ဂျန်ဇက် (NSS) - ဒီဇင်ဘာ ၂၆ 

ဟားမက်စ်အဖွဲ့ နဲ့ အစ္စလာမ်မစ် ဂျီဟတ်အဖွဲ့တို့ဟာ အစ္စရေးနိုင်ငံနဲ့ အမြဲတမ်းအပစ်ခတ်ရပ်စဲရေးရယူနိုင်ဖို့ ဂါဇာကမ်းမြောင်ဒေသကို အုပ်ချုပ်ရေးအာဏာကိုစွန့်လွှတ်ရမယ်လို့ အဆိုပြုချက်ကို ငြင်းဆန်ပယ်ချခဲ့ကြောင်း သိရပါတယ်။ 

အီဂျစ်နိုင်ငံဟာ အစ္စရေးနဲ့ ဟားမက်စ်လက်နက်ကိုင်အဖွဲ့ကြားဖြစ်ပွားနေတဲ့ စစ်ပွဲကိုအဆုံးသတ်ဖို့ ကြားဝင်စေ့စပ် ဆွေးနွေးခဲ့ပြီး ကိုင်ရိုမြို့မှာ ဟားမက်စ်အဖွဲ့ နဲ့ အစ္စလာမ်မစ် ဂျီဟတ်အဖွဲ့တို့နဲ့ ဆွေးနွေးခဲ့ကြောင်း သိရပါတယ်။ 

ဟားမက်စ်အဖွဲ့ နဲ့ အစ္စလာမ်မစ် ဂျီဟတ်အဖွဲ့တို့ဟာ အောက်တိုဘာ ၇ ရက်က ဖမ်းဆီးခဲ့တဲ့သူတွေကို ပြန်လွှတ် ပေးရေးနဲ့ပတ်သက်ပြီး ကျော်လွန်တောင်းဆိုလာတဲ့ကမ်းလှမ်းချက်တွေကို ငြင်းဆန်ပယ်ချခဲ့ကြောင်း သိရပါတယ်။ အဆိုပါကိစ္စနဲ့နီးစပ်သူတစ်ဦးက အီဂျစ်အစိုးရဟာ ဟားမက်စ်အဖွဲ့ နဲ့ အစ္စလာမ်မစ် ဂျီဟတ်အဖွဲ့တို့နဲ့တွေ့ဆုံ ဆွေးနွေးချိန်မှာ ပြန်ပေးဆွဲခံထားရသူတွေ ပိုမိုလွှတ်ပေးရေး၊ အမြဲတမ်းအပစ်ခတ်ရပ်စဲရေးရယူနိုင်အောင် ဟားမက်စ်အဖွဲ့ရဲ့ဂါဇာဒေသကို ထိန်းချုပ်အုပ်ချုပ်နေမှုတွေကို လက်လွှတ်ရေး စတဲ့အချက်တွေကို ဆွေးနွေး တောင်းဆိုခဲ့ကြောင်း သိရပါတယ်။

အီဂျစ်အစိုးရဟာ ဟားမက်စ်လက်နက်ကိုင်အဖွဲ့ ဖမ်းဆီးထားသူ ၁ဝဝ ကျော် ပြန်လည်လွှတ်မြောက်ရေးအတွက် ဟားမက်စ်အဖွဲ့နဲ့ အဓိကထားဆွေးနွေးခဲ့ကြောင်း သိရပါတယ်။ အီဂျစ်အဖွဲ့က ကမ်းလှမ်းတဲ့အစီအစဉ်ကို ဂါဇာစစ်ပွဲ အပစ်ခတ်ရပ်စဲရေး အဓိကကြားဝင်စေ့စပ်တဲ့ ကာတာနိုင်ငံကလည်း လက်ခံထားကြောင်း သိရပါတယ်။  

"ကျွန်တော်တို့ဟာ အစ္စရေးနိုင်ငံကျူးကျော်မှုတွေကို အဆုံးသတ်ဖို့ ကြိုးပမ်းနေတာပါ။ အစ္စရေးရဲ့ ရန်လို တိုက်ခိုက်တာတွေ ရပ်တန့်မယ်ဆိုရင် ဖမ်းဆီးထားသူတွေ ပြန်လွှတ်ပေးရေးကို ဆွေးနွေးဖို့ အဆင်သင့်ရှိနေပါ တယ်။ ဂါဇာမြောက်ပိုင်းနဲ့ တောင်ပိုင်းရှိ ပါလက်စတိုင်းပြည်သူအားလုံးဆီကိုလည်း အကူအညီတွေ တိုးမြှင့်ပေးနိုင် အောင်လုပ်ဆောင်ခွင့်ပေးရမယ်။ အဲဒါလိုမျိုးလုပ်ဆောင်ပေးမယ်ဆိုရင်တော့ အပစ်ခတ်ရပ်စဲရေးဆွေးနွေးမယ်" လို့ ဟားမက်စ်အဖွဲ့တာဝန်ရှိသူတစ်ဦးက ပြောပါတယ်။