Pearl (NSS) - ဒီဇင်ဘာ ၂၉

ပြည်ပမှမော်တော်ယာဉ်တင်သွင်းမှုနှင့်ပတ်သက်၍ ချမှတ်ထားသည့်မူဝါဒများ ပြောင်းလဲခြင်းမရှိကြောင်း  စီးပွားရေးနှင့်ကူးသန်းရောင်းဝယ်ရေးဝန်ကြီးဌာနက ထုတ်ပြန်ထားသည်။ 

ယခုရက်ပိုင်းအတွင်း ဝန်ကြီးဌာနက ထုတ်ပြန်ကြေညာထားသည့် ၂၀၂၄ ခုနှစ်အတွက် ပြည်ပမှမော်တော်ယာဉ် တင်သွင်းရာတွင် ထုတ်လုပ်သည့်ခုနှစ်သတ်မှတ်သည့် အမိန့်ကြော်ငြာစာ၌ အထက်ပါကဲ့သို့ ထည့်သွင်းထုတ်ပြန်ထားခြင်းဖြစ်သည်။ 

လာမည့် ၂ဝ၂၄ ခုနှစ်၌ ပြည်ပမှကားတင်သွင်းရာတွင် လူစီးယာဉ်များတင်သွင်းခြင်းနှင့်ပတ်သက်၍ ၂ဝ၂၃ ခုနှစ်မှ ၂ဝ၂၄ ခုနှစ်အထိ ထုတ်လုပ်သည့် ယာဉ်များကိုသာ တင်သွင်းရမည်ဖြစ်ကြောင်း သတ်မှတ်ထားသည်။

အလားတူ လုပ်ငန်းသုံးယာဉ်များဖြစ်သည့် ကုန်တင်ယာဉ်၊ ခရီးသည်တင်ယာဉ်များကို ပြည်ပမှတင်သွင်းရာ၌ ၂ဝ၂၀ ခုနှစ်မှ ၂ဝ၂၄ ခုနှစ်အထိ ထုတ်လုပ်သည့် ယာဉ်များကိုသာ တင်သွင်းရမည်ဖြစ်ကြောင်း ဝန်ကြီးဌာနက သတ်မှတ်ထားသည်။

ထို့ပြင် မီးသတ်ယာဉ်/လူနာတင်ယာဉ်၊ ယန္တရားများတင်သွင်းရာ၌ ၂ဝ၁၅ ခုနှစ်မှ ၂ဝ၂၄ ခုနှစ်အတွင်း ထုတ်လုပ်ထားသည့် ယာဉ်များကို တင်သွင်းရမည်ဖြစ်ကြောင်း သတ်မှတ်ကြေညာထားသည်။

လူစီးယာဉ်များ၊  လုပ်ငန်းသုံးယာဉ်များ ၊ မီးသတ်ယာဉ် နှင့် လူနာတင်ယာဉ် များတင်သွင်းရာတွင်   လက်ဝဲစတီယာရင် ယာဉ်များကိုသာ တင်သွင်းခွင့်ပြုမည်ဖြစ်ပြီး အများပြည်သူသုံးလမ်းများပေါ်တွင် မောင်းနှင် အသုံးပြုခြင်းမရှိသည့် လုပ်ငန်းသုံး  ယန္တရားများအား လွန်ခဲ့သော (၁၅)နှစ်အတွင်း ထုတ်လုပ်သည့်ယာဉ် (၂၀၁၀ ခုနှစ်နှင့်အထက် ထုတ်လုပ် သော ယာဉ်)များအဖြစ် တင်သွင်းခွင့်ပြုမည်ဖြစ်ကြောင်း သိရသည်။

"လက်ရှိ ပြည်တွင်း SKD ထုတ်လုပ်တဲ့ စက်ရုံတွေပဲ လည်ပတ်လို့ရတာကိုး။ အဲဒီကပဲ ထွက်လာစရာရှိတယ်။ လောလောဆယ် ပြည်ပက တင်သွင်းခွင့်ကတော့ ရပ် တန့်နေတဲ့ သဘောရှိတယ်။ ကြာတာတော့ ကြာပါပြီ။ (၂)နှစ်၊(၃)နှစ် ရှိနေပြီ။ ကြေညာချက်ကတော့ နှစ်စဉ်နှစ်တိုင်းထွက်နေတာပဲ။ မနှစ်ကလည်း ထွက်တယ်။  ဒီနှစ်လည်းထွက်တာပဲ။ ပုံမှန်ပါပဲ"ဟု  ကားတင်သွင်းနေသည့် လုပ်ငန်းရှင်တစ်ဦးက NSS ကိုပြောသည်။ 

ယခုထုတ်ပြန်ချက်သည် လုပ်ထုံးလုပ်နည်းအရ ပြက္ခဒိန်နှစ်အလိုက် နှစ်စဉ်တင်သွင်းခွင့်ပြုသည့် မော်တော်ယာဉ် ထုတ်လုပ်ခုနှစ် သတ်မှတ်ချက်အား ပုံမှန်ထုတ်ပြန်ခြင်းသာဖြစ်ပြီး မော်တော်ယာဉ်တင်သွင်းမှုနှင့် ပတ်သက်၍ လက်ရှိ ချမှတ်ဆောင်ရွက်နေသည့်မူဝါဒများ ပြောင်းလဲခြင်းမပြုဘဲ ဆက်လက်ကျင့်သုံးလျက်ရှိကြောင်း ဝန်ကြီး ဌာနက အသိပေးထုတ်ပြန်ထားသည်။