ကုန်တင်သင်္ဘောများကိုကာကွယ်ပေးမည့် အမေရိကန်၏မစ်ရှင်ကို ပံ့ပိုးနိုင်ရန် စစ်ဘက်ဆိုင်ရာဝန်ထမ်းများ စေလွှတ်သွားမည်ဟု ဩစတြေးလျစစ်ဘက်ပြော
Pika (NSS) - ဒီဇင်ဘာ ၂၁
ပင်လယ်နီအတွင်းရှိ ကုန်တင်သင်္ဘောများကို ကာကွယ်ရန်အတွက် အမေရိကန်ဦးဆောင်သောမစ်ရှင်ကို ကူညီပံ့ပိုးရန် စစ်ဘက်ဆိုင်ရာဝန်ထမ်း(၁၁)ဦးကို စေလွှတ်သွားမည်ဖြစ်ကြောင်း ဩစတြေးလျကာကွယ်ရေးဝန်ကြီး ရစ်ချာ့ဒ်မားလက်စ်က ဒီဇင်ဘာလ(၂၁)ရက်တွင် ထုတ်ပြန်ပြောကြားခဲ့သည်။
သို့သော်လည်း မစ်ရှင်ကို ကူညီပံ့ပိုးရန်အတွက် စစ်သင်္ဘောများ နှင့် တိုက်လေယာဉ်များကို စေလွှတ်မည်မဟုတ် ကြောင်း ရစ်ချာ့ဒ်မားလက်စ်က ပြောကြားခဲ့သည်။ ထို့အပြင် ဩစတြေးလျစစ်တပ်သည် ပစိဖိတ်ဒေသကို ဆက်လက်အာရုံစိုက်ရန် လိုအပ်ကြောင်း ၎င်းက ထပ်မံပြောကြားခဲ့သည်။
ပင်လယ်နီအတွင်းရှိ ကုန်တင်သင်္ဘောများကို ယီမင်အခြေစိုက်ဟူသီလက်နက်ကိုင်အဖွဲ့က ဒုံးကျည်များ၊ ဒရုန်းများ ဖြင့် ပစ်ခတ်တိုက်ခိုက်နေမှုကို ကာကွယ်ရန်အတွက် နိုင်ငံအများအပြားသည် တပ်ဖွဲ့တစ်ခုကို ဖန်တီးနေကြောင်း အမေရိကန်နိုင်ငံက ယခုသီတင်းပတ်တွင် ထုတ်ပြန်ကြေညာခဲ့သည်။
အဆိုပါစစ်ဘက်ဆိုင်ရာဝန်ထမ်း(၁၁)ဦးကို လာမည့်ဇန်နဝါရီလတွင် ဘာရိန်းနိုင်ငံရှိ Operation Prosperity Guardian ဌာနချုပ်သို့ စေလွှတ်သွားမည်ဖြစ်ကြောင်း ရစ်ချာ့ဒ်မားလက်စ်က ပြောကြားခဲ့သည်။ ၎င်း က "ကျွန်တော်တို့စစ်သင်္ဘောတွေနဲ့ တိုက်လေယာဉ်တွေတော့ စေလွှတ်မှာ မဟုတ်ပါဘူး။ ကျွန်တော်တို့ရဲ့ မဟာဗျူဟာမြောက်အာရုံစိုက်မှုက ကျွန်တော်တို့ဒေသပဲဖြစ်ပါတယ်။ အဲဒါတွေက အရှေ့မြောက်အိန္ဒိယသမုဒ္ဒရာ၊ တောင်တရုတ်ပင်လယ်၊ အရှေ့တရုတ်ပင်လယ်၊ ပစိဖိတ်သမုဒ္ဒရာတို့ပဲဖြစ်ပါတယ်" ဟု ပြောခဲ့သည်။
ဒေသအတွင်း တရုတ်၏ ဩဇာအာဏာများ ပိုမိုကြီးထွားလာခြင်းကြောင့် အမေရိကန် နှင့် ၎င်း၏ မိတ်ဖက်နိုင်ငံများ ကြားတွင် စိုးရိမ်မှုများ ပိုမိုမြင့်တက်လာနေကြောင်း သိရသည်။ ဩစတြေးလျသည် အမေရိကန်နိုင်ငံ၏ အနီးကပ် ဆုံး စစ်ရေးမဟာမိတ်နိုင်ငံများထဲမှ တစ်နိုင်ငံဖြစ်ကြောင်းလည်း သိရသည်။
ထို့အပြင် ဩစတြေးလျသို့ Virginia အမျိုးအစား နျူကလီးယားစွမ်းအင်သုံး ရေငုပ်သင်္ဘောများကို ရောင်းချခွင့်ပြု သည့်ဥပဒေကို ပြီးခဲ့သည့်သီတင်းပတ်တွင် အမေရိကန်လွှတ်တော်က အတည်ပြုခဲ့ကြောင်းလည်း သိရသည်။ ပင်လယ်နီသို့ စစ်သင်္ဘောများ စေလွှတ်ပေးရန် အမေရိကန်၏တောင်းဆိုမှုကို ငြင်းဆိုခြင်းသည် ဩစတြေးလျနိုင်ငံ အတွက် ယုံကြည်စိတ်ချရသော မိတ်ဖက်နိုင်ငံများကို ပိုမိုနည်းပါးလာစေသည်ဆိုသည့် အတိုက်အခံ လွှတ်တော်အမတ်များ၏ ဝေဖန်မှုကို ရစ်ချာ့ဒ်မားလက်စ်က ငြင်းဆန်ပယ်ချခဲ့ကြောင်းလည်း သိရသည်။
၎င်းက "ဒါဟာ လုံးဝရယ်စရာကောင်းတဲ့ကိစ္စတစ်ခုဖြစ်ပါတယ်။ အမေရိကန်ဟာ ဩစတြေးလျကာကွယ်ရေး တပ်ဖွဲ့ရဲ့ကျွမ်းကျင်မှုတွေကိုနားလည်ပါတယ်။ ပြီးတော့ အာရှ-ပစိဖိတ်ဒေသကို ဆက်လက်အာရုံစိုက်ဖို့ လိုအပ် တယ်ဆိုတာကို အမေရိကန်က နားလည်ပါတယ်" ဟု ပြောခဲ့သည်။
မကြာသေးမီကာလအတွင်း ပင်လယ်နီအတွင်းရှိ ကုန်တင်သင်္ဘောအများအပြားသည် ယီမင်အခြေစိုက်ဟူသီ လက်နက်ကိုင်အဖွဲ့၏ ဒုံးကျည်များ၊ ဒရုန်းများဖြင့် ပစ်ခတ်တိုက်ခိုက်မှုကို ခံခဲ့ရကြောင်းလည်း သိရသည်။ ထို့အပြင် လုံခြုံရေးအာမခံချက်မရမချင်း Bab el-Mandeb ရေလက်ကြားသို့ မဝင်ရောက်ကြရန် သင်္ဘောကုမ္ပဏီ အများအပြားက ၎င်းတို့၏ သင်္ဘောများကို ညွှန်ကြားခဲ့ကြောင်းလည်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ရုရှားတပ်ဖွဲ့များလွှတ်တင်ခဲ့သော အီရန်ထုတ်ဒရုန်းများကို အောင်မြင်စွာပစ်ချနိုင်ခဲ့ကြောင်း ယူကရိန်းပြော
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း