Pika (NSS) - ဒီဇင်ဘာ ၂၆ 

အီရတ်နိုင်ငံတွင် ဒီဇင်ဘာလ(၂၅)ရက် အစောပိုင်းက အီရန်နှင့်ဆက်နွယ်သော စစ်သွေးကြွအဖွဲ့များ၏ ဒရုန်းဖြင့် တိုက်ခိုက်မှုအတွင်း အမေရိကန်တပ်ဖွဲ့ဝင်(၃)ဦး ထိခိုက်ဒဏ်ရာရရှိခဲ့ပြီးနောက် အမေရိကန်စစ်တပ်က လေကြောင်းမှ လက်တုံ့ပြန်တိုက်ခိုက်မှုများ လုပ်ဆောင်ခဲ့ကြောင်း သိရသည်။

အဆိုပါ အပြန်အလှန်တိုက်ခိုက်မှုများသည် အစ္စရေး-ဟားမက်စစ်ပွဲက အရှေ့အလယ်ပိုင်းဒေသသို့ ပျံ့နှံ့လာနိုင် ဖွယ်ရှိသည့် နောက်ဆုံးလက္ခဏာတစ်ခုဖြစ်ကြောင်းလည်း သိရသည်။ အီရတ် နှင့် ဆီးရီးယားရှိ အီရန်နှင့်ဆက်နွယ် နေသော စစ်သွေးကြွအဖွဲ့များသည် ဂါဇာကမ်းမြောင်ဒေသအပေါ် အစ္စရေး၏ထိုးစစ်ဆင်မှုများကို ဆန့်ကျင်ခဲ့ပြီး အဆိုပါကိစ္စများအတွက် အမေရိကန်နိုင်ငံက တစ်စိတ်တစ်ပိုင်းတာဝန်ရှိကြောင်း ပြောဆိုခဲ့ကြသည်။ 

အမေရိကန်သမ္မတဂျိုးဘိုင်ဒန်၏ ညွှန်ကြားချက်များအရ အမေရိကန်တပ်ဖွဲ့များသည် ဒီဇင်ဘာလ(၂၅)ရက် နေ့လည်(၁)နာရီ (၄၅)မိနစ်တွင် လေကြောင်းမှလက်တုံ့ပြန်တိုက်ခိုက်မှုများကို လုပ်ဆောင်ခဲ့ပြီး စစ်သွေးကြွအဖွဲ့ များအသုံးပြုသည့် အဆောက်အဦးများကို ဖျက်ဆီးကာ Kataib Hezbollah စစ်သွေးကြွအဖွဲ့ဝင်များကို သတ်ပစ် ခဲ့ဖွယ်ရှိကြောင်း အမေရိကန်စစ်တပ်က ပြောကြားခဲ့သည်။

အမေရိကန်ဗဟိုစစ်ဌာနချုပ်အကြီးအကဲ ဗိုလ်ချုပ်ကြီး Michael Erik Kurilla က "အီရတ်နဲ့ ဆီးရီးယားမှာရှိတဲ့ ညွန့်ပေါင်းအဖွဲ့တွေကို တိုက်ခိုက်မှုတွေ လုပ်ဆောင်ခဲ့လို့ ဒီလိုမျိုးလက်တုံ့ပြန်တိုက်ခိုက်မှုတွေ လုပ်ဆောင်ခဲ့တာပါ။ ပြီးတော့ လက်တုံ့ပြန်တိုက်ခိုက်မှုတွေဟာ စစ်သွေးကြွအဖွဲ့တွေရဲ့တိုက်ခိုက်နိုင်စွမ်းတွေကို လျော့ကျသွားစေဖို့ ရည်ရွယ်ထားတာပါ။ ကျွန်တော်တို့ရဲ့တပ်ဖွဲ့ဝင်တွေကို အမြဲတမ်းကာကွယ်ပေးသွားမှာပါ" ဟု ပြောခဲ့သည်။ 

အီရတ်နိုင်ငံ Erbil မြို့တွင်ရှိသော အမေရိကန်စစ်အခြေစိုက်စခန်းသည် ဒီဇင်ဘာလ(၂၅)ရက် အစောပိုင်းက တစ်လမ်းသွား ဒရုန်းဖြင့် တိုက်ခိုက်ခံခဲ့ရခြင်းဖြစ်ပြီး အမေရိကန်တပ်ဖွဲ့ဝင်များ ထိခိုက်ဒဏ်ရာရရှိခဲ့ကြောင်း သိရသည်။ ထိခိုက်ဒဏ်ရာရရှိခဲ့သူများထဲတွင် တပ်ဖွဲ့ဝင်တစ်ဦးမှာ စိုးရိမ်ရသည့်အခြေအနေတွင်ရှိပြီး အခြားနှစ်ဦး မှာ အသက်အန္တရာယ်စိုးရိမ်ရခြင်းမျိုးမရှိကြောင်းလည်း သိရသည်။ 

အဆိုပါစစ်အခြေစိုက်စခန်းသည် စစ်သွေးကြွအဖွဲ့များ၏ ပစ်မှတ်ထားတိုက်ခိုက်မှုကို အကြိမ်ကြိမ်ခံခဲ့ရ ကြောင်း သိရသည်။ အမေရိကန်စစ်ဌာနချုပ်ပင်တဂွန်သည် တိုက်ခိုက်မှုအတွင်း ပြင်းပြင်းထန်ထန် ထိခိုက်ဒဏ်ရာ ရရှိခဲ့သည့် တပ်ဖွဲ့ဝင်တစ်ဦး၏ အမည် (သို့မဟုတ်) ရရှိခဲ့သည့်ထိခိုက်ဒဏ်ရာများအကြောင်း အသေးစိတ်အချက် အလက်များကို ထုတ်ဖော်ပြောကြားခဲ့ခြင်းမျိုးမရှိခဲ့ကြောင်းလည်း သိရသည်။ ထို့အပြင် အဆိုပါဒရုန်းသည် အမေရိကန်စစ်အခြေစိုက်စခန်း၏ လေကြောင်းရန်ကာကွယ်ရေးစနစ်များကို မည်ကဲ့သို့ ဖြတ်ကျော်ဝင်ရောက်လာ သည်ဆိုသည့်အချက်ကိုလည်း ထုတ်ဖော်ပြောကြားခဲ့ခြင်းမျိုးမရှိခဲ့ကြောင်းသိရသည်။