Pika (NSS) - ဒီဇင်ဘာ ၁၂ 

အနောက်အုပ်စုနိုင်ငံများ၏ တာဝန်ရှိသူများသည် ယူကရိန်းသမ္မတဇီလန်စကီးကို အာဏာမှဖယ်ရှားရန် အလားအလာများကို ဆွေးနွေးနေကြောင်း ရုရှား၏ နိုင်ငံခြားရေးထောက်လှမ်းရေးဝန်ဆောင်မှုဌာန(SVR) အကြီးအကဲ Sergey Naryshkin က ဒီဇင်ဘာလ(၁၁)ရက်တွင် ထုတ်ပြန်ခဲ့သည်။

ထို့အပြင် ယူကရိန်းသမ္မတဇီလန်စကီးကို အာဏာမှဖယ်ရှားချင်သည့် အကြောင်းအရင်းများစွာရှိကြောင်း နှင့် အဓိကအထင်ရှားဆုံးအကြောင်းအရင်းမှာ အနောက်အုပ်စုနိုင်ငံများ၏ အကျိုးစီးပွားများကို ထိခိုက်မှုများရှိလာ စေခြင်းကြောင့်ဖြစ်နိုင်ကြောင်း Sergey Naryshkin က ပြောခဲ့သည်။

Sergey Naryshkin က "ယူကရိန်းစစ်ပွဲအခြေအနေတွေဟာ ပြောင်းလဲမှုတွေ အများကြီးရှိလာတဲ့အတွက် ပဋိပက္ခ ရပ်တန့်မယ့်အလားအလာတွေ မကြာမီဖြစ်လာနိုင်ဖွယ်ရှိနေတယ်" ဟု ပြောခဲ့သည်။

ရုရှားနှင့်ဆက်လက်ဖြစ်ပွားနေသော စစ်ပွဲတွင် ယူကရိန်းသမ္မတဇီလန်စကီးသည် ၎င်း၏ ကတိဝတ်များ အတိုင်း လုပ်ဆောင်နိုင်ခဲ့ခြင်းမျိုးမရှိခဲ့ခြင်းကြောင့် အနောက်အုပ်စုနိုင်ငံများက ၎င်းကို အာဏာမှဖယ်ရှားပစ်ရန် စဉ်းစားခဲ့ခြင်းဖြစ်နိုင်ဖွယ်ရှိကြောင်း Sergey Naryshkin က ပြောခဲ့သည်။ 

ယူကရိန်းတွင် ကျယ်ကျယ်ပြန့်ပြန့်ဖြစ်ပွားနေသော အကျင့်ပျက်ခြစားမှုများနှင့် နိုင်ငံရပ်ခြားမှ ထောက်ခံသူများနှင့် ပြောဆိုဆက်ဆံရာတွင် ဇီလန်စကီး၏ မလေးစားမှုတို့ကြောင့်လည်း ဖြစ်နိုင်ဖွယ်ရှိကြောင်း Sergey Naryshkin က ပြောခဲ့သည်။ 

ရုရှားနိုင်ငံတွင် သမ္မတပူတင်အာဏာဆက်ယူထားသရွေ့ ဆွေးနွေးပွဲများ လုပ်ဆောင်မည်မဟုတ်ဟုဆိုသည့် အမိန့်စာကို ဇီလန်စကီးက ပြီးခဲ့သည့်နှစ်တွင် လက်မှတ်ရေးထိုးခဲ့ကြောင်းလည်း သိရသည်။ ပြီးခဲ့သည့် နိုဝင်ဘာလ က ဘရပ်ဆဲလ်မြို့တွင် ကျင်းပခဲ့သည့် နေတိုးအဖွဲ့နိုင်ငံခြားရေးဝန်ကြီးများ အစည်းအဝေး အနားယူချိန်အတွင်း ဇီလန်စကီး၏ နေရာအတွက် အခြားရွေးချယ်စရာများကို ဆွေးနွေးခဲ့ကြကြောင်း Sergey Naryshkin က အခိုင်အမာပြောခဲ့သည်။

ထို့အပြင် ဖြစ်နိုင်ခြေရှိသော ရွေးချယ်မှုများထဲတွင် ယူကရိန်းလက်နက်ကိုင်တပ်ဖွဲ့များ၏ စစ်ဦးစီးချုပ် Valery Zaluzhny၊ စစ်ဘက်ထောက်လှမ်းရေးအကြီးအကဲ Kirill Budanov၊ ယူကရိန်းသမ္မတရုံးအကြီးအကဲ Andrey Ermak (သို့မဟုတ်) ကိဗ်ယက်မြို့တော်ဝန် ဗစ်တာလီကလစ်စကိုပင် ပါဝင်ကြောင်း သိရသည်။ ယူကရိန်းသည် တန်ပြန်ထိုးစစ်ဆင်မှုများကို ရှုံးနိမ့်ခဲ့မှုနှင့်အတူ ရုရှားတပ်ဖွဲ့များသည် ရှေ့တန်းစစ်မြေပြင်တစ်လျှောက်တွင် ထိုးစစ်ဆင်မှုများကို ဆက်တိုက်လုပ်ဆောင်နေကြောင်း ယူကရိန်းဗိုလ်မှူးကြီး Aleksandr Syrsky က ပြောကြားခဲ့ သည်။