Pika (NSS) - ဒီဇင်ဘာ ၂၁ 

အမေရိကန်နိုင်ငံတွင် ယူကရိန်း၏ အနာဂတ်အတွက် ရှင်းလင်းပြတ်သားသော မဟာဗျူဟာမြောက်အစီအစဉ်တစ်ခုရှိကြောင်း အမေရိကန်နိုင်ငံခြားရေးဝန်ကြီးအန်တိုနီဘလင်ကန်က ထုတ်ဖော်ပြောဆိုခဲ့သည်။

သို့သော်လည်း အမေရိကန်လွှတ်တော်တွင် ရပ်တန့်နေသည့် အကူအညီပေးရေးအစီအစဉ်များကဲ့သို့သော ငွေကြေးထောက်ပံ့မှုများမှာ အားနည်းနေကြောင်း အန်တိုနီဘလင်ကန်က သတိပေးပြောဆိုခဲ့သည်။ အမေရိကန် နိုင်ငံသည် ယူကရိန်း၊ ဂါဇာကမ်းမြောင်ဒေသ နှင့် အခြားနေရာများတွင်ဖြစ်ပွားနေသော ကမ္ဘာလုံးဆိုင်ရာ စိန်ခေါ်မှုများကို ဖြေရှင်းနိုင်ရန်ကြိုးပမ်းနေပြီး ၂ဝ၂၃ ခုနှစ်သည် အလွန်လေးနက်သော စမ်းသပ်မှုများရှိသည့် နှစ်တစ်နှစ်ဖြစ်ကြောင်း အန်တိုနီဘလင်ကန်က ပြောကြားခဲ့သည်။ 

ထို့အပြင် ရီပတ်ဘလစ်ကန်ပါတီဝင်များကြားတွင် ယူကရိန်းကို ဆက်လက်ထောက်ခံရန် စိတ်အားထက်သန်မှုများ တိုးပွားလာမှုနှင့်အတူ အမေရိကန်နိုင်ငံတွင် ယူကရိန်း၏အနာဂတ်အတွက် မဟာဗျူဟာမြောက် အစီအစဉ်တစ်ခုရှိ ကြောင်း အန်တိုနီဘလင်ကန်က ပြောကြားခဲ့သည်။ 

၎င်းက "ကျွန်တော်တို့မှာ ရှင်းလင်းပြတ်သားတဲ့အစီအစဉ်တစ်ခုရှိပါတယ်။ ယူကရိန်းနိုင်ငံဟာ စီးပွားရေး၊ စစ်ရေး နဲ့ ဒီမိုကရေစီရေးတွေမှာ ကိုယ့်ခြေထောက်အပေါ် ကိုယ်ရပ်တည်နိုင်ဖို့အတွက် ကျွန်တော်တို့မှာ အစီအစဉ်ရှိပါတယ်။ ယူကရိန်းဟာ ထောက်ပံ့မှုတွေနဲ့အကူအညီတွေကို နောက်ထပ်လိုအပ်တော့မှာ မဟုတ်ပါဘူး" ဟု ပြောခဲ့သည်။

အဆိုပါအစီအစဉ်ထဲမှ ပထမဆုံးအချက်မှာ  စိန်ခေါ်မှုများကို ချက်ချင်းရင်ဆိုင်နိုင်ရန်အတွက် ယူကရိန်းကို နောက်ထပ်ငွေကြေးအကူအညီများ အခမဲ့ပေးအပ်ရန်ဖြစ်ကြောင်း အန်တိုနီဘလင်ကန်က အကြုံပြုပြောခဲ့သည်။ 

"ဆောင်းရာသီ၊ နွေရာသီ နဲ့ နွေဦးရာသီတို့ကို အကောင်းဆုံးဖြတ်သန်းနိုင်ဖို့အတွက် ယူကရိန်းကို ကျွန်တော်တို့ ကူညီရပါမယ်။ ယူကရိန်းဟာ သူတို့ဘာသာရှေ့ဆက်နိုင်ဖို့အတွက် ကိုယ်ပိုင်အစီအစဉ်တွေရှိတယ်ဆိုတဲ့အချက်ကို လည်း ကျွန်တော်တို့အာရုံစိုက်သွားမှာပါ" ဟု ၄င်က ဆက်လက်ပြောခဲ့သည်။ 

ထို့အပြင် ယူကရိန်းအတွက် နောက်ထပ်အကူအညီများ ပံ့ပိုးပေးရန် အခြားနိုင်ငံများကို အမေရိကန်က ဆက်လက်တိုက်တွန်းသွားမည်ဖြစ်ကြောင်း အန်တိုနီဘလင်ကန်က ပြောခဲ့သည်။