နိုင်ငံကူးလက်မှတ်အသစ်ပြုလုပ်ပြီးသော ထိုင်းရောက်မြန်မာလုပ်သားများ ဇန်နဝါရီလမှစ၍ ဝင်ငွေခွန်ပေးဆောင်နိုင်မည်
Pearl (NSS) - ဒီဇင်ဘာ ၁၄
နိုင်ငံကူးလက်မှတ်အသစ်ပြုလုပ်ပြီးသော ထိုင်းရောက်မြန်မာလုပ်သားများအနေဖြင့် ဇန်နဝါရီလ (၁)ရက်မှစ၍ ဝင်ငွေခွန် ပေးဆောင်နိုင်မည်ဖြစ်ကြောင်း ထိုင်းနိုင်ငံ၊ ဘန်ကောက်မြို့ရှိ မြန်မာသံရုံးက ယမန်နေ့ (ဒီဇင်ဘာလ ၁၃ ရက်) တွင် အသိပေးထုတ်ပြန်ထားသည်။
စီမံကိန်း နှင့် ဘဏ္ဍာရေးဝန်ကြီးဌာနမှ “ပြည်ပနေမြန်မာနိုင်ငံသားများ၏ ပြည်ပတွင်ရရှိသည့် လစာဝင်ငွေအပေါ် ၂၀၂၃ ခုနှစ်၊ အောက်တိုဘာလ ၁ ရက်မှစ၍ ဝင်ငွေခွန်ထမ်းဆောင်ရမည်ဖြစ် ကြောင်း ပြီးခဲ့သည့်ရက်ပိုင်းအတွင်းက ထုတ်ပြန်ခဲ့သည်။
အဆိုပါထုတ်ပြန်ချက်အရ ထိုင်းနိုင်ငံ၌ အလုပ်လုပ်ကိုင်နေသော မြန်မာနိုင်ငံသားများအနက် စက်ရုံ/ အလုပ်ရုံ၊ စိုက်ပျိုး/ မွေးမြူ ရေး၊ ဆောက်လုပ်ရေး၊ ဝန်ဆောင်မှုလုပ်ငန်း၊ အထွေထွေလုပ် သားစသည့် Blue Collar များ၏ လစဉ်ဝင်ငွေကို ၇၅၀၀ ဘတ်နှုန်းသတ်မှတ်ပြီး ဝင်ငွေခွန် ၂ ရာခိုင်နှုန်းအရ ၁၅၀ ဘတ် လစဉ်ပေးသွင်းရမည်ဖြစ်ကြောင်း မြန်မာသံရုံးက ဆိုထားသည်။
ထိုသို့ပေးသွင်းခြင်းဖြင့် လစဉ် ၇၅၀၀ ဘတ်နှင့် ညီမျှသော မြန်မာကျပ်ငွေကို ငွေဖြူအဖြစ် ခံစားခွင့်ရရှိကာ မြန်မာနိုင်ငံ ပြန်ရောက်ချိန်၌ အိမ်၊ ခြံ၊ မြေ၊ တိုက်ခန်း၊ မော်တော်ယာဉ် စသည်တို့ကို ဝယ်ယူရာတွင် စုဆောင်းထားသော ငွေဖြူစာရင်း အပေါ် တွက်ချက်၍ ဝင်ငွေခွန်လျော့ပေါ့ပေးခြင်းကို ခံစားခွင့် ရရှိမည် ဖြစ်ကြောင်း သိရသည်။
လက်ရှိတွင် မြန်မာသံရုံး (ဘန်ကောက်)၌ ပြီးခဲ့သည့် ဒီဇင်ဘာလ (၁၂) ရက်မှစ၍ တပ်ဆင်ထားသောစက်များအား စမ်းသပ်ဆဲကာလဖြစ်သဖြင့် နိုင်ငံကူးလက်မှတ်လာရောက်လုပ်ကိုင်သူများကိုသာ ဦးစားပေးဆောင်ရွက်လျက်ရှိပြီး ယခင်ကာလများ၌ နိုင်ငံကူးလက်မှတ်အသစ် ပြုလုပ်ထားသူများအနေဖြင့် လာမည့် ဇန်နဝါရီလ (၁)ရက်မှစ၍ မြန်မာသံရုံးသို့ လာရောက်ပြုလုပ်နိုင်ကြောင်း သံရုံးက အသိပေးထားသည်။
အခွန်ထမ်းဆောင်ရာတွင် တစ်ဦးလျှင် ၂၀၂၃ ခုနှစ်၊ အောက်တို ဘာလမှ ဒီဇင်ဘာလအထိ တစ်လလျှင် ၁၅၀ ဘတ်နှုန်းဖြင့် ၃ လစာ၊ ၄၅၀ ဘတ်အား အခွန်ပေးသွင်းရမည်ဖြစ်ပြီး နောက်ပိုင်းကာလများ၌ လစဉ် (သို့မဟုတ်) ၃ လတစ်ကြိမ် (သို့မဟုတ်) ၆ လတစ်ကြိမ် (သို့မဟုတ်) ၉ လတစ်ကြိမ် ပေးသွင်းနိုင်ကြောင်း သိရသည်။
ထို့ပြင် ထိုင်းနိုင်ငံ၏ ကုမ္ပဏီများ (ရေကြောင်းကုမ္ပဏီအပါအ ဝင်) ဆေးရုံများ၊ တက္ကသိုလ်/ ကောလိပ်များ၊ ဆောက်လုပ်ရေး အင်ဂျင်နီယာများ၊ စက်ရုံ/ အလုပ်ရုံအင်ဂျင်နီယာများ စသည့် White Collar များ၏ ဝင်ငွေခွန်ကောက်ခံရာတွင် လစာဝင်ငွေအပေါ် ၂ ရာခိုင်နှုန်း အခွန်တွက်ချက်ထားသော်လည်း ထိုင်းနိုင်ငံတွင် အခွန်ဆောင်ထားခြင်းရှိပါက ၂ ရာခိုင်နှုန်း အခွန်တွက် ချက်ရငွေမှနုတ်၍ ကျန်ငွေကို ပေးသွင်းရမည်ဖြစ်ကြောင်း သိရသည်။
White Collar အခွန်ထမ်းများသည် မြန်မာသံရုံးသို့ အခွန်လာရောက်ထမ်းဆောင်ချိန်တွင် သက်ဆိုင်ရာကုမ္ပဏီ/ ဌာန၏ Pay Slip၊ (သို့မဟုတ်) Salary Certificate နှင့် Tax Slip များကို ယူဆောင်လာရမည်ဖြစ်ကြောင်း သိရသည်။
အခွန်ထမ်းဆောင်သူများအား QR Code အမှတ်အသားပါရှိသည့် “အခွန်ပေးသွင်းမှုအထောက်အထားလက်မှတ်”ကို ပြန်လည်ပေးမည်ဖြစ်၍ ပျောက်ဆုံး/ ပျက်စီးခြင်းမရှိရန် ကာယကံရှင်မှ ထိန်းသိမ်းထားရမည်ဖြစ်ပြီး မြန်မာနိုင်ငံသို့ရောက်ရှိချိန်၌ ငွေဖြူအား ဝင်ငွေခွန်အတွက် အသုံးပြုလိုပါက အဆိုပါလက်မှတ်အား ပြသရမည်ဖြစ်ကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ဟားမက်စ်အဖွဲ့ရဲ့ ဖမ်းဆီးခြင်းခံထားရတဲ့အမေရိကန်နိုင်ငံသားများ အမြန်ဆုံးပြန်လွှတ်မြောက်ဖို့ လုပ်ဆောင်လို့ရသမျှ အကုန်လုပ်ဆောင်မယ်လို့ အမေရိကန်သမ္မတ ကတိပြု
RELATED POSTS
21 Sep 2024 | အထွေထွေ,ပြည်တွင်း
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း