NSS - ဒီဇင်ဘာ ၆

ပြည်တွင်းရှိ စက်သုံးဆီအရောင်းဆိုင်များသို့ ဆီဖြန့်ဝေပေးရန် ဆီတင်သင်္ဘော(၈)စီးထက်မနည်း အဆင်သင့်ရောက်ရှိနေကြောင်း သိရသည်။

လက်ရှိတွင် ရန်ကုန်မြို့အပါအဝင် အခြားသောမြို့များရှိ စက်သုံးဆီအရောင်းဆိုင်များ၌ ကားအများအပြားသည် တန်းစီစောင့်ဆိုင်းကာ စက်သုံးဆီဝယ်ယူနေရသည့်အခြေအနေများ ဖြစ်ပေါ်လျက်ရှိသည်။

“လူကြီးတွေပြောနေသလိုပဲ ဆီသင်္ဘောတွေက တန်းစီနေတယ်ဆိုတာ မှန်တယ်။ ဆီသင်္ဘော (၈)စီး၊ (၁၀)စီးလောက် တန်းစီနေတယ်။ မြစ်ဝမှာပေါ့နော်။ ဒါပေမယ့် ဘာဖြစ်လို့ ဝင်မလာနိုင်လဲဆိုတော့ ပိုက်ဆံမရလို့ပေါ့။ အဓိကတော့ ကျပ်ငွေကိုတော့ ပိုက်ထားတယ်။ ဒါပေမယ့် ဒေါ်လာက ရှာလို့မရတဲ့ အခြေအနေဖြစ်နေတာပေါ့”ဟု စက်သုံးဆီလုပ်ငန်းရှင်တစ်ဦးက NSS ကို ပြောသည်။

ထို့ပြင် ရန်ကုန်မြို့၊ သီလဝါဆိပ်ကမ်းရှိ စက်သုံးဆီသိုလှောင်ကန်များ၌ လာရောက်တန်းစီစောင့်ဆိုင်နေသည့် ဆီဘောက်ဆာကားများသည်လည်း အများအပြားရှိနေကြောင်း သိရသည်။

“သင်္ဘောတွေက ရှိပေမယ့် ကန်တွေထဲကို ဆီမရောက်တဲ့အခါ ကန်တွေက စိတ်ကြိုက် ခွဲတမ်းချမပေးနိုင်ဘူးလေ။ ခွဲတမ်းချပေးတာက စက်သုံးဆီကော်မတီကနေ လုပ်ပေးနေတာ။ ကော်မတီက ခွဲတမ်းချပေးတဲ့နေရာမှာ ကန်ထဲမှာ ဆီဘယ်လောက်ရှိလဲဆိုတာကို ချိန်ပြီးတော့ ချရတာဖြစ်တဲ့အတွက် ဆီလက်ကျန်နည်းတော့ ခွဲတမ်းချရတဲ့နေရာမှာ နည်းနည်းကသိကအောက်ဖြစ်တယ်” ဟု စက်သုံးဆီလုပ်ငန်းရှင်က ပြောသည်။

စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီဥက္ကဋ္ဌ စွမ်းအင်ဒုဝန်ကြီးဦးသန့်စင်သည် လက်ရှိတွင် သီလဝါဆိပ်ကမ်းရှိ ဆီဘောက်စာကန်များရှိရာသို့ ရောက်ရှိနေကာ ကြီးကြပ်ဆောင်ရွက်နေကြောင်း သိရသည်။

လက်ရှိအနေအခြေတွင် ရန်ကုန်မြို့၌ စက်သုံးဆီပြတ်လပ်မှုမရှိဘဲ ဆီလက်ကျန်နည်းနေသည့်အတွက် စက်သုံးဆီဆိုင်များက အကန့်အသတ်ဖြင့် ရောင်းချပေးလျက်ရှိပြီး ဆီတင်သင်္ဘောများသည်လည်း အဆင်သင့်ရောက်ရှိနေပြီဖြစ်ကြောင်း သိ ရသည်။

“ဆီသိုလှောင်ကန်ထဲမှာ ဆီလက်ကျန်နည်းနေတာ မှန်တယ်။ ဘာဖြစ်လို့လဲဆိုတော့ ဆီသင်္ဘောတွေ ရောက်နေပေမယ့် ကန်ထဲကို ဆီထည့်ဖို့ ပိုက်ဆံက အပြည့်မချေနိုင်သေးဘူးဖြစ်နေတယ်။ အဲဒါကြောင့် ရှိတဲ့ဆီနဲ့ပဲ ရောင်းပေးနေတာ ဖြစ်တယ်။ အဲဒါကိုလည်း ဖြေရှင်းဖို့ လုပ်နေပါပြီ။ အဓိကပြောချင်တာကတော့ စက်သုံးဆီနဲ့ပတ်သက်ရင် အလောတကြီးမလိုအပ်ရင် တန်းစီတိုးကြိတ်နေတာမျိုး မလုပ်ဖို့လိုပါတယ်။ လက်ကျန်နဲ့ သုံးလို့ရသေးရင်သုံးပါ။ စိုးရိမ်မှုလွန်ကဲဖို့ မလိုပါဘူး။ စိုးရိမ်မှုလွန်ကဲရင်နေ နောက် ဆက်တွဲအကျိုးဆက်က ပိုဆိုးလာနိုင်ပါတယ်”ဟု စက်သုံးဆီလုပ်ငန်းရှင်က အကြံ ပြုထားသည်။

ယနေ့(ဒီဇင်ဘာလ ၆ ရက်)တွင် ရန်ကုန်မြို့ရှိ စက်သုံးဆီအရောင်းဆိုင်များ၌ 92 တစ်လီတာလျှင် (၂၅၁၀) ကျပ်၊ 95 တစ်လီတာလျှင် (၂၆၄၀)ကျပ်၊ ဒီဇယ်တစ်လီတာလျှင် (၂၂၁၀)ကျပ် နှင့် ပရီမီယံဒီဇယ်တစ်လီတာလျှင် (၂၃၀၅) ကျပ်ဖြင့် ရောင်းချရန် ကော်မတီက သတ်မှတ်ပေးထားသည်။