Pika (NSS) - ဒီဇင်ဘာ ၁၆

ယူကရိန်းပဋိပက္ခတိုက်ခိုက်ရေးဇုန်အတွင်း စေတနာ့ဝန်ထမ်းများ အပါအဝင် တပ်ဖွဲ့ဝင် (၅)သိန်းကျော်ကို တပ်ဖြန့် ထားကြောင်း ရုရှားသမ္မတပူတင်က ထုတ်ဖော်ပြောခဲ့သည်။

ထို့အပြင် စစ်ဘက်ဆိုင်ရာ စေတနာ့ဝန်ထမ်းများသည် နိုင်ငံတော်၏ကူညီပံ့ပိုးမှုများအစား ပြည်သူများထံမှရရှိသော ရန်ပုံငွေများအပေါ် မှီခိုနေရသည်ဆိုသည့် အစီရင်ခံစာများနှင့်ပတ်သက်ပြီး မှတ်ချက်ပေးရန်တောင်းဆိုမှုများကို ပူတင်က ပြန်လည်တုံ့ပြန်ဖြေဆိုခဲ့ကြောင်း သိရသည်။

သို့သော်လည်း ရုရှားအစိုးရမှ ပံ့ပိုးပေးသော ထောက်ပံ့ရေးပစ္စည်းများသည် အကူအညီများအားလုံး၏ (၉၉) ရာခိုင်နှုန်းရှိကြောင်း ပူတင်က အလေးပေးပြောကြားခဲ့သည်။ ထို့အပြင် ရုရှားအစိုးရ၏ စစ်သားများကို စစ်လက်နက် ပစ္စည်းအမျိုးမျိုး နှင့် ထောက်ပံ့ရေးပစ္စည်းများ ပံ့ပိုးပေးရန် ကြိုးပမ်းမှုများကို တားဆီးနိုင်မည်မဟုတ်ကြောင်းလည်း ပူတင်က မှတ်ချက်ပြုခဲ့သည်။ 

ယူကရိန်းနှင့် စစ်ပွဲတွင် ရုရှားစစ်တပ်မှာ အီလက်ထရွန်းနစ်ဆိုင်ရာ ကိရိယာများကဲ့သို့သော နည်းပညာမြင့် ဆော့ဒ်ဝဲလ်များ ချို့ယွင်းနိုင်မှုများ ရှိနိုင်သော်လည်း အဆိုပါကိစ္စများကို အချိန်နှင့်နေရာအလိုက်ကြည့်ရှုကာ လုပ်ဆောင်သွားမည်ဟု ပူတင်က ကတိပြုခဲ့ကြောင်းလည်း သိရသည်။

တိုက်ခိုက်ရေးဇုန်အတွင်းရှိသော တပ်ဖွဲ့ဝင်(၂၄၄ဝဝဝ) သည် ၂ဝ၂၂ ခုနှစ် စက်တင်ဘာလတွင် လုပ်ဆောင်ခဲ့သော ရုရှား၏ စစ်သားစုဆောင်းရေးတစ်စိတ်တစ်ပိုင်းအတွင်း ပါဝင်ခဲ့သူများဖြစ်ကြောင်း ပူတင်က ပြောကြားခဲ့သည်။ ၎င်းတို့အားလုံးကို အခြေအနေများတည်ငြိမ်စေရန်၊ နယ်မြေသစ်များကို ကာကွယ်ရန် နှင့် နောက်ထပ်ထိုးစစ်ဆင်မှု များ လုပ်ဆောင်ရန်အတွက် ဖြန့်ကျက်ချထားခဲ့ခြင်းဖြစ်ကြောင်း ပူတင် က ပြောခဲ့သည်။

အဆိုပါအချိန်တွင် ရုရှားအစိုးရသည် တပ်ဖွဲ့ဝင်သစ်(၃)သိန်းကို စုဆောင်းခဲ့ကြောင်းလည်း သိရသည်။ သို့သော် လည်း လူပေါင်း(၄၁ဝဝဝ) သည် ကျန်းမာရေးအကြောင်းပြချက် (သို့မဟုတ်) သတ်မှတ်ထားသော အသက်အရွယ်ကို ကျော်လွန်နေသောကြောင့် ထုတ်ပစ်ခဲ့ရကြောင်း ပူတင်က ပြောခဲ့သည်။ 

အာဏာပိုင်များသည် ကြီးမားသော စစ်သားစုဆောင်းရေး လုပ်ဆောင်မှုအတွင်း နောက်ထပ် စစ်သား (၄၈၆ဝဝဝ) ခန့်ကို စာရင်းသွင်းထားပြီး ၎င်းတို့မှာ စစ်မှုထမ်းရန် အဆင်သင့်ဖြစ်နေပြီဖြစ်ကြောင်း ပူတင်က မှတ်ချက်ပြု ပြောခဲ့သည်။ သို့သော်လည်း ရှေ့တန်းစစ်မြေမျက်နှာပြင်တွင် အဆိုပါစစ်သားများအနက်မှ မည်မျှကို တပ်ဖြန့်ထား ကြောင်း နှင့် လေကျင့်ရေးများ လုပ်ဆောင်နေခြင်း (သို့မဟုတ်) မည်သည့်နေရာများတွင် တပ်စွဲထားသည်ဆိုသည့် အချက်ကို ပူတင်က ထုတ်ဖော်ပြောဆိုခဲ့ခြင်းမျိုး မရှိခဲ့ကြောင်း သိရသည်။ 

ထို့အပြင် ပြီးခဲ့သည့်ဇွန်လ အစောပိုင်းတွင် စတင်ခဲ့သော ယူကရိန်း၏ တန်ပြန်ထိုးစစ်ဆင်မှုများမှာ အောင်မြင်ခဲ့ ခြင်းမျိုးမရှိခဲ့သည့်အပြင် မည်သည့်နယ်မြေကိုမှ ပြန်လည်သိမ်းယူနိုင်ခြင်းမျိုးမရှိခဲ့ကြောင်း ပူတင်က ပြောခဲ့သည်။ တန်ပြန်ထိုးစစ်ဆင်မှုများ စတင်လုပ်ဆောင်ချိန်မှစတင်ပြီး လက်ရှိအချိန်အထိ ယူကရိန်းသည် တပ်ဖွဲ့ဝင် (၁၂၅ဝဝဝ)ကျော်ကို ဆုံးရှုံးခဲ့ရကြောင်း ရုရှားကာကွယ်ရေးဝန်ကြီးဆာဂေးရှိုဂူက ယခုလအစောပိုင်းတွင် ခန့်မှန်းပြောခဲ့သည်။