ဂျန်ဇက် (NSS) - ဒီဇင်ဘာ ၂၅ 

ဂျပန်နိုင်ငံသည် ဒုတိယကမ္ဘာစစ် နောက်ပိုင်း ပြည်ပနိုင်ငံများသို့ စစ်လက်နက်ပစ္စည်းများကို ပထမဆုံးအကြိမ်တင်ပို့သွားမည်ဖြစ်ကြောင်း သိရသည်။

၁၉၄၇ ခုနှစ်တွင် ပြဌာန်းထားသော စစ်လက်နက်ပစ္စည်းတင်ပို့မှုဆိုင်ရာပိတ်ပင်ထားသည့် စည်းကမ်းများကို အဆုံးလိုက်ပြီးနောက် ဂျပန်နိုင်ငံသည် အမေရိကန်နိုင်ငံသို့ စစ်လက်နက်ပစ္စည်းများ တင်ပို့ပေးမည်ဖြစ်ကြောင်း သိရသည်။ 

ဂျပန်အစိုးရသည် အမေရိကန်နိုင်ငံသို့ ပက်ထရီယော့ ဒုံးကျည်စနစ်ကိုတင်ပို့ပေးရန် သဘောတူညီခဲ့ခြင်းဖြစ်ကြောင်း သိရသည်။ ယူကရိန်းစစ်ပွဲနှင့်ပတ်သက်ပြီး အမေရိကန်အစိုးရသည် စစ်လက်နက်ပစ္စည်းများ ကုန်ခမ်းသလောက်ဖြစ်နေသည့်အတွက် ဂျပန်နိုင်ငံထံမှ စစ်လက်နက်ပစ္စည်းအကူညီများရယူရန် ကြိုးပမ်းလာခဲ့ခြင်းဖြစ်ကြောင်း သိရသည်။

Mitsubishi Heavy Industrie ကုမ္ပဏီသည် အမေရိကန်စစ်လက်နက်ပစ္စည်းထုတ်လုပ်ရေးကုမ္ပဏီဖြစ်သော Lockheed Martin နှင့်  RTX ကုမ္ပဏီတို့ထံမှ ထုတ်ဝေခွင့်လိုင်စင်ရရှိခဲ့ပြီးနောက် ပက်ထရီယော့ ဒုံးကျည်စနစ်ကို ထုတ်လုပ်နေခဲ့ကြောင်း သိရသည်။

အမေရိကန်အစိုးရကိုယ်တိုင်ကလည်း ဂျပန်နိုင်ငံထံမှ စစ်လက်နက်ပစ္စည်းများ ဝယ်ယူမည့်အစီအစဉ်ကို အတည်ပြုထားကြောင်း သိရသည်။ အမေရိကန်အစိုးရသည် ဂျပန်နိုင်ငံမှ လက်ခံရရှိမည့် ပက်ထရီယော့ ဒုံးကျည်စနစ်ကို ယူကရိန်းထံ ပေးပို့ကူညီသွားဖွယ်ရှိနေကြောင်း သိရသည်။

ဂျပန်ကာကွယ်ရေးဝန်ကြီး ဖူမီအို ကီရှီဒါက ဂျပန်အစိုးရသည် စစ်လက်နက်ပစ္စည်းများ ပြည်ပတင်ပို့ခြင်းကိုပိတ်ပင်သည့် စည်းကမ်းများကိုပြောင်းလဲ အဆုံးသတ်ရန်သဘောတူညီခဲ့ကြောင်း ပြောသည်။အမေရိကန်နိုင်ငံသို့ ဒုံးကျည်များရောင်းချပေးမည့်စာချုပ်က အမေရိကန် နှင့် ဂျပန်နိုင်ငံကြား မဟာမိတ်အဖြစ် ရပ်တည်မှုများကို ပိုမိုအားကောင်းစေနိုင်ကြောင်း ဂျပန်နိုင်ငံခြားရေးဝန်ကြီးဌာနကပြောသည်။ 

ဂျပန်နိုင်ငံသည် ကာကွယ်ရေးအသုံးစရိတ်များကို တစ်နှစ်ထက် တစ်နှစ်တိုးမြှင့်သုံးစွဲနေရာ လာမည့် ၂ဝ၂၄ ခုနှစ်တွင် ကာကွယ်ရေးအသုံးစရိတ်ကို အမေရိကန်ဒေါ်လာ ၅၅ ဒသမ ၈ ဘီလျံအထိ စံချိန်တင်သုံးစွဲသွားဖွယ်ရှိနေကြောင်း သိရသည်။ ဂျပန်နိုင်ငံသည် လာမည့် ၂ဝ၂၄ ခုနှစ်အတွင်း ကမ္ဘာ့နိုင်ငံများအနက် ကာကွယ်ရေးအသုံးစရိတ် တတိယအများဆုံးသုံးစွဲသောနိုင်ငံအဖြစ် ရပ်တည်နေကြောင်း သိရသည်။ အမေရိကန် နှင့် တရုတ်နိုင်ငံတို့သည် လာမည့် ၂ဝ၂၄ ခုနှစ်တွင် ကာကွယ်ရေးအသုံးစရိတ်အများဆုံး သုံးစွဲသောနိုင်ငံများအဖြစ် ရပ်တည်နေကြောင်း သိရသည်။