Pika (NSS) - ဒီဇင်ဘာ ၂၈

ပက်ထရီယော့ PAC-3 လေယာဉ်ဖျက်ဒုံးကျည်များ အမေရိကန်သို့ပေးပို့မည့် ဂျပန်နိုင်ငံဆုံးဖြတ်ချက်ကို ရုရှားနိုင်ငံက ပြစ်တင်ရှုတ်ချခဲ့ကြောင်းလည်း သိရသည်။

အဆိုပါလှုပ်ရှားမှုသည် အထူးသဖြင့် ယင်းဒုံးကျည်များ ယူကရိန်းနိုင်ငံသို့ရောက်ရှိသွားမည်ဆိုပါက ဂျပန် နှင့် ရုရှား နိုင်ငံကြားဆက်ဆံရေးများအပေါ် အပျက်သဘောဆောင်သော အကျိုးသက်ရောက်မှုများ ရှိလာနိုင်ကြောင်း ရုရှား က သတိပေးပြောခဲ့သည်။

ထို့အပြင် ဂျပန်နိုင်ငံ၏လုပ်ရပ်သည် ဒေသတွင်းနှင့် ကမ္ဘာလုံးဆိုင်ရာ တည်ငြိမ်ရေးကို ထိခိုက်စေကြောင်း ရုရှား နိုင်ငံခြားရေးဝန်ကြီးဌာနပြောရေးဆိုခွင့်ရှိသူ အမျိုးသမီးမာရီယာဇာခါရိုဗာက ပြောကြားခဲ့သည်။ မာရီယာဇာခါရိုဗာ က "ဂျပန်နိုင်ငံရဲ့လုပ်ရပ်ဟာ ဒေသတွင်းနဲ့ကမ္ဘာလုံးဆိုင်ရာလုံခြုံရေးအတွက် အပျက်သဘောဆောင်တဲ့ အကျိုးဆက်တွေ ရှိလာစေနိုင်ပါတယ်" ဟု ပြောခဲ့သည်။

ဂျပန်နိုင်ငံ၏ PAC-3 ဒုံးကျည်များကို အမေရိကန်က ယူကရိန်းသို့ပေးပို့မည်ဆိုပါက အကျိုးဆက်အနေဖြင့် ရုရှား နှင့် ဂျပန်နိုင်ငံကြားဆက်ဆံရေးအပေါ် သက်ရောက်မှုများရှိလာစေနိုင်ကြောင်း မာရီယာဇာခါရိုဗာက သတိပေးပြောခဲ့ သည်။ 

၎င်းက "ဂျပန်ရဲ့ PAC-3 ဒုံးကျည်တွေ ယူကရိန်းတပ်ဖွဲ့တွေ လက်ထဲရောက်ရှိသွားမယ်ဆိုရင် ဒီလုပ်ရပ်ကို ရုရှားနိုင်ငံ အပေါ်ရန်လိုတဲ့လုပ်ရပ်တစ်ခုလို့ ယူဆသွားမှာဖြစ်သလို ဂျပန်အတွက် အဆိုးရွားဆုံးအကျိုးဆက်တွေဖြစ်ပေါ်လာစေပါလိမ့်မယ်" ဟု ပြောခဲ့သည်။

ဂျပန်အစိုးရသည် ၁၉၄၇ ခုနှစ်တွင် နိုင်ငံ၏ ငြိမ်းချမ်းရေးအခြေခံဥပဒေအောက်တွင် ချမှတ်ထားသော စစ်ဘက်ဆိုင်ရာတင်ပို့မှုများအပေါ် တားမြစ်ပိတ်ပင်ထားမှုများကို အဆုံးသတ်ခဲ့ပြီးနောက် အမေရိကန်နိုင်ငံသို့ PAC-3 ဒုံးကျည်များ တင်ပို့ပေးရန် သဘောတူညီခဲ့ခြင်းဖြစ်ကြောင်း သိရသည်။ ဂျပန်နိုင်ငံထုတ် ဒုံးကျည်များသည် ယူကရိန်းနိုင်ငံသို့ တိုက်ရိုက်ရောက်ရှိသွားနိုင်ခြင်းမျိုးမရှိသော်လည်း ဂျပန်၏ ပေးပို့မှုများကြောင့် အမေရိကန်က ယူကရိန်းသို့ အမေရိကန်ထုတ် ပက်ထရီယော့ဒုံးကျည်များ ပိုမိုကူညီထောက်ပံ့ပေးသွားနိုင်မည်ဖြစ်ကြောင်း ပြောဆိုမှုများလည်း ရှိနေသည်။ 

ထို့အပြင် အမေရိကန်သည် ယူကရိန်းသို့ပေးပို့မှုများကြောင့် ကုန်ခမ်းသွားသော ၎င်း၏ သိုလှောင်မှုများတွင် ဂျပန်ထုတ်ဒုံးကျည်များကို အစားထိုးသွားနိုင်မည်ဖြစ်ကြောင်း ပြောဆိုမှုများလည်းရှိနေသည်။