ဂျန်ဇက် (NSS) - ဒီဇင်ဘာ ၂၇ 

ကုလသမဂ္ဂဝန်ထမ်းများအပေါ် ဗီဇာခွင့်ပြုချက်ပေးခြင်းကို ယခင်ကဲ့သို့ တိုက်ရိုက်ခွင့်ပြုပေးသွားမည် မဟုတ်ကြောင်း  အစ္စရေးအစိုးရက ထုတ်ဖော်ပြောဆိုလိုက်သည်။

ကုလသမဂ္ဂဝန်ထမ်းအချို့သည် ဟားမက်စ်လက်နက်ကိုင်အဖွဲ့နှင့်ပူးပေါင်းပြီး ခက်ခဲရှုပ်ထွေးမှုများဖြစ်လာစေရန် လုပ်ဆောင်နေကြောင်း၊ ၎င်းတို့၏ ဗီဇာကို ဖြစ်ရပ်တစ်ခုချင်းစီ အပေါ်အခြေခံပြီး စိစစ်ခွင့်ပြုသွားမည်ဖြစ်ကြောင်း အစ္စရေးနိုင်ငံခြားရေးဝန်ကြီးဌာန အကြီးတန်းအရာရှိ အီလွန်လီဗိုင်းက ပြောသည်။

ကုလသမဂ္ဂဝန်ထမ်းအချို့သည် အစ္စရေးနိုင်ငံသာ ဝေဖန်ပြစ်တင်ပြီး ဟားမက်စ်လက်နက်ကိုင်အဖွဲ့၏ပြစ်မှုများကို ဖုန်းကွယ်ပေးထားကြောင်း ၎င်းက ထပ်မံပြောခဲ့သည်။ 

"အစ္စရေးအစိုးရဟာ ကုလသမဂ္ဂဝန်ထမ်းတွေရဲ့ဗီဇာတောင်းဆိုချက်တွေကို အရင်တုန်းကလိုမျိုး တိုက်ရိုက် ခွင့်ပြုပေးသွားမှာမဟုတ်ဘူး။ ဖြစ်ရပ်တစ်ခုချင်းစီအပေါ် အခြေခံပြီး စဉ်းစားသွားမယ်။ အစ္စရေးဟာ ဟားမက်စ် အဖွဲ့ရဲ့ဝါဒဖြန့်ချိရေးအတွက် အလုပ်လုပ်ပေးနေတဲ့သူတွေနဲ့ အလုပ်ပူးတွဲလုပ်ကိုင်နေခြင်းကို ရပ်တန့်သွားဖွယ်ရှိ ပါတယ်" ဟု အစ္စရေးနိုင်ငံခြားရေးဝန်ကြီးဌာန အကြီးတန်းအရာရှိ အီလွန်လီဗိုင်းက ပြောသည်။

အစ္စရေးစစ်တပ်က ဟားမက်စ်လက်နက်ကိုင်အဖွဲ့ဝင်များသည် ဒုက္ခသည်စခန်းများတွင် နေထိုင်ပြီး တိုက်ခိုက်ရေး လုပ်ငန်းများကို လုပ်ကိုင်နေကြောင်း၊ အရပ်သားများကိုပေးပို့သော လူသားချင်းဆိုင်ရာစာနာမှုအကူအညီများကို လုယူနေကြောင်း ပြောသည်။

အောက်တိုဘာ ၇ ရက်တွင် စတင်ခဲ့သော အစ္စရေး နှင့် ဟားမက်စ်လက်နက်ကိုင်အဖွဲ့ကြားဖြစ်ပွားနေသည့် ဂါဇာ စစ်ပွဲသည် ရက်ပေါင်း ၈ဝ ကျော်လာပြီး အစ္စရေး၏ တိုက်ခိုက်မှုကြောင့် ပါလက်စတိုင်းပြည်သူ နှစ်သောင်းကျော် သေဆုံးထားကြောင်း သိရသည်။ 

အရပ်သားများသေဆုံးခြင်းအတွက် အစ္စရေးအစိုးရသည် ကုလသမဂ္ဂ အပါအဝင် နိုင်ငံတကာအဖွဲ့အစည်းများ၏ ဖိအားမျိုးစုံရင်ဆိုင်ခဲ့ရသော်လည်း စစ်ပွဲကို ရပ်တန့်လိုခြင်းမရှိဘဲ ဆက်လက်တိုက်ခိုက်သွားမည်ဟု အတိအလင်းကြေညာထားသည်။