စော (NSS) - ဒီဇင်ဘာ ၂၈

လာမည့် ၂၀၂၄ ခုနှစ်အတွင်း အားကောင်းသော အယ်လ်နီညိုကြောင့် အပူချိန်မြင့်တက်ပြီး သောက်သုံးရေရှားပါးမှု ကြုံတွေ့နိုင်ကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာနက ယနေ့ (ဒီဇင်ဘာလ ၂၈ ရက်)တွင် အသိ ပေးထုတ်ပြန်ထားကြောင်း သိရသည်။

မိုးဇလ၏ထုတ်ပြန်ချက်အရ အီကွေတာအနီးရှိ အပူပိုင်းပစိဖိတ်သမုဒ္ဒရာ၏ ပင်လယ်ရေမျက်နှာပြင်အပူချိန်နှင့် လေထုများသည် အားအနည်းငယ်ရှိ၍ အယ်လ်နီညိုအခြေအနေ၌ ရှိနေခြင်းဖြစ်ကြောင်း သိရသည်။

ထို့ပြင် နိုင်ငံတကာ မိုးလေဝသဌာနများရှိ သင်္ချာပုံစံပြု ‌မော်ဒယ်ခန်းမှန်းချက်များအရ လာမည့် ၂၀၂၄ ခုနှစ်၊ ဇန်နဝါရီလအတွင်း အားကောင်းသော အယ်လ်နီညို အခြေအနေတွင် ဆက်လက်တည်ရှိနိုင်ပြီး ဖေဖော်ဝါရီလမှ စတင်၍ အယ်လ်နီညိုအခြေအနေသည် တဖြည်းဖြည်း ပြန်လည်လျော့ကျနိုင်ကြောင်း သိရသည်။

“လာမည့် ၂၀၂၄ ဖေဖော်ဝါရီလအထိ အယ်လ်နီညို အား ကောင်းဖို့အခြေအနေရှိတယ်။ ဖေဖော်ဝါရီလပြီးရင်တော့ သူကအားပြန်လျော့လာမယ်။ အယ်လ်နီညိုဖြစ်စဉ်ကြောင့် အပူချိန်မြင့်တက်တာ၊ မိုးရွာသွန်းမှုတွေ ပုံစံမူမမှန်တာ၊ မုန်တိုင်းတွေ ပိုမိုဖြစ်ပေါ်တာ ဒါတွေဖြစ်နိုင်တဲ့အခြေအနေရှိတယ်။ ဒါတွေကို သတိပြုဖို့ ဌာနကထုတ်ပြန်ထားတာပါ”ဟု မိုးဇလ၏ ညွှန်ကြားရေးမှူး ဦးလှထွန်းက NSS ကိုပြောသည်။ 

အဆိုပါ အယ်လ်နီညိုသည် ပစိဖိတ်သမုဒ္ဒရာတွင် ဖြစ်ပေါ်နေခြင်းဖြစ်သော်လည်း ၎င်း၏ အကျိုးသက်ရောက်မှုများကို မြန်မာနိုင်ငံ၌ ကြုံတွေနိုင်ကြောင်း ထုတ်ပြန်ချက်အရသိရသည်။

၎င်း၏ အကျိုးသက်ရောက်မှုအနေဖြင့် မိုးရွာသွန်းမှု မူမမှန်ခြင်း၊ နေ့အပူချိန်မြင့်မားခြင်း၊ မုန်တိုင်းဖြစ်ပေါ်မှုများ မူမမှန်ခြင်း၊ မိုးခေါင်ရေရှားခြင်းစသည့် အစွန်းရောက်မိုးလေဝသဖြစ်စဉ်များ ဖြစ်ပေါ်လာနိုင်ကြောင်း သိရသည်။

“အယ်လ်နီညိုဖြစ်စဉ်က သမုဒ္ဒရာနဲ့ လေထုတွေရဲ့ ဖြစ် စဉ်တွေဆိုတော့ လေထုတွေရဲ့အခြေအနေကြောင့် မိုးရွာသွန်းမှုပုံစံမမှန်တာတွေ၊ မုန်တိုင်းဖြစ်တာတွေ၊ အပူချိန်မြင့်တက်ပြီး မိုးခေါင်ရေရှားတာတွေ ဖြစ်နိုင်တယ်။ အဲဒီတော့ အပူချိန်မြင့်တက်လာပြီဆိုရင် ဘယ်သူတွေ သတိ ထားရမလဲဆိုတော့ ကျန်းမာရေးပေါ့။ ကျန်းမာရေးဆိုင် ရာက လာမယ့် နွေရာသီဆို ပိုသတိထားသင့်တာပေါ့။‌ နေ့အပူချိန်တွမြင့်တက်တာကြောင့် အပူရှပ်တာတို့ပေါ့။ နောက်ပြီး စိုက်ပျိုးရေးပေါ့။ ရေရှားပါးတာတို့ကို သတိပြုသင့်တယ်။ သောက်သုံးရေရှားပါးမှုတွေ ကြုံလာနိုင်တယ်”ဟု ၎င်းကဆက်လက်ပြောသည်။

အဆိုပါအယ်လ်နီညိုဖြစ်စဉ်နှင့် ပတ်သက်သည့်အခြေအ နေများကို အချိန်နှင့်တစ်ပြေးညီ ဆက်လက်ထုတ်ပြန် သွားမည်ဖြစ်ပြီး မိမိတို့သက်ဆိုင်ရာကဏ္ဍများအလိုက် ကြိုတင်ပြင်ဆင်နိုင်ကြရန် မိုးဇလမှ အသိပေးထုတ်ပြန်ခဲ့သည်။