Pearl (NSS) - ဒီဇင်ဘာ ၆

သတင်းအချက်အလက် လုံခြုံရေးကဏ္ဍတွင် ပူးပေါင်းဆောင်ရွက်ရန် သဘောတူညီချက်ကို  မြန်မာနှင့်ရုရှားတို့ကြား လက်မှတ်ရေးထိုးခဲ့ကြောင်း နစက၏ သတင်းအချက်အလက်များအရ သိရသည်။ 

ယမန်နေ့ (ဒီဇင်ဘာလ ၅ ရက်)တွင် နေပြည်တော်၌  ပြည်ထဲရေးဝန်ကြီးဌာ န နှင့် ရုရှားနိုင်ငံ လုံခြုံရေးကောင်စီတို့ကြား တရားဥပဒေစိုးမိုးရေးနှင့် လုံခြုံ ရေးဆိုင်ရာ ပူးပေါင်းဆောင်ရွက်မှုဝန်ကြီးအဆင့်ဆွေးနွေးပွဲကို ကျင်းပခဲ့ကြောင်း သိရသည်။ 

ဆွေးနွေးပွဲတွင် နိုင်ငံတကာမျက်နှာစာ၌ နှစ်နိုင်ငံအပြန်အလှန်ဆက်ဆံရေးအခြေအနေ၊ စစ်ဘက်ဆိုင်ရာ ပူးပေါင်းဆောင်ရွက်ရေး၊ စစ်ဘက်နည်းပညာဆိုင်ရာ ပူးပေါင်းဆောင်ရွက်ရေး၊ နိုင်ငံတကာ သတင်းအချက်အလက်လုံခြုံရေး၊ တရားဥပဒေစိုးမိုးရေးဆိုင်ရာ အဖွဲ့အစည်းများအကြား ပူးပေါင်းဆောင်ရွက်ရေးကိစ္စရပ်များ၊ နှစ်နိုင်ငံကဏ္ဍစုံပူးပေါင်းဆောင်ရွက်ရေး နှင့် မဟာဗျူဟာမြောက် မိတ်ဖက်ဆက်ဆံရေးဆိုင်ရာများကို ညှိနှိုင်းဆွေးနွေးခဲ့ကြောင်း သိရသည်။ 

နှစ်နိုင်ငံဝန်ကြီးအဆင့် ဆွေးနွေးပွဲနှင့်တစ်ဆက်တည်းမှာပင် “ကုန်သွယ်ရေးနှင့် စီးပွားရေးပူးပေါင်းဆောင်ရွက်မှု” ဆိုင်ရာဆွေးနွေးပွဲ ၊ “စားနပ်ရိက္ခာလုံခြုံရေး”  ၊  “စွမ်းအင်ကဏ္ဍပူးပေါင်းဆောင်ရွက်ရေး” နှင့်  “ဘဏ္ဍာရေးဆိုင်ရာလုံခြုံရေး” ဆက်စပ်ဆွေးနွေးပွဲတို့ကိုကျင်းပခဲ့ပြီး  ကဏ္ဍအလိုက် နှစ်နိုင်ငံရှေ့ဆက် ပူးပေါင်းဆောင်ရွက်နိုင်မည့် ကိစ္စရပ်များကို ဆွေးနွေးခဲ့ကြောင်း သိရသည်။

ဆွေးနွေးပွဲအပြီးတွင် မြန်မာ-ရုရှား နှစ်နိုင်ငံပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာကို ပြည်ထဲရေးဝန်ကြီး ဒုတိယဗိုလ်ချုပ်ကြီးရာပြည့်နှင့် ရုရှားနိုင်ငံ လုံခြုံရေးကောင်စီအတွင်းရေးမှူး မစ္စတာ နီကိုလိုင်းပတ်ထရူးရှက်ဖ်တို့က လက်မှတ်ရေးထိုးခဲ့ကြောင်း သိရသည်။

ထို့နောက်  မြန်မာ နှင့် ရုရှား အစိုးရတို့ကြား အပြည်ပြည်ဆိုင်ရာသတင်းအချက်အလက် လုံခြုံရေးကဏ္ဍတွင် ပူးပေါင်းဆောင်ရွက်ရေးဆိုင်ရာ သဘောတူညီချက်ကို  ပို့ဆောင်ရေးနှင့်ဆက်သွယ်ရေးဝန်ကြီး  ဗိုလ်ချုပ်ကြီးမြထွန်းဦးနှင့် ရုရှားနိုင်ငံ လုံခြုံရေးကောင်စီအတွင်းရေးမှူး မစ္စတာနီကိုလိုင်းပတ်ထရူးရှက်ဖ်တို့က လက်မှတ်ရေးထိုးခဲ့ကြောင်း သိရသည်။