ဇန်နဝါရီ ၁ 

အမေရိကန်ရေတပ် ရဟတ်ယာဉ်များသည် ယီမင်ကမ်းလွန်ပင်လယ်ပြင်တွင် ကုန်တင်သင်္ဘောတစ်စီးကို တိုက်ခိုက်ခဲ့သော အီရန်ကျောထောက်နောက်ခံပြုဟူသီလက်နက်ကိုင်အဖွဲ့၏ သင်္ဘောများကို ပစ်ခတ်တိုက်ခိုက်မှုများ လုပ်ဆောင်ခဲ့ကြောင်း အမေရိကန်စစ်တပ်က ဒီဇင်ဘာလ(၃၁)ရက်တွင် ပြောကြားခဲ့သည်။

အဆိုပါတိုက်ခိုက်မှုအတွင်း ဟူသီလက်နက်ကိုင်အဖွဲ့ဝင်(၁၀)ဦးသေဆုံးခဲ့ကြောင်း ယီမင်သတင်းရင်းမြစ်များက ပြောကြားခဲ့သည်။ ပင်လယ်နီအတွင်းသွားလာနေသော ကုန်တင်သင်္ဘောများကို ဟူသီလက်နက်ကိုင်အဖွဲ့၏ တိုက်ခိုက်မှုများမှ ကာကွယ်ရန်အတွက် နိုင်ငံပေါင်းစုံပါဝင်သည့် ရေတပ် တပ်ဖွဲ့တစ်ခုကို အမေရိကန်၏က ဖွဲ့စည်းခဲ့ပြီး နောက်ပိုင်း ပထမဆုံးအကြိမ်လူအသေအပျောက်အများဆုံး တိုက်ခိုက်မှုဖြစ်ပွားခဲ့ခြင်း ဖြစ်သည်။

အစ္စရေး-ဟားမက်စစ်ပွဲတွင် ဂါဇာကမ်းမြောင်ဒေသရှိ ပါလက်စတိုင်းလူမျိုးများကို ထောက်ခံသည့်အနေဖြင့် ပင်လယ်နီအတွင်းရှိ ကုန်တင်သင်္ဘောများကို ဒရုန်းများ၊ဒုံးကျည်များဖြင့် ပစ်ခတ်တိုက်ခိုက်နေခြင်းဖြစ်ကြောင်း ဟူသီလက်နက်ကိုင်အဖွဲ့က ပြောကြားခဲ့သည်။ အစ္စရေး-ဟားမက်စစ်ပွဲနှင့်ပတ်သက်ပြီး ယီမင်အခြေစိုက် ဟူသီ လက်နက်ကိုင်အဖွဲ့၏ ကုန်တင်သင်္ဘောများကို တိုက်ခိုက်မှုများသည် ကမ္ဘာလုံးဆိုင်ရာကုန်သွယ်မှုများ၏ (၁၂) ရာခိုင်နှုန်းရှိသော သယ်ယူပို့ဆောင်ရေးလမ်းကြောင်းကို အန္တရာယ်ဖြစ်စေခဲ့ကြောင်းလည်း သိရသည်။ 

အမေရိကန်ရေတပ်သည် (၂၄)နာရီအတွင်း နှစ်ကြိမ်တိုက်ခိုက်ခံခဲ့ရသော စင်ကာပူအလံလွှင့်တင်ထားသည့် ဒိန်းမတ်နိုင်ငံပိုင် ကွန်တိန်နာသင်္ဘော Maersk Hangzhou ၏ အကူအညီတောင်းခံမှုများကို ချက်ချင်း သွားရောက်တုံ့ပြန်ခဲ့ကြောင်း အမေရိကန်ဗဟိုကွပ်ကဲမှုဌာနချုပ်က ပြောကြားခဲ့သည်။ 

ကွန်တိန်နာသင်္ဘော Maersk Hangzhou သည် အစောပိုင်းတွင် သင်္ဘောဖျက် ပဲ့ထိန်းဒုံးကျည်နှစ်စင်းဖြင့် ပစ်မှတ် ထားတိုက်ခိုက်ခံခဲ့ရကြောင်းလည်း သိရသည်။ ဒုံးကျည်တစ်စင်းကို အမေရိကန်စစ်တပ်က ပစ်ချနိုင်ခဲ့သော်လည်း အခြားတစ်စင်းမှာ ကွန်တိန်နာသင်္ဘော Maersk Hangzhou ကို ထိမှန်ခဲ့ကြောင်း သိရသည်။ ထို့နောက် ဟူသီလက်နက်ကိုင်အဖွဲ့၏ သင်္ဘောများသည် အမေရိကန်ရေတပ် ရဟတ်ယာဉ်များကို ပစ်ခတ်တိုက်ခိုက်မှုများ ထပ်မံလုပ်ဆောင်ခဲ့ကြောင်း သိရသည်။ 

အမေရိကန်ရေတပ် ရဟတ်ယာဉ်များက လက်တုံ့ပြန်တိုက်ခိုက်မှုများကို လုပ်ဆောင်ခဲ့ပြီး ကွန်တိန်နာသင်္ဘော၏ မီတာ (၂ဝ)အတွင်းရောက်ရှိလာသော ဟူသီလက်နက်ကိုင်အဖွဲ့သင်္ဘောငယ်(၄)စီးအနက် သုံးစီးကို နှစ်မြုပ်ပစ်နိုင်ခဲ့ ကြောင်း သိရသည်။ တိုက်ခိုက်မှုအတွင်း ဟူသီလက်နက်ကိုင်အဖွဲ့၏ သင်္ဘောငယ်သုံးစီးပေါ်မှ သင်္ဘောအားလုံး သေဆုံးခဲ့ပြီး လေးစီးမြောက်မှာ ထွက်ပြေးသွားခဲ့ကြောင်း သိရသည်။ 

ယီမင်နိုင်ငံရှိ ဟူသီထိန်းချုပ်ထားသော Hodeida ဆိပ်ကမ်းမှ အမည်မဖော်လိုသော သတင်းရင်းမြစ်က "Hodeida ဆိပ်ကမ်း ကမ်းလွန်မှာ ကွန်တိန်နာသင်္ဘောကို တားဖို့ကြိုးပမ်းခဲ့တဲ့ ဟူသီလက်နက်ကိုင်အဖွဲ့ရဲ့သင်္ဘောတွေကို အမေရိကန်ရေတပ်က တိုက်ခိုက်မှုတွေ လုပ်ဆောင်ခဲ့ပါတယ်။ တိုက်ခိုက်မှုအတွင်း ဟူသီလက်နက်ကိုင်အဖွဲ့ဝင် (၁ဝ) ဦး သေဆုံးခဲ့ပြီး အခြား(၂)ဦး ထိခိုက်ဒဏ်ရာရရှိခဲ့ပါတယ်" ဟု ပြောခဲ့သည်။