Pika (NSS) - ဒီဇင်ဘာ ၂၁ 

မြောက်ကိုရီးယားနိုင်ငံ၏ရန်သူများသည်  နိုင်ငံ၏ နျူကလီးယားလက်နက်များ နှင့် စစ်လက်နက်ပစ္စည်းများ၏ စွမ်းရည်ကို  ကြောက်ရွံ့သင့်ကြောင်း မြောက်ကိုရီးယားခေါင်းဆောင်ကင်ဂျုံအန်းက ထုတ်ဖော်ပြောဆိုခဲ့သည်။

ထို့အပြင် အမေရိကန်နိုင်ငံသို့ရောက်ရှိနိုင်စွမ်းရှိသော တာဝေးပစ် တိုက်ချင်းပစ်ပဲ့ထိန်းဒုံးကျည်(ICBM) ကို အောင်မြင်စွာစမ်းသပ်ပစ်လွှတ်နိုင်ခဲ့သည့်အတွက် မြောက်ကိုရီးယားစစ်တပ်ကို ကင်ဂျုံအန်းက ချီးကျူးစကားပြော ဆိုခဲ့ကြောင်းလည်း သိရသည်။

ဒီဇင်ဘာလ(၁၈)ရက်တွင် မြောက်ကိုရီးယားသည် လောင်စာဆီအခဲသုံး Hwasong-18 တိုက်ချင်းပစ်ပဲ့ထိန်းဒုံးကျည် ကို အောင်မြင်စွာစမ်းသပ်ပစ်လွှတ်နိုင်ခဲ့ကြောင်း၊ အဆိုပါတိုက်ချင်းပစ်ပဲ့ထိန်းဒုံးကျည်သည် အကွာအဝေး ကီလိုမီတာ (၁၅ဝဝဝ)ခန့်အထိ ရောက်ရှိနိုင်ကြောင်း လေ့လာသုံးသပ်သူများက ပြောကြားခဲ့သည်။ 

"ကျွန်တော်တို့နိုင်ငံရဲ့အချုပ်အခြာအာဏာနဲ့ ဒေသတွင်းငြိမ်းချမ်းရေးကို အာမခံချက်ပေးနိုင်မယ့်တစ်ခုတည်းသော အရာက ရန်သူတွေကို မည်သည့်နေရာကနေမဆို ကြိုတင်တိုက်ခိုက်နိုင်စွမ်းနဲ့ ရန်သူတွေကို ကြောက်ရွံ့အောင် လုပ်ဆောင်ဖို့ပါပဲ။ ဒီတိုက်ချင်းပစ်ပဲ့ထိန်းဒုံးကျည်ကို အောင်မြင်စွာ စမ်းသပ်ပစ်လွှတ်နိုင်ခဲ့တာဟာ မြောက်ကိုရီးယားရဲ့မဟာဗျူဟာမြောက်နျူကလီးယားအစီအစဉ်တွေ ဆင့်ကဲပြောင်းလဲလာတာနဲ့ တန်ပြန်ထိုးစစ် ဆင်နိုင်မှုတွေကို ရှင်းရှင်းလင်းလင်းပြသနေတာဖြစ်ပါတယ်။ ပြီးတော့ မြောက်ကိုရီးယားကို နျူကလီးယား တိုက်ခိုက်မှုတွေလုပ်ဆောင်ခဲ့မယ်ဆိုရင်တောင် တွန့်ဆုတ်နေမှာ မဟုတ်ဘူးဆိုတဲ့ မြောက်ကိုရီးယားရဲ့အယူဝါဒ တွေကိုလည်းပြသနိုင်ခဲ့ပါတယ်" ဟု ကင်ဂျုံအန်း က ပြောဆိုခဲ့သည်။

မြောက်ကိုရီးယား၏ Hwasong-18 ICBM ကို အောင်မြင်စွာစမ်းသပ်ပစ်လွှတ်နိုင်မှုသည် အမေရိကန်နယ်ချဲ့သမား များ နှင့် ၎င်း၏မိတ်ဖက်နိုင်ငံများ၊ တည်ငြိမ်ရေးနှင့် ငြိမ်းချမ်းရေးကို ဖျက်ဆီးလိုချင်သူများကို ထိတ်လန့်စေခဲ့ ကြောင်း ကင်ဂျုံအန်းက ပြောကြားခဲ့သည်။