KNPP ပူးပေါင်းအဖွဲ့ မြို့သိမ်းတိုက်ပွဲဖော်ဆောင်နေသည့် လွိုင်ကော်မြို့ရှိ သီရိမင်္ဂလာဈေး(တောင်ဈေး) မီးရှို့ ဖျက်ဆီးခံခဲ့ရ
မြူနစ် (NSS) - ဒီဇင်ဘာ ၁ဝ
ကယားလက်နက်ကိုင် KNPP ပူးပေါင်းအဖွဲ့မှ မြို့သိမ်းတိုက်ပွဲဖော်ဆောင်နေသည့် လွိုင်ကော်မြို့ရှိ သီရိမင်္ဂလာဈေး (တောင်ဈေး) သည် မီးရှို့ဖျက်ဆီးခံခဲ့ရကြောင်း သိရသည်။
ကယားပြည်နယ်၊ လွိုင်ကော်မြို့ရှိ သီရိမင်္ဂလာဈေး(တောင်ဈေး) သည် ယမန်နေ့(ဒီဇင်ဘာ ၉ ရက်) ညပိုင်းတွင် မီးရှို့ဖျက်ဆီးခံခဲ့ရခြင်းဖြစ်ကြောင်း လွိုင်ကော်မြို့ခံတစ်ဦးက NP News ကို ပြောသည်။
“လွိုင်ကော်တောင်ဈေး မီးလောင်သွားတာ ဟုတ်တယ်။ တော်တော်လေး လောင်သွားတယ်။ သူတို့ (လက်နက်ကိုင်ပူးပေါင်းအဖွဲ့) ရှို့တာပဲလေ ထုံးစံအတိုင်းပေါ့။ ရှို့မီးပါ။ လက်နက်ကြီးကျတိုင်း မီးလောင်နေမယ်ဆိုရင် တစ်မြို့လုံး ကုန်နေပြီပေါ့” ဟု လွိုင်ကော်မြို့ခံက ပြောသည်။
လွိုင်ကော်မြို့ရှိ သီရိမင်္ဂလာဈေး(တောင်ဈေး)ကို လက်နက်ကိုင်ပူးပေါင်းအဖွဲ့က မီးရှို့ဖျက်ဆီးခဲ့ခြင်းဖြစ်သည်ဟု မြို့ခံအချို့ ပြောဆိုထားသော်လည်း NP News အနေဖြင့် သီးခြားအတည်ပြုနိုင်ခြင်းမရှိသေးပေ။
အဆိုပါဈေးသည် ယမန်နေ့ ညပိုင်းမှစတင်ကာ မီးလောင်နေခြင်းဖြစ်ပြီး ယနေ့(ဒီဇင်ဘာ ၁ဝ ရက်) အထိ ဈေးအတွင်း၌ ဆက်လက်မီးလောင်နေလျက်ရှိကြောင်း သိရသည်။
ပြီးခဲ့သောရက်ပိုင်းအတွင်း၌ KNPP၊ PDF ပူးပေါင်းလက်နက်ကိုင်အဖွဲ့သည် သီရိမင်္ဂလာဈေး(တောင်ဈေး)ရှိ ဒေသခံ ပြည်သူများကို ဈေးအတွင်းမှ ထွက်ခွာသွားရန် သတိပေးပြောဆိုမှုများရှိခဲ့ကြောင်း လွိုင်ကော်မြို့ခံများက ဆိုသည်။
အကြမ်းဖက်သောင်းကျန်းသူများသည် သီရိမင်္ဂလာဈေးအား Drop ဗုံးများဖြင့် ပစ်ချတိုက်ခိုက်မှုကြောင့် ဈေးတစ်ခုလုံး မီး လောင်ခဲ့ခြင်းဖြစ်ကြောင်း နစကသတင်းထုတ်ပြန်ရေးအဖွဲ့က ယနေ့ ညနေပိုင်းတွင် အသိပေးထုတ်ပြန်ထားသည်။
KNPP၊ PDF ပူးပေါင်းအဖွဲ့သည် ယမန်နေ့တွင်လည်း လွိုင်ကော်မြို့ရှိ ပြည်နယ်ရဲတပ်ဖွဲ့ရုံးကို အင်အားအလုံးအရင်းဖြင့် ဝင်ရောက်တိုက်ခိုက်ခဲ့ကြောင်း သိရသည်။
“မနေ့ကတော့ ပြည်နယ်ရဲရုံး ပေးလိုက်ရတယ်။ အရပ်ဝတ်ယောင်ဆောင်ပြီးတော့မှ သူတို့တွေ ကပ်ပြီး တိုက်သွား တာပေါ့။ ရဲရုံးထဲကို ဝင်ပြီးတော့ ပြန်ဆုတ်သွားတယ်။ လွိုင်ကော်တက္ကသိုလ်ဘက်ကို ပြန်ဆုတ်သွားတယ်။ သူတို့ ဘက်ကလည်း အကျအဆုံးတော်တော်များတယ်” ဟု လွိုင်ကော်မြို့ခံတစ်ဦးက ပြောသည်။
KNPP၊ PDF ပူးပေါင်းအဖွဲ့သည် ပြီးခဲ့သော နိုဝင်ဘာ ၁၁ ရက်မှစတင်ကာ (၁၁.၁၁ စစ်ဆင်ရေး) အမည်ဖြင့် လွိုင်ကော်မြို့အား မြို့သိမ်းတိုက်ပွဲဖော်ဆောင်ခဲ့သည်။
ထိုသို့တိုက်ပွဲဖော်ဆောင်မှုသည် တစ်လနီးပါးကြာမြင့်လာခဲ့ပြီး လက်ရှိတွင် လွိုင်ကော်မြို့ပေါ်၌ အရပ်သား အဆောက်အအုံ၊ ဌာနဆိုင်ရာအဆောက်အအုံများမှာ ပျက်စီးဆုံးရှုံးများ ဖြစ်ပေါ်နေလျက်ရှိသည်။
တိုက်ပွဲများကြောင့် လွိုင်ကော်မြို့အား ပြန်လည်ထူထောင်ရေးလုပ်ငန်းများ ဆောင်ရွက်ရန် ခက်ခဲသွားပြီဖြစ်ကြောင်း နစကဥက္ကဋ္ဌဗိုလ်ချုပ်မှူးကြီးမင်းအောင်လှိုင်က ပြီးခဲ့သောရက်ပိုင်းအတွင်း၌ ပြောဆိုခဲ့ဖူးသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
တောင်တရုတ်ပင်လယ်အတွင်း တရုတ်နိုင်ငံရဲ့ရန်စတဲ့လုပ်ရပ်တွေကို ရပ်တန့်စေလိုကြောင်း ဖိလစ်ပိုင်အစိုးရ ဝေဖန်
RELATED POSTS
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,နိုင်ငံတကာ
22 Sep 2024 | နိုင်ငံရေး,ပြည်တွင်း