အဂတိတိုင်စာများကြောင့် နိုင်ငံ့ဝန်ထမ်း (၂၇ဝဝ)နီးပါး ဝန်ထမ်းစည်းကမ်းဖြင့် အရေးယူခံခဲ့ရ
မျိုးကြီး (NSS) - ဒီဇင်ဘာ ၁၈
အဂတိလိုက်စားမှုနှင့်ပတ်သက်သော တိုင်ကြားမှုများကြောင့် နိုင်ငံ့ဝန်ထမ်း (၂၇ဝဝ)နီးပါးသည် ဝန်ထမ်းစည်းကမ်း ဖြင့် အရေးယူခံခဲ့ရကြောင်း အဂတိလိုက်စားမှုတိုက်ဖျက်ရေးကော်မရှင်၏ အချက်အလက်များအရ သိရသည်။
သမ္မတဦးသိန်းစိန်အစိုးရလက်ထက်က အဂတိလိုက်စားမှုတိုက်ဖျက်ရေးကော်မရှင် စတင်ဖွဲ့စည်းခဲ့သော ၂ဝ၁၄ ခုနှစ်မှစ၍ လက်ရှိအချိန်အထိ ကော်မရှင်ထံပေးပို့သော တိုင်ကြားစာပေါင်း (၃၆၃ဝ၅)စောင်ကို လက်ခံရရှိခဲ့ကြောင်းသိရသည်။
၎င်းတိုင်ကြားစာများအနက် အရေးယူဆောင်ရွက်ပေးနိုင်သော တိုင်ကြားစာသည် (၂ဝ၄၆၃)စောင်သာ ရှိခဲ့ပြီး ယင်းတိုင်စာများကို စုံစမ်းစစ်ဆေးဖော်ထုတ်ခဲ့ရာတွင် နိုင်ငံ့ဝန်ထမ်းဥပဒေနှင့်အညီ ဝန်ထမ်းစည်းကမ်းအရ နိုင်ငံ့ဝန်ထမ်း (၂၆၈၄) ဦးကို အရေးယူခဲ့ကြောင်း ကော်မရှင်က ဆိုသည်။
ထို့ပြင် အဂတိလိုက်စားမှုကျူးလွန်သူ (၃ဝ၂)ဦးကိုလည်း အဂတိလိုက်စားမှုတိုက်ဖျက်ရေးဥပဒေဖြင့် တရားစွဲဆို အရေးယူနိုင်ခဲ့ကြောင်း သိရသည်။
ယင်းကဲ့သို့ အဂတိလိုက်စားမှုကျူးလွန်သူ (၃ဝ၂)ဦးထဲတွင် နိုင်ငံရေးရာထူးဖြင့် တာဝန်ထမ်းဆောင်သူ (၆၅)ဦး၊ အဆင့်မြင့်အရာရှိ (၂၁)ဦး၊ အရာထမ်း (၈ဝ)ဦး၊ အမှုထမ်း (၈၄)ဦး၊ ပြည်သူ့ဝန်ထမ်း (၁၈)ဦး နှင့် အခြားပုဂ္ဂိုလ် (၃၄) ဦးတို့ပါဝင်ကြောင်း ကော်မရှင်ထံမှ သိရသည်။
အဂတိလိုက်စားမှုတွင် ယုံကြည်စွာအပ်နှံထားသည့် လုပ်ပိုင်ခွင့်အာဏာကို အလွဲသုံးစားပြုခြင်း၊ မလျော်သြဇာသုံးစွဲ ခြင်း နှင့် နိုင်ငံတော်၏ ငွေကြေး၊ ပစ္စည်းထိခိုက်နစ်နာဆုံးရှုံးခြင်းများလည်း ပါဝင်ကြောင်း အဂတိလိုက်စားမှု တိုက်ဖျက်ရေးကော်မရှင်ဥက္ကဋ္ဌ ဦးစစ်အေးက ဆိုသည်။
“အဂတိလိုက်စားမှုသည် ကိုယ်ကျင့်တရားဖောက်ဖျက်၍ ယုံကြည်စွာအပ်နှံထားသော လုပ်ပိုင်ခွင့်အာဏာကို အလွဲသုံးစားပြုခြင်း၊ မလျော်သြဇာသုံးစွဲခြင်း၊ နိုင်ငံတော်၏ ငွေကြေး၊ ပစ္စည်း၊ ပိုင်ဆိုင်မှုတို့ကို ထိခိုက်နစ်နာ ဆုံးရှုံးခြင်းအထိ ပါဝင်ပါတယ်။ ကော်မရှင်အနေနဲ့ စုံစမ်းစစ်ဆေးအရေးယူခြင်းများ ဆောင်ရွက်သည့်အပြင် ဆုံးရှုံးနစ်နာမှုများကို ပြန်လည်ရရှိအောင် တာဝန်ယူဆောင်ရွက်ပေးရတဲ့အဖွဲ့အစည်းဖြစ်တဲ့အတွက် နိုင်ငံတော် ဘဏ္ဍာ နစ်နာဆုံးရှုံးမှု မရှိစေရေး၊ ပြည်သူတစ်ဦးချင် နစ်နာမှုမရှိစေရေး အထူးဂရုပြုဆောင်ရွက်နေပါတယ်” ဟု ဥက္ကဋ္ဌ ဦးစစ်အေးက ပြောသည်။
အဂတိလိုက်စားမှုကြောင့် တရားစွဲဆိုခဲ့သည့်အမှုများမှ ပြည်သူ့ဘဏ္ဍာအဖြစ် ပြန်လည်သိမ်းဆည်းနိုင်မှု နှင့် နိုင်ငံ့ ဘဏ္ဍာသို့ ပြန်လည်ပေးသွင်းနိုင်မှုသည် ငွေကျပ် (၂၃)ဘီလျံကျော်ရှိသည့်အပြင် အမေရိကန်ဒေါ်လာသည်လည်း (၄)သန်းကျော် ရှိကြောင်း သိရသည်။
ထို့ပြင် နိုင်ငံတော်ဘဏ္ဍာငွေ ငွေကျပ် ၁၅၅ ဒသမ ၈၅၅ ဘီလျံကျော်နှင့် ယူရို (၃)သန်းကျော် ဆုံးရှုံးမှုမရှိစေရေး အတွက်လည်း ကော်မရှင်အနေဖြင့် ကာကွယ်ပေးနိုင်ခဲ့ကြောင်း သိရသည်။
လက်ရှိ နစကအစိုးရ၏ အဂတိလိုက်စားမှုတိုက်ဖျက်ရေးကော်မရှင်အနေဖြင့် ယခင် NLD အစိုးရလက်ထက်တွင် တာဝန်ထမ်းဆောင်ခဲ့သော ဒေါ်အောင်ဆန်းစုကြည် အပါအဝင် နိုင်ငံရေးရာထူးဖြင့် တာဝန်ထမ်းဆောင်ခဲ့သူများကို အဂတိအမှုဖြင့် အရေးယူခဲ့သည့်အပြင် ယခုအစိုးရလက်ထက်၌ တာဝန်ထမ်းဆောင်ခဲ့သော ဝန်ကြီးချုပ်၊ ဝန်ကြီး အချို့ကိုလည်း အဂတိမှုဖြင့် အရေးယူထားသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
မန်းရွှေစက်တော်ဘုရား၏ ဗုဒ္ဒပူဇနိယပွဲတော်အတွက် တည်းခိုဆောင် နှင့် ဆိုင်ခန်းပေါင်း ၁၂ဝဝ ဆောက်လုပ်မည်
RELATED POSTS
23 Sep 2024 | နိုင်ငံရေး,နိုင်ငံတကာ
23 Sep 2024 | နိုင်ငံရေး,နိုင်ငံတကာ
23 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ