Pika (NSS) - ဒီဇင်ဘာ ၁၅ 

တောင်ကိုရီးယားနိုင်ငံ၏ လေကြောင်းရန်ကာကွယ်ရေးဇုန်အတွင်းသို့ တရုတ် နှင့် ရုရှားတို့၏ တိုက်လေယာဉ်များ ဖြတ်ကျော်ဝင်ရောက်လာခဲ့ပြီးနောက် သတိပေးမှုများ လုပ်ဆောင်ရန်အတွက် တိုက်လေယာဉ်များကို ဝေဟင်သို့ စေလွှတ်ခဲ့ရကြောင်း တောင်ကိုရီးယားစစ်တပ်က ဒီဇင်ဘာလ(၁၄)ရက်တွင် ထုတ်ဖော်ပြောဆိုခဲ့သည်။

တရုတ် နှင့် ရုရှားတို့၏ တိုက်လေယာဉ်များသည်  အရှေ့ပင်လယ်ရှိ တောင်ကိုရီးယားလေကြောင်းရန် ကာကွယ်ရေး ဇုန်အတွင်းသို့ ဒီဇင်ဘာလ(၁၄)ရက် နေ့လည်(၁၁)နာရီ (၅၃)မိနစ်တွင် ဖြတ်ကျော်ဝင်ရောက်ခဲ့ပြီး (၁၂)နာရီ (၁ဝ)မိနစ်တွင် လေကြောင်းရန်ကာကွယ်ရေးဇုန်အတွင်းမှ ထွက်ခွာသွားခဲ့ကြောင်း တောင်ကိုရီးယားပူးတွဲ စစ်ဦးစီးချုပ်များရုံးက ပြောကြားခဲ့သည်။

သို့သော်လည်း တရုတ် နှင့် ရုရှားတို့၏ တိုက်လေယာဉ်များသည် ၎င်း၏လေပိုင်နက်ကို ချိုးဖောက်ဝင်ရောက်ခဲ့ခြင်း မျိုးမရှိခဲ့ကြောင်း တောင်ကိုရီးယားစစ်ဦးစီးချုပ်များရုံးက ပြောကြားခဲ့သည်။ တောင်ကိုရီးယားစစ်ဦးစီးချုပ်များရုံး က "တရုတ်နဲ့ ရုရှားတို့ရဲ့တိုက်လေယာဉ်တွေ ကျွန်တော်တို့ရဲ့လေကြောင်းရန်ကာကွယ်ရေးဇုန်အတွင်းကို ဖြတ်ကျော်ဝင်ရောက်မှုတွေ မလုပ်ဆောင်ခင်မှာ ကြိုတင်ပြင်ဆင်မှုတွေလုပ်ဆောင်ဖို့အတွက် တိုက်လေယာဉ်တွေ ကို ဝေဟင်ကို စေလွှတ်ခဲ့ပါတယ်" ဟု ပြောခဲ့သည်။

တရုတ်နိုင်ငံခြားရေးဝန်ကြီးဌာနပြောရေးဆိုခွင့်ရှိသူ မာအိုနင်သည် ဒီဇင်ဘာလ(၁၄)ရက်က ဖြစ်ပွားခဲ့သော အဖြစ် အပျက်ကို ပုံမှန်လေကြောင်း လှုပ်ရှားမှုတစ်ခုအဖြစ်  ဖော်ပြပြောဆိုခဲ့ကြောင်းလည်း သိရသည်။ 

မာအိုနင် က "ဒါဟာ နိုင်ငံတကာရေပိုင်နက်အတွင်းမှာ တရုတ်တိုက်လေယာဉ်တွေရဲ့ လုပ်ရိုးလုပ်စဉ်အတိုင်း ပျံသန်းတဲ့လှုပ်ရှားမှုတစ်ခုလို့ ကျွန်မထင်ပါတယ်။ ဒါက နိုင်ငံတကာဥပဒေနဲ့အညီ လုပ်ဆောင်တဲ့ လှုပ်ရှားမှုတစ်ခုပါ" ဟု ပြောခဲ့သည်။ 

တရုတ် နှင့် ရုရှားတို့သည် မြောက်ကိုရီးယားနိုင်ငံ၏ မိတ်ဖက်နိုင်ငံများဖြစ်ပြီး မြောက်ကိုရီးယားနှင့် ရုရှားနိုင်ငံကြား စစ်ရေးအရ ဆက်ဆံမှုများမှာ ပိုမိုကြီးထွားလာပြီး အန္တရာယ်ရှိကြောင်း အမေရိကန်အစိုးရက ပြီးခဲ့သည့်လတွင် သတိပေးပြောခဲ့သည်။