Pika (NSS) - ဒီဇင်ဘာ ၁၁

ယူကရိန်းတပ်ဖွဲ့များသည် ဒီဇင်ဘာလ(၁၁)ရက် နံနက်ပိုင်းတွင် ကိဗ်ယက်မြို့ကို ပစ်မှတ်ထားတိုက်ခိုက်သော ရုရှား၏ ဒုံးကျည်(၈)စင်းကို ပစ်ချခဲ့ကြောင်း ယူကရိန်းလေတပ်က ပြောကြားခဲ့သည်။

ယူကရိန်းလေတပ်က "ဒီဇင်ဘာလ(၁၁)ရက် နံနက်(၄)နာရီအချိန်မှာ ရုရှားတပ်ဖွဲ့တွေဟာ ကိဗ်ယက်မြို့ကို ဒုံးကျည်တွေနဲ့ ပစ်ခတ်တိုက်ခိုက်ခဲ့ပါတယ်။ ပြီးတော့ ယူကရိန်းရဲ့လေကြောင်းရန်ကာကွယ်ရေးစနစ်တွေဟာ ကိဗ်ယက်မြို့ကို ဦးတည်ပျံသန်းလာတဲ့ ဒုံးကျည်(၈)စင်းကို ပစ်ချဖျက်ဆီးနိုင်ခဲ့ပါတယ်" ဟု ပြောခဲ့သည်။

ယူကရိန်းလေကြောင်းရန်ကာကွယ်ရေးစနစ်များသည် ရုရှားဖက်က ပစ်လွှတ်လိုက်သောဒုံးကျည်များကို ဖျက်ဆီး နိုင်ခဲ့သော်လည်း ဒုံးကျည်အစိတ်အပိုင်းများသည် Darnytskyi ခရိုင်သို့ ကျရောက်ခဲ့ခြင်းကြောင့် အနည်းဆုံး လူ(၄)ဦး ထိခိုက်ဒဏ်ရာရရှိခဲ့ကြောင်း ယူကရိန်းစစ်တပ်က ပြောကြားခဲ့သည်။ 

ကိဗ်ယက်မြို့တော်ဝန်ဗစ်တာလီကလစ်စကို က "အခင်းဖြစ်ပွားရာနေရာမှာ ကူညီပံ့ပိုးမှုတွေ လုပ်ဆောင်ဖို့ ဆေးဘက်ဆိုင်ရာအကူအညီတွေ စေလွှတ်ထားပါတယ်။ ပြီးတော့ Darnytskyi ခရိုင်မှာရှိတဲ့ ဂိုဒေါင်တစ်ခုရဲ့ ခြံဝန်း အတွင်းမှာ ကျရောက်နေတဲ့ ဒုံးကျည်အစိတ်အပိုင်းတစ်ခုကိုလည်း တွေ့ခဲ့ပါတယ်။ ဒါပေမယ့် မီးလောင်တာမျိုးနဲ့ အဆောက်အဦး ထိခိုက်ပျက်စီးတာမျိုးတော့ မရှိပါဘူး" ဟု ပြောခဲ့သည်။

ရုရှားနိုင်ငံသည် ပြီးခဲ့သည့်နှစ်တွင် ၎င်းတို့လုပ်ဆောင်ခဲ့သည့်အတိုင်း ဆောင်းရာသီအလယ်ပိုင်းတွင် ယူကရိန်း၏ စွမ်းအင်အခြေခံအဆောက်အဦးများကို ဒုံးကျည်များဖြင့် ပစ်ခတ်တိုက်ခိုက်ရန် ပြင်ဆင်နေကြောင်း ယူကရိန်းအာဏာပိုင်များက စွပ်စွဲပြောဆိုခဲ့သည်။ ၂ဝ၂၂ ခုနှစ် ဆောင်းရာသီကာလအတွင်း ရုရှားသည် ယူကရိန်း၏ စွမ်းအင်အခြေခံအဆောက်အဦးများကို ဒုံးကျည်များဖြင့် ပစ်ခတ်တိုက်ခိုက်ခဲ့ခြင်းကြောင့် ယူကရိန်းပြည်သူသန်းချီ အချိန်အတော်ကြာ လျှပ်စစ်မီးပြတ်တောက်မှုများကို ကြုံတွေ့ခဲ့ရကြောင်း သိရသည်။

ယူကရိန်းသည် အမေရိကန်နှင့်ဥရောပရှိ မိတ်ဖက်နိုင်ငံများထံမှ စစ်လက်နက်ပစ္စည်းများဖြင့် ၎င်း၏ လေကြောင်း ရန်ကာကွယ်ရေးစနစ်များကို ပိုမိုအားကောင်းလာအောင်လုပ်ဆောင်ခဲ့သော်လည်း အားနည်းသောဒေသများကို ကာကွယ်ရန်အတွက် နောက်ထပ်စစ်လက်နက်ပစ္စည်းများကို ပိုမိုလိုအပ်နေပြီဖြစ်ကြောင်း ပြောခဲ့သည်။