Pearl (NSS) - ဒီဇင်ဘာ ၁ဝ

KNPP၊ PDF ပူးပေါင်းအဖွဲ့က ဖမ်းဆီးထိမ်းသိမ်းထားသော လွိုင်ကော်တက္ကသိုလ်ပါမောက္ခချုပ် အပါအဝင် (၈) ဦး နှင့် အဆက်အသွယ်ပြတ်တောက်နေသည့်အတွက် မိသားစုဝင်များ စိုးရိမ်နေကြောင်း သိရသည်။

KNPP၊ PDF ပူးပေါင်းအဖွဲ့သည် ၄င်းတို့ ဖမ်းဆီးထိမ်းသိမ်းထားသူ (၂ဝ၄) ဦးအနက် (၁ဝ၇) ဦးကို ပြီးခဲ့သည့် နိုဝင်ဘာလ ၂၄ ရက်တွင်လည်ကောင်း၊ (၈၆) ဦး ကို နိုဝင်ဘာလ ၂၈ ရက် တွင်လည်းကောင်း၊ စုစုပေါင်း (၁၉၃) ဦး ကို ပြန်လွှတ်ပေးခဲ့ပြီဖြစ်ကြောင်း ထုတ်ပြန်ခဲ့သည်။

ထို့ပြင် ပြီးခဲ့သည့်ရက်ပိုင်းက လွိုင်ကော်တက္ကသိုလ်  ပါမောက္ခချုပ် အပါအဝင် (၈) ဦးကို KNPP၊ PDF ပူးပေါင်းအဖွဲ့ က ဒီဇင်ဘာ ၅ ရက်တွင် ဒဏ်ငွေ ၁၇ သိန်းကျပ်ဖြင့် အရေးယူခဲ့ပြီး၊  နေရပ်ပြန်ခွင့် ပေးလိုက်ပြီဖြစ်ကြောင်း သတင်းဌာနအချို့တွင် ရေးသားဖော်ပြထားသည်ကိုလည်း တွေ့ရသည်။

သို့သော် လွိုင်ကော်တက္ကသိုလ်မှ ဖမ်းဆီးထားသည့် ဆရာ၊ ဆရာမ၊ ဝန်ထမ်း (၁၉၃)ဦးအား ပြန်လွှတ်ပေးခဲ့သည့် အခြေအနေနှင့်ပတ်သက်၍  ကရင်နီပြည်ကြားကာလအုပ်ချုပ်ရေးကောင်စီ(IEC) က ထုတ်ပြန်ပေးခဲ့သော်လည်း ပါမောက္ခချုပ် အပါအဝင် (၈) ဦးနှင့်ပတ်သက်ပြီး တစ်စုံတစ်ရာ သတင်းထုတ်ပြန်ချက်မျိုးမရှိပေ။ 

လက်ရှိတွင် ပါမောက္ခချုပ် အပါအဝင် (၈) ဦးသည် ယနေ့(ဒီဇင်ဘာလ ၁ဝ ရက်) အထိ မိသားစုနှင့် အဆက် အသွယ်ပြတ်တောက်နေသည့်အတွက် စိုးရိမ်ပူပန်နေကြောင်းလည်း  မိသားစုဝင်တစ်ဦးက NP News  ကို ပြော သည်။ 

"လွှတ်လိုက်ပြီလို့ သတင်းကြားလိုက်တဲ့အတွက် စုံစမ်းတော့ မ‌ရောက်လာဘူး။ တောင်ကြီးမှာလည်း မဟုတ်ဘူးလို့ သိရတယ်။ စစ်တပ်ဘက်ကိုလည်း မရောက်လာဘူးလို့ ပြောတယ်။ ကြားမှာ လူတွေက ပျောက်နေ တာထင်တယ်။ ဖုန်းတွေခေါ်တော့လည်း စက်ပိတ်ထားပါတယ်ပဲပြောတယ်။ အရမ်းစိတ်ပူနေရတယ်" ဟု မိသားစု ဝင်တစ်ဦးက NP News ကို ပြောသည်။

KNPP၊ PDF ပူးပေါင်းအဖွဲ့သည် ပြီးခဲ့သော နိုဝင်ဘာလ ၁၁ ရက်တွင် ကယားပြည်နယ်၊ လွိုင်ကော်မြို့နှင့် တစ်ဝိုက်ရှိ လုံခြုံရေးစခန်းများကို (၁၁.၁၁ စစ်ဆင်ရေး) အမည်ဖြင့် ဝင်ရောက်တိုက်ခိုက်စဉ်အချိန်တွင် လွိုင်ကော်တက္ကသိုလ် ၏ ပါမောက္ခချုပ်ဒေါက်တာ အောင်ခင်မြင့် အပါအဝင် ဆရာ/ဆရာမ၊ ဝန်ထမ်းစုစုပေါင်း (၂ဝ၄) ဦးကို ဖမ်းဆီးခေါ်ဆောင်သွားခဲ့ခြင်းဖြစ်သည်။