မြူနစ် (NSS) - ဒီဇင်ဘာ ၃၁

ရန်ကုန်တိုင်းအတွင်းရှိ မြို့နယ်အားလုံးတွင် နှစ်သစ်ကူးည တစ်ညတာအား ညမထွက်ရအမိန့်မှ ပယ်ဖျက်ပေးထားကြောင်း သိရသည်။

အဆိုပါညမထွက်ရအမိန့်ကို ယနေ့(ဒီဇင်ဘာ ၃၁ ရက်) ညပိုင်းမှ မနက်ဖြန် ၂ဝ၂၄ ခုနှစ် ဇန်နဝါရီ ၁ ရက်အထိ ပယ်ဖျက်ပေးထားကြောင်း လုံခြုံရေးအဖွဲ့နှင့်နီးစပ်သူများက NP News ကို ပြောသည်။

“အဓိကတော့ နှစ်သစ်ကူးပွဲတော်တွေ ရှိတဲ့အတွက် ပြည်သူတွေ ပျော်ရွှင်ရအောင်လို့ တစ်ညတာ ပယ်ဖျက်ပေးတဲ့ သဘောပါ။ ဒီနေ့ညကနေ မနက်ဖြန် မနက်ထိ ညမထွက်ရအမိန့် ပယ်ဖျက်ပေးထားတာ။ တစ်ရက်တည်းပါပဲ။ ရန်ကုန်တစ်တိုင်းလုံး ပဲ။ အဲဒါက သူ့မြို့နယ်နဲ့သူ ဒေသန္တရအမိန့်ထုတ်ကြတာပေါ့” ဟု လုံခြုံရေးအဖွဲ့နှင့်နီးစပ်သူက ပြောသည်။

2024 Yangon New Year Countdown ပွဲတော်ကို ယနေ့ ညနေ ၆ နာရီမှစတင်ကာ ရန်ကုန်မြို့ရှိ ပြည်သူ့ရင်ပြင်၌ ကျင်းပရန် ရန်ကုန်တိုင်းအစိုးရအဖွဲ့က စီစဉ်ထားသည်။

အဆိုပါ Countdown ပွဲတော်တွင် နိုင်ငံကျော်ရုပ်ရှင်သရုပ်ဆောင်များ၊ အဆိုတော်များ၊ DJ ပညာရှင်များ၊ အကအဖွဲ့ များနှင့် မျိုးဆက်သစ်တေးသံရှင်များက ဖျော်ဖြေတင်ဆက်သွားမည်ဖြစ်ပြီး မီးရှူးမီးပန်းပစ်ဖောက်ခြင်းများဖြင့် ကျင်းပသွားမည်ဖြစ်ကြောင်း အစိုးရအဖွဲ့က ထုတ်ပြန်ထားသည်။

၎င်းနှစ်သစ်ကူးပွဲတော်ပြီးစီးပါက ညမထွက်ရ ဒေသန္တရအမိန့်သည် ပုံမှန်အတိုင်း ပြန်လည်တည်ရှိမည်ဖြစ်ကြောင်း သိရသည်။

“နောက်ရက်တွေဆိုရင်တော့ ပုံမှန်အတိုင်း ပြန်ဖြစ်သွားမှာပေါ့။ ည ၁ နာရီကနေ မနက် ၃ နာရီ ညမထွက်ရက ပုံမှန်အ တိုင်း ပြန်ဖြစ်သွားမှာပေါ့” ဟု လုံခြုံရေးအဖွဲ့နှင့်နီးစပ်သူက ဆက်လက်ပြောသည်။

အဆိုပါနှစ်သစ်ကူးပွဲတော် ပြီးစီးပါက ရန်ကုန်တိုင်းအတွင်းရှိ မြို့နယ်အားလုံးတွင် ညမထွက်ရအမိန့်သည် ည ၁ နာရီမှ နံ နက် ၃ နာရီအထိ ပုံမှန်အတိုင်းရှိနေမည်ဖြစ်ကြောင်း သိရသည်။