Pika (NSS) - ဒီဇင်ဘာ ၄

တရုတ်နိုင်ငံသည် ဘီလာရုစ်နိုင်ငံနှင့် ၎င်း၏ မဟာဗျူဟာမြောက် ပူးပေါင်းဆောင်ရွက်မှုများကို ပိုမိုခိုင်မာလာစေအောင်လုပ်ဆောင်ရန်အတွက် ဆန္ဒရှိကြောင်း တရုတ်သမ္မတရှီကျင့်ဖျင်က ထုတ်ဖော်ပြောကြားခဲ့သည်။

ရှီကျင့်ဖျင်သည် ဒီဇင်ဘာလ(၄)ရက်တွင် ဘီလာရုစ်သမ္မတလူကာရှန်ကိုနှင့် တွေ့ဆုံခဲ့ပြီးနောက် ယခုကဲ့သို့ ထုတ်ဖော်ပြောဆိုခဲ့ခြင်းဖြစ်သည်။ တရုတ်နိုင်ငံသည် ကုလသမဂ္ဂနှင့် ရှန်ဟိုင်းပူးပေါင်းဆောင်ရွက်ရေးအဖွဲ့တို့ ကဲ့သို့သော နိုင်ငံပေါင်းစုံပါဝင်သည့် အဖွဲ့အစည်းများတွင် ဘီလာရုစ်နိုင်ငံနှင့် ညှိနှိုင်းပူးပေါင်းဆောင်ရွက်မှုများကို ပိုမိုတိုးမြှင့်လုပ်ဆောင်ရန် ဆန္ဒရှိကြောင်း ရှီကျင့်ဖျင်က ထပ်မံပြောခဲ့သည်။

ထို့အပြင် နှစ်နိုင်ငံစလုံးသည် နယ်စပ်ဖြတ်ကျော် သယ်ယူပို့ဆောင်ရေးလုပ်ငန်းများ အဆင်ပြေချောမွေ့လွယ်ကူစေရေး၊ စီးပွားရေးနှင့်ကုန်သွယ်ရေး ဆက်ဆံရေးများကို ပိုမိုမြှင့်တင်ရန်အတွက် လုပ်ဆောင်သင့်သည်ဟု တရုတ် သမ္မတရှီကျင့်ဖျင်က ဘီလာရုစ်သမ္မတလူကာရှန်ကို ကို ပြောဆိုခဲ့ကြောင်း သိရသည်။

တရုတ်နှင့် ဘီလာရုစ်နှစ်နိုင်ငံ စလုံးသည် တရုတ်-ဘီလာရုစ်စက်မှုဇုန်ကဲ့သို့သောစီမံကိန်းများကို အကောင်အထည် ဖော်သင့်ပြီး စက်မှုလုပ်ငန်းနှင့်ပတ်သက်သည့် ပူးပေါင်းဆောင်ရွက်မှုများကို ပိုမိုတိုးမြှင့်လုပ်ဆောင်သင့်ကြောင်း ရှီကျင့်ဖျင်က ထပ်မံပြောခဲ့သည်။

လူကာရှန်ကို က "ဘီလာရုစ်နိုင်ငံဟာ တရုတ်နိုင်ငံအတွက် ယုံကြည်စိတ်ချရတဲ့ မိတ်ဖက်နိုင်ငံဖြစ်လာပါလိမ့်မယ်။ ကျွန်တော်တို့နှစ်နိုင်ငံကြား ပူးပေါင်းဆောင်ရွက်မှုတွေလုပ်ဆောင်ပြီး တရုတ်နိုင်ငံနဲ့ မိတ်ဆွေဖြစ်ဖို့ အရင်တည်းက ဆုံးဖြတ်ခဲ့တာပါ။ ကျွန်တော်တို့ကြားက ခင်မင်မှုဟာ နှစ်ပေါင်း(၃ဝ)ကျော်ကြာပြီဖြစ်ပြီး ဒီလမ်းကြောင်းကနေ ဘယ်တော့မှ သွေဖယ်သွားတာမျိုးမရှိခဲ့ပါဘူး" ဟု ပြောခဲ့သည်။

ရှီကျင့်ဖျင် က "ဘီလာရုစ်နိုင်ငံရဲ့အခြေအနေတွေနဲ့အညီ ဖွံ့ဖြိုးတိုးတက်ရေးလမ်းကြောင်းကို လျှောက်လှမ်းရာမှာ တရုတ်နိုင်ငံဟာ ဘီလာရုစ်နိုင်ငံကို အပြည့်အဝထောက်ခံပါတယ်။ပြီးတော့ ဘီလာရုစ်နိုင်ငံ ပြည်တွင်းရေးကို ပြည်ပ အင်အားစုတွေက ဝင်ရောက်စွက်ဖက်တာမျိုးကို တရုတ်နိုင်ငံက ဆန့်ကျင်ပါတယ်။ တရုတ်နိုင်ငံဟာ ဘီလာရုစ် နိုင်ငံနဲ့ မဟာဗျူဟာမြောက်ပူးပေါင်းဆောင်ရွက်မှုတွေကို ပိုမိုခိုင်မာလာအောင် လုပ်ဆောင်ဖို့၊ အချင်းချင်း အခိုင်အမာထောက်ခံအားပေးဖို့နဲ့ လက်တွေ့ကျတဲ့ ပူးပေါင်းဆောင်ရွက်မှုတွေကို ပိုမိုမြှင့်တင်ဖို့ ဆန္ဒရှိပါတယ်" ဟု ပြောခဲ့သည်။