ကျော် (NSS) - ဒီဇင်ဘာ ၂၆

မဲခေါင်-လန်ချန်းအဖွဲ့ဝင်နိုင်ငံများ၏ စက်မှုလုပ်ငန်းများ ဖွံ့ဖြိုးတိုးတက်ရေးနှင့် စီးပွားရေးခေတ်မီတိုးတက်ရေးအတွက် တရုတ်နိုင်ငံ၏ ရပ်ဝန်းနှင့်ပိုးလမ်းမစီမံကိန်းကို နစကဥက္ကဋ္ဌ၊ ဗိုလ်ချုပ်မှူးကြီးမင်းအောင်လှိုင်က အလေးပေးပြောကြားခဲ့သည်။

နစကဥက္ကဋ္ဌမှ ယမန်နေ့ ဒီဇင်ဘာ ၂၅ ရက် မွန်းလွဲပိုင်းက ကျင်းပသည့် (၄)ကြိမ်မြောက် မဲခေါင်-လန်ချန်း ပူးပေါင်း ဆောင်ရွက်မှု နိုင်ငံ့ခေါင်းဆောင်များအစည်းအဝေးတွင် အဖွင့်အမှာစကားပြောကြားရာ၌ ထည့်သွင်းပြောကြားခဲ့ ခြင်းဖြစ်ပြီး အစည်းအဝေးအား နစကဥက္ကဋ္ဌမှ တရုတ်နိုင်ငံ၊ နိုင်ငံတော်ဝန်ကြီးချုပ် မစ္စတာလီချန်းနှင့်အတူ ပူးတွဲဥက္ကဋ္ဌအဖြစ် တာဝန်ယူခဲ့သည်။

မဲခေါင်-လန်ချန်းအဖွဲ့ဝင်နိုင်ငံများအနေဖြင့် စက်မှုလုပ်ငန်းများ ဖွံ့ဖြိုးတိုးတက်ရေးနှင့်စီးပွားရေး ခေတ်မီတိုးတက် လာစေရေးတို့အတွက် မဲခေါင်-လန်ချန်း ပူးပေါင်းဆောင်ရွက်မှုလုပ်ငန်းစဉ်အောက်တွင် အချင်းချင်းအပြန်အလှန် အကူအညီပေးသင့်သည်ဟု နစကဥက္ကဋ္ဌက ပြောသည်။

ထိုသို့ဆောင်ရွက်နိုင်ရန် တရုတ်နိုင်ငံ၏ ရပ်ဝန်းနှင့်ပိုးလမ်းမစီမံကိန်းနှင့် မဲခေါင်-လန်ချန်းဖွံ့ဖြိုးတိုးတက်မှု လမ်းကြောင်းများမှတစ်ဆင့် အကောင်အထည်ဖော်ဆောင်ရွက်သင့်သည်ဟုလည်း ပြောကြားခဲ့သည်။

နစကဥက္ကဋ္ဌ ပြောကြားခဲ့သည့် ရပ်ဝန်းနှင့်ပိုးလမ်းမစီမံကိန်းကို တရုတ်နိုင်ငံနှင့်မြန်မာနိုင်ငံတို့မှ ရပ်ဝန်းနှင့် ပိုးလမ်းမအဆိုပြုချက် (BRI) မူဘောင်အတွင်း အရည်အသွေးမြင့်မားသည့် ပူးပေါင်းဆောင်ရွက်မှုကို အလေးထား တည်ဆောက်ရန်၊ တရုတ်-မြန်မာ စီးပွားရေးစင်္ကြံန် ဖွံ့ဖြိုးတိုးတက်မှုကိုမြှင့်တင်ရန် နှင့် နှစ်နိုင်ငံ ပြည်သူများအ တွက် အကျိုးကျေးဇူးရရှိရေးအတွက် အလေးထားဆောင်ရွက်လျက်ရှိသည်။

ထိုသို့ဆောင်ရွက်ရန် မြန်မာနိုင်ငံ၏ ရပ်ဝန်းနှင့်ပိုးလမ်းမစီမံကိန်း(BRI)အကောင်အထည်ဖော်ဆောင်ရွက်ရေး ဦးဆောင်ကော်မတီကို ၂ဝ၁၈ ခုနှစ်၌ ဒေါ်အောင်ဆန်းစုကြည်မှ ဥက္ကဋ္ဌအဖြစ်တာ ဝန်ယူခဲ့ပြီး ရပ်ဝန်းနှင့် ပိုးလမ်းမ စီမံကိန်း၌ ပါဝင်ဆောင်ရွက်ခဲ့သည်။

ထိုသို့ဆောင်ရွက်ခဲ့ရာမှ ၂ဝ၂၁ ခုနှစ်၊ ဖေဖော်ဝါရီလမှစတင်၍ မြန်မာနိုင်ငံ၏ ရပ်ဝန်းနှင့်ပိုးလမ်း မစီမံကိန်း(BRI) အကောင်အထည်ဖော်ဆောင်ရွက်ရေးဦးဆောင်ကော်မတီ၏ ဥက္ကဋ္ဌအဖြစ် နစကဥက္ကဋ္ဌ၊ ဗိုလ်ချုပ်မှူးကြီး မင်းအောင်လှိုင်က တာဝန်ယူဆောင်ရွက်ခဲ့သည်။

အဆိုပါရပ်ဝန်းနှင့်ပိုးလမ်းမစီမံကိန်း(BRI) ၏ အကျိုးကျေးဇူးအဖြစ် မြန်မာ-တရုတ် စီးပွားရေးစင်္ကြံန်နှင့် အခြား ပူးပေါင်းဆောင်ရွက်မှုစီမံကိန်းများ၊ မြန်မာနိုင်ငံရှိ အလုပ်အကိုင်အခွင့်အလမ်းများနှင့် စီးပွားရေး ဖွံ့ဖြိုးတိုးတက်မှု များ ရရှိလာခဲ့သည်။

လက်ရှိအချိန်၌ တရုတ်နိုင်ငံမှ ဦးဆောင်ပြုလုပ်နေသည့် ရပ်ဝန်းနှင့်ပိုးလမ်းမစီမံကိန်း၌ ပူးပေါင်းဆောင်ရွက်ရန် မြန်မာနိုင်ငံ အပါအဝင် နိုင်ငံပေါင်း ၁၂၅ နိုင်ငံနှင့် အဖွဲ့အစည်းပေါင်း ၂၉ ခုက လက်မှတ်ရေးထိုးကာ ပူးပေါင်း ဆောင်ရွက်လျက်ရှိကြောင်း သိရသည်။

အစည်းအဝေးတွင် နစကဥက္ကဋ္ဌမှ နယ်စပ်ဖြတ်ကျော်ရာဇဝတ်မှုများ၊ မူးယစ်ဆေးဝါးတရားမဝင် ထုတ်လုပ် ရောင်းဝယ်မှုများ၊ လူကုန်ကူးမှုများ၊ အကြမ်းဖက်မှုများ၊ ဆိုက်ဘာရာဇဝတ်မှုများ၊ အွန်လိုင်းလောင်းကစားမှုများ သည် ဒေသတွင်းလုံခြုံရေးနှင့် စီးပွားရေးဖွံ့ဖြိုးတိုးတက်မှုကို အဟန့်အတားဖြစ်စေ၍ လန်ချန်း-မဲခေါင် အဖွဲ့ဝင်နိုင်ငံ များအနေဖြင့် တရားဥပဒေစိုးမိုးရေးအတွက် ပူးပေါင်းဆောင်ရွက်ခြင်းများကို တိုးမြှင့်ရန်လည်း ဆွေးနွေးပြောကြား ခဲ့သည်။

ထို့အတူ မဲခေါင်-လန်ချန်း ခရီးသွားလာရေးမြို့တော်များတည်ထောင်ခြင်း၊ မဲခေါင်-လန်ချန်း လေကြောင်း ခရီးသွားလာမှုဆိုင်ရာဖွံ့ဖြိုးတိုးတက်မှုနှင့် မိတ်ဖက်ထူထောင်ခြင်းလုပ်ငန်းစဉ်များလည်း ကြိုဆိုကာ ပူးပေါင်းဆောင်ရွက်မှုများ ပြုလုပ်သွားမည်ဟုလည်း ပြောကြားခဲ့သည်။