Pika (NSS) - ဒီဇင်ဘာ ၅

ကမ္ဘာတစ်ဝန်းတွင် အကျပ်အတည်းများ ဆက်လက်ဖြစ်ပွားနေမှုနှင့်အတူ ရွှေဈေးနှုန်းသည် ဒီဇင်ဘာလ(၄)ရက် တွင် အမြင့်ဆုံးသို့ရောက်ရှိသွားခဲ့ပြီး ရွှေတစ်အောင်စလျှင်  အမေရိကန်ဒေါ်လာ(၂၁ဝဝ)ကျော်ထိ မြင့်တက်လာခဲ့ ကြောင်း သိရသည်။

ရွှေဈေးနှုန်းသည် အစောပိုင်းတွင် တစ်အောင်စလျှင် အမေရိကန်ဒေါ်လာ(၂ဝ၉ဝ)နှုန်းဖြင့် အရောင်းအဝယ်လုပ်နေ သော်လည်း လက်ရှိအချိန်တွင် တစ်အောင်စလျှင် အမေရိကန်ဒေါ်လာ(၂၁၁ဝ)ထိ စံချိန်တင်မြင့်တက်လာခဲ့ကြောင်း သိရသည်။ ကမ္ဘာလုံးဆိုင်ရာ မသေချာမရေရာမှုများ၊ ပထဝီဝင်နိုင်ငံရေးတင်းမာမှုများ၊ စီးပွားရေးကျဆင်းမှုနှင့် ပတ်သက်သည့်စိုးရိမ်မှုများ၊ US Federal Reserveမှ အတိုးနှုန်းဖြတ်တောက်မှုတို့နှင့် ပတ်သက်သည့် မျှော်လင့်ချက် တို့ကြောင့် ကမ္ဘာရွှေဈေးနှုန်းမြင့်တက်လာမှုများ နှစ်လဆက်တိုက်ဖြစ်ပွားခဲ့ခြင်းဖြစ်ကြောင်း သိရသည်။

UOB ၏ စျေးကွက်မဟာဗျူဟာ၊ ကမ္ဘာလုံးဆိုင်ရာစီးပွားရေးနှင့် စျေးကွက်ရှာဖွေရေးအကြီးအကဲ Heng Koon How က "၂ဝ၂၄ ခုနှစ်အတွင်းမှာ အမေရိကန်ဒေါ်လာနဲ့ အတိုးနှုန်းတွေအတွက် ခန့်မှန်းထားတဲ့ လျော့ကျလာမှုတွေဟာ ရွှေဈေးအတွက် အဓိကအပြုသဘောဆောင်တဲ့ တွန်းအားတွေဖြစ်ပါတယ်။ ကမ္ဘာ့ရွှေဈေးနှုန်းဟာ ၂ဝ၂၄ ခုနှစ်ကုန်မှာ အမေရိကန်ဒေါ်လာ(၂၂ဝဝ) ထိ မြင့်တက်လာနိုင်ပါတယ်" ဟု ခန့်မှန်းပြောခဲ့သည်။ 

ကမ္ဘာ့ရွှေကောင်စီက၏ မကြာသေးမီက ပြုလုပ်ခဲ့သော စစ်တမ်းတစ်ခုအရ လာမည့်(၁၂)လအတွင်း ဗဟိုဘဏ်များ အားလုံး၏ (၂ဝ)ရာခိုင်နှုန်းကျော်သည် ၎င်းတို့၏ အရန်ရွှေပိုင်ဆိုင်မှုများကို ပိုမိုမြှင့်တင်ရန် ရည်ရွယ်ထားကြောင်း သိရသည်။ 

ထို့အပြင် ဗဟိုဘဏ်များအားလုံး၏ (၂ဝ)ရာခိုင်နှုန်းကျော်သည် အမေရိကန်ဒေါ်လာကို အရန်ပိုင်ဆိုင်မှုအဖြစ် သတ်မှတ်ခြင်းအပေါ်မကောင်းမြင်မှုများ ပိုမိုတိုးလာခဲ့ကြောင်းလည်း သိရသည်။