မြဝတီမြို့မရဲစခန်းဝင်းအတွင်းသို့ Drop Bomb ကျရောက်ပေါက်ကွဲမှု ထပ်မံဖြစ်ပွား
ကျော် (NSS) - ဒီဇင်ဘာ ၇
ကရင်ပြည်နယ်၊ မြဝတီမြို့ရှိ မြဝတီမြို့မရဲစခန်းအတွင်းသို့ Drop Bomb ကျရောက်ပေါက်ကွဲမှု ထပ်မံဖြစ်ပွားခဲ့ကြောင်း လုံခြုံရေးအဖွဲ့နှင့်နီးစပ်သူများထံမှ သိရသည်။
ယမန်နေ့ (ဒီဇင်ဘာလ ၆ ရက်)၊ ည ၆ နာရီခန့်က လက်နက်ကိုင်အဖွဲ့ဝင်များသည် Drone ယာဥ်အသုံးပြု၍ မြဝတီမြို့ရှိ မြဝတီမြို့မရဲစခန်းအတွင်းသို့ Drop Bomb များဖြင့်ပစ်ချတိုက်ခိုက်ခဲ့ကြကြောင်း သိရသည်။
"Drop Bomb ၃ လုံးနဲ့ပစ်ချတိုက်ခိုက်တာလို့ သိထားတယ်။ ရဲစခန်းဝင်းထဲမှာ ၂ လုံးပေါက်ကွဲတယ်။ နောက်တစ်လုံးက စခန်းဝင်းထဲမှာပေါက်ကွဲတာမဟုတ်ပါဘူး အပြင်ဘက်မှာပါ။ လူထိခိုက်ဒဏ်ရာရတာနဲ့သေဆုံးတာမရှိပါဘူး"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။
Drop Bomb ကျရောက်ပေါက်ကွဲမှုများဖြစ်ပွားခဲ့ပြီးနောက် ပစ်ခတ်မှုအချို့ရှိခဲ့ပြီး မြဝတီမြို့တစ်မြို့လုံးအား လျှပ်စစ်မီးများဖြတ်တောက်ခဲ့ကြောင်း သိရသည်။
"အခု Drop Bomb ပေါက်ကွဲမှုဖြစ်စဥ်က ဒုတိယအကြိမ်ပါ။ စက်တင်ဘာလက ပထမအကြိမ် ပေါက်ကွဲမှုဖြစ်ခဲ့သေးတယ်။ လက်ရှိဖြစ်စဥ်ကို လိုအပ်တဲ့စုံစမ်းစစ်ဆေးတာတွေလုပ်နေတာတွေ့တယ်။ လျှပ်စစ်မီးကတော့ ပေါက်ကွဲတာတွေဖြစ်ပြီးတဲ့အချိန်ကတည်းကဖြတ်လိုက်တာ"ဟု လုံခြုံရေးအဖွဲ့နှင့်နီးစပ်သူတစ်ဦးက ပြောသည်။
ဖြစ်စဥ်မှ ပြစ်မှုကျူးလွန်သူများအား ဖမ်းဆီးရမိရေးအတွက် လုံခြုံရေးအဖွဲ့ဝင်များက စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။
မြဝတီမြို့မရဲစခန်းအား ပြီးခဲ့သည့် စက်တင်ဘာလ ၃ ရက်ကလည်း လက်နက်ကိုင်အဖွဲ့ဝင်များမှ Drone ယာဥ်အသုံးပြုကာ Drop Bomb ဖြင့်ပစ်ချတိုက်ခိုက်ခဲ့မှုကြောင့် တာဝန်ရှိသူများအပါအဝင် ၆ ဦးသေဆုံးကာ ၁၁ ဦးထိခိုက်ဒဏ်ရာများရရှိခဲ့ကြောင်း သိရသည်။
လက်ရှိအချိန်၌ မြဝတီမြို့၊ ဘုရင့်နောင်လမ်းမကြီးပေါ်ရှိ စုပေါင်းရုံးနေရာအား ညအချိန်တွင်ဖြတ်သန်းသွားလာခွင့်ပိတ်ထားပြီး နံနက်ပိုင်းမှညနေပိုင်းအထိသာ ဖြတ်သန်းခွင့်ပြုထားကြောင်း သိရသည်။
Comments :
0 comments
မကွေးတိုင်းဒေသကြီး၊ စလင်းမြို့နယ်၊ အုတ်ဖိုကန်ကျေးရွာ၊ မင်းဘူး- စလင်းကားလမ်းပေါ်တွင် သစ်ပင်လဲကျမှုဖြစ်ပွား
ထိုင်းနိုင်ငံသို့ရောက်ရှိလာသော နေရပ်စွန့်ခွာများကို ထိုင်းစစ်တပ်က မြန်မာဘက်ခြမ်းသို့ ပြန်ခိုင်းနေဟု HRW အဖွဲ့ပြော
RELATED POSTS
20 Sep 2024 | မှုခင်း,ပြည်တွင်း
18 Sep 2024 | မှုခင်း,ပြည်တွင်း