ကျော်(NP News) - ဒီဇင်ဘာ ၂၀

တပ်မတော်တွင်တာဝန်ထမ်းဆောင်ရန် ဝင်ရောက်လာသည့် လူငယ်များကို အရိုးဓာတ်မှန်ရိုက်၍ စစ်ဆေးမှုများပြုလုပ်လျက်ရှိကြောင်း ကာကွယ်ရေးဝန်ကြီး ဗိုလ်ချုပ်ကြီးတင်အောင်စန်းက ပြောသည်။

ယမန်နေ့ (ဒီဇင်ဘာလ ၁၉ ရက်)၊ မွန်းလွဲပိုင်းက အရွယ်မရောက်သေးသူ ကလေးသူငယ်များအား စစ်မှုထမ်းခြင်းမှ ကာကွယ်တားဆီးထိန်းသိမ်းရေးကော်မတီ၏ အစည်းအဝေး(၂/၂၀၂၃)တွင် ကာကွယ်ရေးဝန်ကြီးက အထက်ပါကဲ့သို့ ပြောကြားခဲ့ခြင်းဖြစ်သည်။

ကလေးသူငယ်များအား စစ်မှုထမ်းခြင်းမှကာကွယ်တားဆီးထိန်းသိမ်းရေးကော်မတီသည် တပ်မတော်အတွင်း အရွယ်မရောက်သေးသူ ကလေးသူငယ်များအား စစ်သည်အဖြစ်စုဆောင်းခြင်းနှင့်အသုံးပြုမှုမရှိစေရေး၊ တပ်မတော်တွင် တာဝန်ထမ်းဆောင်ရန်ဝင်ရောက် လာသော သံသယဖြစ်ဖွယ်လူငယ်များကို လက်ခံမှုမရှိစေရေးတို့ကို ဆောင်ရွက်လျက်ရှိကြောင်း ၎င်းကပြော သည်။

ထို့ပြင် အသက်မပြည့်ကြောင်း စိစစ်တွေ့ရှိသည့် စစ်သည်များကိုလည်း မိဘအုပ်ထိန်းသူများထံသို့ ပြန် လည်လွှဲပြောင်းပေးခြင်းများ ဆောင်ရွက်ပေးလျက်ရှိကြောင်း သိရသည်။

ကလေးစစ်သည်များနှင့်ပတ်သက်၍ တပ်မတော် (ကြည်း) သည် ၂၀၀၆ ခုနှစ်ကထုတ်ပြန်ခဲ့သည့် ကုလ သမဂ္ဂအထွေထွေအတွင်းရေးမှူးချုပ်၏ ကလေးသူငယ်များနှင့်လက်နက်ကိုင်ပဋိပက္ခဆိုင်ရာနှစ်စဥ်အစီရင်ခံ စာ၌ ပထမဦးစားပေးစာရင်းတွင် ပါဝင်လာခဲ့သည်ဟု ပြောသည်။

ယင်းစာရင်းမှပယ်ဖျက်နိုင်ရန် အစိုးရ နှင့် CTFMR တို့ကြား အရွယ်မရောက်သေးသူ ကလေးသူငယ်များအား စစ်မှုထမ်းခြင်းမှကာကွယ်တားဆီးထိန်းသိမ်းရေးဆိုင်ရာလုပ်ငန်းစီမံချက်ကို ၂၀၁၂ ခုနှစ်၊ ဇွန်လ ၂၇ ရက်တွင် လက်မှတ်ရေးထိုးပြီး ပူးပေါင်းဆောင်ရွက်ခဲ့ကြောင်း သိရ သည်။

"အဲဒီလို ဆောင်ရွက်ခဲ့တဲ့အချိန်ကစပြီး ဒီနေ့အထိ ကလေးစစ်သည် (၁၀၅၇)ယောက်ကို တပ်မတော်ကနေနုတ်ထွက်ခွင့်ပြုပြီး မိဘအုပ်ထိန်းသူတွေဆီကိုပြန်လည်လွှဲပြောင်းပေးခဲ့ပြီးဖြစ်ပါတယ်"ဟု ဗိုလ်ချုပ်ကြီးတင်အောင်စန်းကပြောသည်။

ထို့ပြင် တပ်မတော်တွင် တာဝန်ထမ်းဆောင်ရန် ဝင်ရောက်လာသည့် လူငယ်များအား အရိုးဓာတ်မှန်ရိုက်၍ စိစစ်ပြီး အသက်မပြည့်သောလူငယ်များအား နေရပ်သို့ပြန်လည်စေလွှတ်ပေးလျက်ရှိကာ CTFMR မှပေးပို့လာသည့် သံသယဖြစ်ဖွယ် စစ်သည်များကိုလည်း ဆက် လက် စိစစ်လျက်ရှိပြီး မှန်ကန်ပါကနုတ်ထွက်ခွင့်ပြုသွားမည်ဖြစ်ကြောင်း ၎င်းကပြောသည်။

တပ်မတော်အနေဖြင့် တပ်သားသစ်စုဆောင်းရေးကဏ္ဍတွင် ဥပဒေ၊ စည်းမျဉ်းစည်းကမ်းများအတိုင်း စုဆောင်းလျက်ရှိပြီး အသိပညာပေး လုပ်ငန်းများကိုလည်း သက်ဆိုင်ရာဝန်ကြီးဌာနများနှင့်ပေါင်းစပ်ဆောင်ရွက်လျက်ရှိကြောင်း သိရသည်။

တပ်မတော်သို့ အကြောင်းအမျိုးမျိုးကြောင့် ဝင်ရောက် လာသည့် ကလေးသူငယ်များအားနုတ်ထွက်ခွင့်ပြုလျက်ရှိပြီး မှားယွင်းစုဆောင်းခဲ့သော တာဝန်ရှိသူများကိုလည်း စစ်စည်းကမ်းနှင့်အညီ အရေးယူဆောင်ရွက်လျက်ရှိကြောင်း သိရသည်။