ကိုးကန့်ရှိ BP(၁၂၅)စစ်ဘေးရှောင်စခန်း၌ သောက်သုံးရေအခက်အခဲဖြစ်ပေါ်နေ
ကျော် (NSS) - ဒီဇင်ဘာ ၇
ရှမ်းပြည်နယ်၊ ကိုးကန့်ကိုယ်ပိုင်အုပ်ချုပ်ခွင့်ရဒေသရှိ BP(၁၂၅)စစ်ဘေးရှောင်စခန်းရှိ စစ်ဘေးရှောင်များအတွက် သောက်သုံးရေအခက်အခဲဖြစ်ပေါ်နေကြောင်း ကူညီပေးနေသူများထံမှ သိရသည်။
ရှမ်းပြည်နယ်(မြောက်ပိုင်း)၌ အောက်တိုဘာလ ၂၇ ရက်မှစတင်ဖြစ်ပွားခဲ့သည့် တိုက်ပွဲများကြောင့် ကိုးကန့်ကိုယ်ပိုင်အုပ်ချုပ်ခွင့်ရဒေသရှိ BP(၁၂၅) စစ်ဘေးရှောင်စခန်း၌ စစ်ဘေးရှောင်ဦးရေ ၃၀၀၀၀ ကျော်ခိုလှုံနေကြကြောင်း သိရသည်။
"တိုက်ပွဲတွေဖြစ်နေတာက တစ်လကျော်ကြာနေပြီ။ အဲဒီတော့ BP (၁၂၅) စစ်ဘေးရှောင်စခန်းမှာရောက်နေတဲ့ စစ်ဘေးရှောင်အရေအတွက်က ၃၀၀၀၀ ကျော်လောက်ရှိတယ်။ ဒီရက်ပိုင်း ရာသီဥတုကအရမ်းအေးလာတော့ သူတို့အတွက် အမိုး/အကာ/အခင်းနဲ့အနွေးထည်တွေ စောင်တွေလည်းလိုလာပြီ။ စစ်ဘေးရှောင်အနေနဲ့စပြေးလာကြပြီဆိုထဲက တစ်ချို့တွေဆိုရင် အဝတ်တစ်ထည် ကိုယ်တစ်ခုနဲ့ပြေးလာကြရတာ"ဟု စစ်ဘေးရှောင်များအား ကူညီပေးနေသူတစ်ဦးက ပြောသည်။
လက်ရှိအချိန်၌ အခက်အခဲဖြစ်နေသည်မှာ သောက်သုံးရေဖြစ်ပြီး နေ့လည်ပိုင်းတွင် စစ်ဘေးရှောင်များသည် သောက်သုံးရေရရှိရန်အတွက် ရေပိုက်ခေါင်းဆင်ပေးထားသည့်နေရာတွင် တန်းစီစောင့်ဆိုင်းသူများပြားသဖြင့် အချို့ စစ်ဘေးရှောင်များသည် ညပိုင်းလူနည်းချိန်တွင် သောက်သုံးရေသယ်ယူနေရခြင်းများရှိနေကြောင်း သိရသည်။
"စစ်ဘေးရှောင်တွေသောက်သုံးရေအဆင်ပြေဖို့ ရေပိုက်ခေါင်းတွေတပ်ထားပေးတယ်။ လူအရေအတွက်နဲ့ရေဖြန့်ဝေပေးနိုင်မှုမလောက်တော့ အခက်အခဲဖြစ်နေကြတာပါ။ သောက်သုံးရေကမရှိဘူးမဟုတ်ဘူးရှိတယ်။ မလောက်ငတာပါ"ဟု စစ်ဘေးရှောင်များအား ကူညီပေးနေသူတစ်ဦးကပြောသည်။
ထိုသို့ သောက်သုံးရေအခက်အခဲဖြစ်ပေါ်နေမှုအား ကိုးကန့်ကိုယ်ပိုင်အုပ်ချုပ်ခွင့်ရဒေသတာဝန်ရှိသူများက ကူညီဖြေရှင်းပေးရန်လည်း စစ်ဘေးရှောင်များမှ မျှော်လင့်လျက်ရှိကြောင်း သိရသည်။
"ကိုးကန့်ကိုယ်ပိုင်အုပ်ချုပ်ခွင့်ရဒေသရဲ့ တာဝန်ရှိသူတွေကိုလည်း ဒီကိစ္စကိုသတင်းပို့ထားတယ်။ သူတို့ဘက်ကတော့ အတတ်နိုင်ဆုံးဖြေရှင်းပေးမယ်လို့တော့ပြောတယ်။ ကျွန်တော်တို့ဘက်ကလည်း လိုအပ်တာတွေကိုနိုင်သလောက်ကူညီပေးနေပါတယ်"ဟု စစ်ဘေးရှောင်များအား ကူညီပေးနေသူတစ်ဦးကပြောသည်။
ထို့ပြင် BP(၁၂၅)စစ်ဘေးရှောင်စခန်း၌ ရောက်ရှိနေသည့်စစ်ဘေးရှောင်များကို ကူညီပေးနေသော လူမှုကူညီရေးအသင်းဝင်များနှင့်တာဝန်ရှိသူများမှလည်း အလှူရှင်များလာရောက်လှူဒါန်းထားသည့် အခြေခံစားသောက်ကုန်များနှင့်အဝတ်အထည်များကို အမှန်တကယ်လိုအပ်သည့် စစ်ဘေးရှောင်များထံ ဖြန့်ခွဲလှူဒါန်းပေးလျက်ရှိကြောင်း သိရသည်။
ကိုးကန့်ကိုယ်ပိုင်အုပ်ချုပ်ခွင့်ရဒေသဦးစီးအဖွဲ့၏ ဌာနဆိုင်ရာလုပ်ငန်းညှိနှိုင်းအစည်းအဝေးကို ဒီဇင်ဘာလ ၄ ရက်ကကျင်းပခဲ့ရာတွင်လည်း စားနပ်ရိက္ခာပြတ်လပ်မှုအခက်အခဲများအား ညှိနှိုင်းဆောင်ရွက်ရန် စီမံချက်များချမှတ်ခဲ့ကြကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ယူကရိန်းနိုင်ငံ အရှေ့ပိုင်းတွင် ရုရှားလိုလားသော နိုင်ငံရေးသမားတစ်ဦး ကားဗုံးခွဲတိုက်ခိုက်ခံရပြီး သေဆုံးခဲ့ဟုဆို
RELATED POSTS
21 Sep 2024 | အထွေထွေ,ပြည်တွင်း
21 Sep 2024 | အထွေထွေ,နိုင်ငံတကာ
20 Sep 2024 | အထွေထွေ,ပြည်တွင်း
19 Sep 2024 | အထွေထွေ,ပြည်တွင်း