Pika(NSS) - ဒီဇင်ဘာ ၁ဝ 

အမေရိကန်နိုင်ငံ တန်နက်စီပြည်နယ် အလယ်ပိုင်းတွင် ဒီဇင်ဘာလ(၉)ရက်က လေဆင်နှာမောင်း အများအပြား ဝင်ရောက်တိုက်ခိုက်မှုများ အပါအဝင် ပြင်းထန်သော ရာသီဥတုကြောင့် အနည်းဆုံးလူ(၆)ဦး သေဆုံးခဲ့ကြောင်း သိရသည်။

လေဆင်နှာမောင်းတိုက်ခတ်မှုများကြောင့် ကန်တက်ကီပြည်နယ်နယ်စပ်အနီးတွင် ရှိသော Nashville မြို့ အနောက်မြောက်ဘက်ရှိ  Clarksville မြို့တွင် လူ(၃)ဦးသေဆုံးခဲ့ပြီး အခြားလူ(၂)ဒါဇင်နီးပါးကို ဆေးရုံသို့ ပို့ဆောင်ခဲ့ရကြောင်း တာဝန်ရှိသူများက ပြောကြားခဲ့သည်။

Montgomery ကောင်တီမြို့တော်ဝန်ဝက်စ်ဂိုးလ်ဒန်းက "ဒီနေ့ဟာ ကျွန်တော်တို့အသိုင်းအဝိုင်းအတွက် စိတ်မကောင်းစရာနေ့တစ်နေ့ပါပဲ။ ဒီဖြစ်ရပ်အတွင်း နေအိမ်ဆုံးရှုံးသွားသူတွေ၊ ချစ်ခင်ရသူတွေကို ဆုံးရှုံးခဲ့ရတဲ့ လူတွေနဲ့ ထိခိုက်ဒဏ်ရာရရှိသူတွေအတွက် ကျွန်တော်တို့ ဆုတောင်းပေးနေပါတယ်။ ကျွန်တော်တို့ အဆုံးအထိ သူတို့နဲ့ ရှိနေပေးမှာပါ" ဟု ပြောခဲ့သည်။

အဆိုပါ မုန်တိုင်းဒဏ် ခံခဲ့ရသူများအတွက် Montgomery ကောင်တီရှိ အထက်တန်းကျောင်းကို သဘာဝ ဘေးအန္တရာယ်ကယ်ဆယ်ရေးစင်တာနှင့် ယာယီကယ်ဆယ်ရေးစခန်းအဖြစ် လုပ်ဆောင်ထားကြောင်း ဝက်စ်ဂိုးလ်ဒန်း က ပြောကြားခဲ့သည်။

လေဆင်နှာမောင်းတိုက်ခတ်မှုများအတွင်း Nashville မြို့ရှိ Nesbitt Lane ဧရိယာတွင် အခြားလူ(၃)ဦး သေဆုံးခဲ့ကြောင်း Nashville မြို့အရေးပေါ်ဝန်ဆောင်မှုဌာနများက ပြောကြားခဲ့သည်။ Nashville မြို့အရေးပေါ် စီမံခန့်ခွဲရေးအေဂျင်စီသည် လေဆင်နှာမောင်းတိုက်ခတ်မှုအတွင်း ပျက်စီးသွားသော နေအိမ်များ၏ ဓါတ်ပုံကို ဆိုရှယ်မီဒီယာပေါ်တွင် တင်ခဲ့ကြောင်း သိရသည်။

Clarksville မြို့တွင် လေဆင်နှာမောင်း အနည်းဆုံးတစ်ခု ဝင်ရောက်တိုက်ခတ်ခဲ့ကြောင်း အမျိုးသား မိုးလေဝသဌာနက ပြောကြားခဲ့သည်။ ထို့အပြင် Nashville မြို့အနီးတွင် တိုက်ခတ်ခဲ့သည့် လေဆင်နှာမောင်း အပါအဝင် အခြားလေဆင်နှာမောင်းများ တိုက်ခတ်မှုများနှင့်ပတ်သက်သည့် အစီရင်ခံစာများလည်း ထွက်ပေါ်လာခဲ့ကြောင်း သိရသည်။

အမျိုးသားမိုးလေဝသဌာနသည် တန်နက်စီပြည်နယ် Springfield မြို့အနီးတွင် တိုက်ခတ်ခဲ့သည့် လေဆင် နှာမောင်းကို ရိုက်ကူးထားသော ဗီဒီယိုဖိုင်ကို အွန်လိုင်းပေါ်တွင် တင်ခဲ့ကြောင်းလည်း သိရသည်။ Clarksvilleမြို့ မြို့တော်ဝန်ဂျိုးပစ်တ်က "ဒါဟာ ဝမ်းနည်းစရာကောင်းတဲ့သတင်းတစ်ခုဖြစ်ပြီး ချစ်ခင်ရသူတွေကို ဆုံးရှုံးခဲ့ရတဲ့သူ တွေအတွက် တကယ်ကို စိတ်မကောင်းဖြစ်မိပါတယ်။ မုန်တိုင်းဒဏ်ခံခဲ့ရတဲ့သူတွေအားလုံးကို ကူညီဖို့အတွက် ကျွန်တော်တို့ ဆက်လက်လုပ်ဆောင်သွားမှာပါ" ဟု ပြောခဲ့သည်။