မလေးရှားရောက်မြန်မာနိုင်ငံသားများကို ဝင်ငွေခွန် (၂)ရာခိုင်နှုန်း စတင်ကောက်ခံမည်ဖြစ်ကြောင်း မြန်မာသံရုံး ကြေညာ
Pearl (NSS) - ဒီဇင်ဘာ ၁၇
မလေးရှားနိုင်ငံရောက် မြန်မာနိုင်ငံသားများကို ဝင်ငွေခွန် (၂)ရာခိုင်နှုန်း စတင်ကောက်ခံမည်ဖြစ်ကြောင်း မလေးရှားနိုင်ငံ၊ ကွာလာလမ်ပူမြို့ရှိ မြန်မာသံရုံးက ယနေ့ (ဒီဇင်ဘာ ၁၇ ရက်) တွင် အသိပေးကြေညာထားသည်။
စီမံကိန်းနှင့်ဘဏ္ဍာရေးဝန်ကြီးဌာနက ပြည်ပနေမြန်မာနိုင်ငံသားများ၏ ပြည်ပတွင်ရရှိသည့် လစာဝင်ငွေအပေါ် ၂ဝ၂၃ ခုနှစ်၊ အောက်တိုဘာလ ၁ ရက်မှစ၍ ဝင်ငွေခွန်ထမ်းဆောင်ရမည်ဖြစ်ကြောင်း အမိန့်ထုတ်ပြန်ထားသည်။
ထို့ကြောင့် ကွာလာလမ်ပူမြို့၊ မြန်မာသံရုံးအနေဖြင့်လည်း မြန်မာနိုင်ငံသားများ၏ နိုင်ငံကူးလက်မှတ်ကိစ္စများ အပါအဝင် ကောင်စစ်ဆိုင်ရာကိစ္စရပ်များကို ဝင်ငွေခွန်ကောက်ခံ၍ ဆောင်ရွက်ရမည်ဖြစ်သဖြင့် ဝင်ငွေခွန် စည်းကြပ်နှစ်ကာလ ၂ဝ၂၃ ခုနှစ်၊ အောက်တိုဘာလမှ ၂ဝ၂၄ ခုနှစ်၊ မတ်လအထိ ဝင်ငွေခွန်ကို (၂)ရာခိုင်နှုန်းဖြင့် စတင်ကောက်ခံမည်ဖြစ်ကြောင်း အသိပေးထုတ်ပြန်ထားသည်။
ပြည်ပနေနိုင်ငံသားများအနေဖြင့် မိမိတို့၏ လစာဝင်ငွေအပေါ် ဝင်ငွေခွန်တွက်ချက်ပေးဆောင်ခြင်းသည် နိုင်ငံသား များအတွက် ပညာရေး၊ ကျန်းမာရေး၊ လမ်းပန်းဆက်သွယ်ရေး အစရှိသည့် ပြည်သူ့အကျိုးပြုလုပ်ငန်းများအား တစ်ဖက်တစ်လမ်းမှ ကူညီထောက်ပံ့ခြင်းပင်ဖြစ်ကြောင်း သံရုံးက ဆိုသည်။
ထို့ပြင် လစာဝင်ငွေခွန် ပေးသွင်းထားသူများအနေဖြင့် မြန်မာနိုင်ငံတွင် အိမ်၊ ခြံ၊ မြေ၊ တိုက်ခန်း၊ မော်တော်ယာဉ် အစရှိသည့် အခြားပစ္စည်းများ ဝယ်ယူခြင်းအတွက် ဝင်ငွေရလမ်း စိစစ်မှုခံယူချိန်တွင် ပြည်ပနေနိုင်ငံသားများ၏ လစာဝင်ငွေခွန် ပေးသွင်းခြင်းဆိုင်ရာ အထောက်အထားလက်မှတ်အား တင်ပြ၍ လက်မှတ်ပါ ငွေပမာဏကို ဝင်ငွေရလမ်း (ငွေဖြူ) အဖြစ် ခံစားခွင့်ရှိကြောင်း သိရသည်။
မြန်မာနိုင်ငံသားအနေဖြင့် ကောင်စစ်ဝန်ဆောင်မှုကိစ္စရပ်များနှင့်ပတ်သက်၍ စုံစမ်းမေးမြန်းလိုပါက သံရုံး၏ whatsApp သို့ စာဖြင့် ဆက်သွယ်ဆောင်ရွက်နိုင်ကြောင်း မြန်မာသံရုံးက အသိပေးထုတ်ပြန်ထားသည်။
ပြီးခဲ့သောရက်ပိုင်းအတွင်း၌ စင်္ကာပူနိုင်ငံရှိ မြန်မာသံရုံး၌ ဝင်ငွေခွန်ထမ်းဆောင်သည့် မြန်မာနိုင်ငံသား အများအပြားလာရောက်ကာ ဝင်ငွေခွန်ထမ်းဆောင်မှုများရှိခဲ့ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ကုန်စည်သင်္ဘောတွေကိုတိုက်ခိုက်နေတဲ့ ဟူသီလက်နက်ကိုင်အုပ်စုတွေကိုတိုက်ခိုက်ဖို့ အမေရိကန်စစ်တပ် စဉ်းစားလာဖွယ်ရှိနေ
RELATED POSTS
21 Sep 2024 | အထွေထွေ,ပြည်တွင်း
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း