မြူနစ် (NSS) - ဒီဇင်ဘာ ၂၃

ယခု ဒီဇင်ဘာလကုန်၌ တပ်မတော်၏ တစ်ဖက်သတ်ပစ်ခတ်ရပ်စဲမှုသည် သက်တမ်းကုန်ဆုံးမည်ဖြစ်ပြီး နောက်ထပ်ဆုံးဖြတ် ချက်တစ်ရပ်အပေါ် နိုင်ငံရေးအသိုင်းအဝိုင်းက စိတ်ဝင်စားနေလျက်ရှိသည်။

နိုင်ငံတော်အစိုးရ၏ လုံခြုံရေးနှင့် အုပ်ချုပ်ရေးဆိုင်ရာယန္တရားများကို နှောင့်ယှက်ထိပါးတိုက်ခိုက်ချိန်မှအပ တပ်မတော်၏ စစ်ရေးဆိုင်ရာလှုပ်ရှားမှုများကို ၂၀၂၃ ခုနှစ် ဇန်နဝါရီလ ၁ ရက်မှ ဒီဇင်ဘာလ ၃၁ ရက်အထိ ရပ်စဲကြောင်း တပ်မတော်ဘက်က ကြေညာခဲ့သည်။

ထိုသို့ ရပ်စဲပေးခြင်းသည် လက်တွေ့ကျသည့် ငြိမ်းချမ်းရေးဆွေးနွေးမှုလုပ်ငန်းစဉ်များကို ဆက်လက်အကောင်အထည်ဖော်ဆောင်ရွက်နိုင်ရန် နှင့် ပြည်သူလူထုတစ်ရပ်လုံး လိုလားတောင့် တနေသည့် ထာဝရငြိမ်းချမ်းရေး ရရှိရန်အတွက်ဖြစ်ကြောင်း တပ်မတော်ဘက်က ဆိုထားသည်။

လက်ရှိတွင် ရှမ်းပြည်နယ်အရှေ့မြောက်ပိုင်း၊ ကရင်ပြည်နယ်၊ ကယားပြည်နယ်၊ ရခိုင်ပြည်နယ်၊ ချင်းပြည်နယ်၊ စစ်ကိုင်းတိုင်း၊ မကွေးတိုင်း နှင့် ပဲခူးတိုင်းအတွင်းရှိ နေရာဒေသအချို့တွင် တိုင်း ရင်းသားလက်နက်ကိုင်အဖွဲ့များ၊ PDF ပူးပေါင်းအဖွဲ့ များက တိုက်ပွဲများ အပြင်းအထန်ဖော်ဆောင်လျက်ရှိသည်။

တပ်မတော်၏ တစ်ဖက်သတ် အပစ်အခတ်ရပ်စဲမှု သက်တမ်းသည် မကြာခင် ဒီဇင်ဘာလ ၃၁ ရက်တွင် ကုန်ဆုံးတော့မည် ဖြစ်ပြီး လက်ရှိ နိုင်ငံအတွင်းဖြစ်ပွားနေသည့် တိုက်ပွဲများနှင့်ပတ်သက်၍ တပ်မတော်သည် ခုခံစစ်အနေဖြင့်သာ ပြန်လည်ခု ခံနေသည်ကို တွေ့ရကြောင်း နိုင်ငံရေးအသိုင်းအဝိုင်းက မှတ် ချက်ပြုထားသည်။

“ဗိုလ်ချုပ်မှူးကြီးမင်းအောင်လှိုင်သည် တပ်မတော်ကာကွယ် ရေးဦးစီးချုပ်ဖြစ်သလို နိုင်ငံတော်အကြီးအကဲဖြစ်နေတဲ့အခါမှာ သူ့ရဲ့ ပေးထားချက်တွေက ကမ္ဘာသိဖြစ်ကြတာကိုဗျ။ ဥပမာ ၂၀၂၂ ခုနှစ်ကို ငြိမ်းချမ်းရေးနှစ်အဖြစ် သတ်မှတ်တာတို့၊ အခါ အားလျော်စွာအပစ်အခတ်ကို တစ်ဖက်သတ်ရပ်ဆိုင်းတာတို့ကို ကြေညာထားတာ တွေ့ရတယ်”ဟု ရခိုင့်ဦးဆောင်ပါတီ ဥက္ကဋ္ဌဒေါက်တာအေးမောင်က NSS ကို ပြောသည်။

ထို့ကြောင့် လာမည့် ဒီဇင်ဘာလ ၃၁ ရက်မတိုင်ခင်အချိန်တွင် တပ်မတော်ဘက်က ဆုံးဖြတ်ချက်အသစ်တစ်ရပ် ထွက်ပေါ်လာနိုင်ကြောင်းလည်း ၎င်းက ထပ်မံသုံးသပ်ထားသည်။

“ဒီကြားမှာ ဒီဇင်ဘာလ ၃၁ ရက်အထိ အပစ်အခတ်ရပ်ထားတာလည်း ရှိတယ်။ မိမိတပ်စခန်းကို လာတိုက်မှပဲ ပြန်တိုက်မယ်ဆိုတာက ရှိတယ်လေ။ အဲဒီတော့ သူ ဘာလုပ်မယ်ဆိုတဲ့ ဆုံးဖြတ် ချက်သည် အပစ်အခတ်ရပ်တာကို ဆက်ပြီး ကိုင်စွဲထားမှာလား။ မကိုင်စွဲတော့ဘူးလားဆိုတာ ၂၀၂၄ ခုနှစ်ရဲ့ ဆုံးဖြတ်ချက်က ဒီဇင်ဘာလ ၃၁ ရက်မှာ ထွက်လာနိုင်ပါတယ်။ အဲဒီနောက်မှာ စစ်ဘောင်ပိုကျယ်သွားမှာလား။ မြန်မာနိုင်ငံရဲ့ လားရာကို ဘယ်လိုချဉ်းကပ်ကြမှာလဲ။ ဒါက တာဝန်ရှိတဲ့ ပုဂ္ဂိုလ်ကြီးများရဲ့ ကာကွယ်ရေးဦးစီးချုပ်အပါအဝင် ယာယီသမ္မတတို့ရဲ့ သုံးသပ်ချက်တွေ ပါလာနိုင်သလို လက်နက်ကိုင်အဖွဲ့အစည်းခေါင်း ဆောင်များသည်လည်း စစ်ဘောင်ကို ပိုကြီးအောင် ထပ်လုပ်ကြမှာလား။ နိုင်ငံရေးအားဖြင့် ပိုကျယ်လာအောင် လုပ်မှာလားဆိုတာက လာမယ့်နှစ်သစ်မှာပေါ်ထွန်းလာနိုင်ပါတယ်။” ဟု ဒေါက်တာအေးမောင်က ပြောသည်။

ထို့ပြင် လာမည့် ၂၀၂၄ ခုနှစ်အတွင်း၌ တပ်မတော်နှင့် လက် နက်ကိုင်အဖွဲ့များအကြား တိုက်ပွဲများ ပိုမိုပြင်းထန်လာနိုင် ကြောင်းလည်း ပြည်သူ့လွှတ်တော်အမတ်ဟောင်း ဦးစိန်ဝင်းက NSS ကို သုံးသပ်ပြောသည်။

“တစ်ဖက်သတ်ရပ်ထားတယ်။ ဒါပေမယ့် သူတို့ ခံရတယ်လေ။ အဲဒီတော့ တစ်ဖက်သတ် မရပ်တော့ဘဲနဲ့  ၂၀၂၄ မှာတော့ သူတို့က ကြမ်းတော့မယ်လို့ မြင်တာပဲ။ သူတို့ ထိပ်တိုက်တွေ့ကြလိမ့်မယ်လို့ အန်ကယ်မြင်တယ်” ဟု လွှတ်တော်အမတ် ဟောင်းဦးစိန်ဝင်းက သုံးသပ်ထားသည်။

ထာဝရငြိမ်းချမ်းရေး ရရှိရန်ရည်ရွယ်ကာ တပ်မတော်အနေဖြင့် ၂၀၁၈ ခုနှစ် ဒီဇင်ဘာလ ၂၁ ရက်မှစတင်ကာ ၂၀၂၂ ခုနှစ် ဒီဇင် ဘာလ ၃၁ ရက်အထိ တစ်ဖက်သတ်ပစ်ခတ်တိုက်ခိုက်မှုရပ်စဲရေးအတွက် ထုတ်ပြန်ချက်ပေါင်း (၂၁)ကြိမ်ထုတ်ပြန်ကာ ကြေ ညာခဲ့ဖူးသည်။

မြောက်ပိုင်းမဟာမိတ်လက်နက်ကိုင် (၃)ဖွဲ့ဖြစ်သည့် MNDAA၊ TNLA၊ AA တို့သည် (၁၀၂၇ စစ်ဆင်ရေး)အမည်ဖြင့် ပြီးခဲ့သော အောက်တိုဘာလ ၂၇ ရက်မှစတင်ကာ ရှမ်းပြည်နယ်အရှေ့ မြောက်ပိုင်းရှိ လုံခြုံရေးစခန်းများကို အင်အားအလုံးအရင်းဖြင့် ဝင်တိုက်ကာ စခန်းအများအပြားကို သိမ်းပိုက်ထားသည်။

အဆိုပါစစ်ဆင်ရေး စတင်ခဲ့ပြီးနောက်ပိုင်း အခြားသော ပြည် နယ်နှင့်တိုင်းများတွင်လည်း တိုင်းရင်းသားလက်နက်ကိုင်အဖွဲ့ များနှင့် PDF အဖွဲ့များ ပူးပေါင်းကာ တိုက်ပွဲဖော်ဆောင်မှုများ ရှိနေသည်။

နစက၏ NSPNC နှင့် မြောက်ပိုင်းမဟာမိတ်(၃)ဖွဲ့တို့သည် ပြီးခဲ့သောရက်ပိုင်းအတွင်း တရုတ်နိုင်ငံ၌ စစ်ရေးအစား နိုင်ငံရေးဖြင့် ဖြေရှင်းရန် တွေ့ဆုံဆွေးနွေးမှုများရှိခဲ့သော်လည်း လက်ရှိတွင် နှစ်ဖက်ကြား၌ တိုက်ပွဲများ ဆက်လက်ဖြစ်ပွားနေလျက်ရှိသည်ကို တွေ့ရသည်။