Pika (NSS) - ဒီဇင်ဘာ ၂၇ 

ဂါဇာကမ်းမြောင်ဒေသရှိ ဟားမက်လက်နက်ကိုင်အဖွဲ့ကို အပြီးသတ်ချေမှုန်းနိုင်မှသာလျှင် ငြိမ်းချမ်းရေးကို ရရှိနိုင်မည်ဖြစ်ပြီး လက်ရှိအချိန်တွင် တိုက်ပွဲများ ပိုမိုပြင်းထန်လာနိုင်ဖွယ်ရှိကြောင်း အစ္စရေးဝန်ကြီးချုပ်နေတန်ရာဟုက ပြောဆိုခဲ့သည်။

ထို့အပြင် ဂါဇာကမ်းမြောင်ဒေသတွင် ငြိမ်းချမ်းရေးရရှိရန်အတွက် ဟားမက်လက်နက်ကိုင်အဖွဲ့ကို ချေမှုန်းပစ်ရန်၊ ဂါဇာဒေသတွင် စစ်ရေးဆောင်ရွက်များ မရှိစေရန် နှင့် ပါလက်စတိုင်းလူ့အဖွဲ့အစည်းအတွင်း အပြောင်းအလဲများဖြစ်ရန် လုပ်ဆောင်ရမည်ဖြစ်ကြောင်း နေတန်ရာဟုက ပြောဆိုခဲ့သည်။

အစ္စရေး၏ အဆက်မပြတ်ထိုးစစ်ဆင်မှုများကြောင့်  အရှေ့အလယ်ပိုင်းဒေသတွင် တင်းမာမှုများ ပိုမိုမြင့်တက်လာခဲ့ သလို ဂါဇာကမ်းမြောင်ဒေသတွင်လည်း အလုံးစုံပျက်စီးမှုများ ဖြစ်ပေါ်ခဲ့ကြောင်း သိရသည်။ အဆိုပါအချက်များ ကြောင့် ဂါဇာစစ်ပွဲအပစ်အခတ်ရပ်စဲရေးတောင်းဆိုမှုများ ကမ္ဘာတစ်ဝန်းတွင် ပိုမိုကျယ်ပြန့်လာခဲ့ကြောင်း သိရသည်။

"ဟားမက်လက်နက်ကိုင်အဖွဲ့ကို အပြီးသတ်ချေမှုန်းပစ်ရပါမယ်။ ဂါဇာမှာ စစ်ရေးဆောင်ရွက်ချက်တွေ မရှိတော့ အောင်လည်း လုပ်ဆောင်ရမှာဖြစ်သလို ပါလက်စတိုင်းလူ့အဖွဲ့အစည်းအတွင်းမှာလည်း အပြောင်းအလဲတွေဖြစ် အောင် လုပ်ဆောင်ရပါမယ်။ ဒါဟာ အစ္စရေးနဲ့ ဂါဇာကမ်းမြောင်ဒေသမှာ ငြိမ်းချမ်းရေးရဖို့အတွက် လိုအပ်တဲ့ အချက်သုံးချက်ပါ၊" ဟု ဝန်ကြီးချုပ်နေတန်ရာဟုက ပြောဆိုခဲ့သည်။

ထို့အပြင် “ဂါဇာကမ်းမြောင်ဒေသတွင် စစ်ရေးဆောင်ရွက်ချက်များမရှိအောင် လုပ်ဆောင်ပြီးပါက ယာယီလုံခြုံရေး ဇုန်တစ်ခု တည်ထောင်ရန်လိုအပ်မည်ဖြစ်ကြောင်း၊ အနီးစပ်ဆုံးအနာဂတ်အတွက် အစ္စရေးဟာ ဂါဇာကမ်းမြောင် ဒေသမှာ လုံခြုံရေးတာဝန်ကို ထိန်းသိမ်းထားရမှာဖြစ်ကြောင်း" ဟု ၄င်းက ပြောဆိုခဲ့သည်။

အစ္စရေးနှင့်ဟားမက်လက်နက်ကိုင်အဖွဲ့ကြား စစ်ပွဲစတင်ဖြစ်ပွားခဲ့ပြီးနောက် လက်ရှိအချိန်အထိ အစ္စရေးနိုင်ငံသား (၁၂ဝဝ)ကျော်သေဆုံးခဲ့ပြီး ဂါဇာကမ်းမြောင်ဒေသတွင် ပါလက်စတိုင်းလူမျိုး (၂ဝဝဝဝ)ကျော် သေဆုံးထားကြောင်း သိရသည်။