ဂျန်ဇက် (NSS) - ဒီဇင်ဘာ ၉

ရုရှားသမ္မတပူတင်က လာမယ့် သမ္မတရွေးကောက်ပွဲမှာတစ်ကျော့ပြန် ပါဝင်ယှဉ်ပြိုင်သွားမှာဖြစ်ကြောင်း သတင်းထုတ်ပြန်လိုက်ပါတယ်။

သမ္မတပူတင်ဟာ ရွေးကောက်ပွဲမှာအနိုင်ရရှိခဲ့ပါက ရုရှားနိုင်ငံသမ္မတအဖြစ် ငါးနှစ်သက်တမ်း တာဝန်ယူခွင့်ရရှိသူဖြစ်လာမှာဖြစ်ပါတယ်။ ရုရှား သမ္မတရွေးကောက်ပွဲကို လာမယ့် မတ်လ ၁၅ ရက်ကနေ မတ်လ ၁၇ ရက်အတွင်း ကျင်းပမှာဖြစ်ပြီး သမ္မတအဖြစ် ရွေး ကောက်ခံရသူဟာ လာမယ့်မေလအစောပိုင်းမှာ ကျမ်းသစ္စာကျိန်ဆိုသွားမှာဖြစ်ပါတယ်။

ရုရှားသမ္မတပူတင်က "ကျွန်တော်ဟာ လာမယ့်သမ္မတရွေးကောက်ပွဲမှာ ဆက်လက်ပါဝင်ယှဉ်ပြိုင်သွားမှာဖြစ်ပါတယ်။"လို့ ပြောပါတယ်။ 

ရုရှားပြည်သူ့ရေးရာထင်မြင်ချက်ကောက်ခံရေးအဖွဲ့ဖောင်ဒေးရှင်း (FOM) က ရုရှားနိုင်ငံ သား အများစုဟာ ပူတင်ကို သမ္မတအဖြစ်တစ်ကျော့ပြန် ပြန်လည်တာဝန်ထမ်းဆောင်စေလိုကြောင်း ဖော်ပြထားပါတယ်။ FOM အဖွဲ့က ရုရှားနိုင်ငံသား ၇၀ ရာခိုင်နှုန်းဟာ ပူတင်ကို သမ္မတအဖြစ် ဆက်လက်တာဝန်ယူဖို့ လိုလားနေကြောင်း ပြောပါတယ်။ ဒါပေမယ့် ရုရှားသမ္မတပူတင်ကို သမ္မတရာထူးကနေ နုတ်ထွက်စေလိုသူများရှိနေပြီး စစ်တမ်းဖြေဆိုသူ ၁၅ ရာခိုင်နှုန်းက ပူတင်ကို သမ္မတရာထူးက နုတ်ထွက်ကာ အစိုးရအဖွဲ့အတွင်းအဆင့်မြင့်ရာထူးတစ်ခု ရယူစေလိုကြောင်း ဆိုပါတယ်။ 

အခြား ရုရှားနိုင်ငံသား ၈ ရာခိုင်နှုန်းကတော့ သမ္မတပူတင်ကို နိုင်ငံရေးလောကကနေ အနားယူသင့်တယ်လို့ ထင်မြင်ချက်ပေးထားတယ်လို့ သိရပါတယ်။ ရုရှားသမ္မပူတင်ဟာ လာမယ့် သမ္မတရွေးကောက်ပွဲမှာ ကွန်မြူနစ်ပါတီ ခေါင်းဆောင်အဖြစ် နှစ်ပေါင်းများစွာကြာတာဝန်ယူခဲ့သူ Gennady Zyuganov နဲ့ အဓိကထားယှဉ်ပြိုင်ရဖွယ်ရှိနေကြောင်းသိရပါတယ်။