Pika (NSS) - ဒီဇင်ဘာ ၄

ယူကရိန်းစစ်တပ်သည် ပြီးခဲ့သည့်လများအတွင်း စစ်မြေပြင်တွင် အောင်မြင်မှုများမရရှိခဲ့သော်လည်း အနောက်အုပ်စုနိုင်ငံများသည် ယူကရိန်းနိုင်ငံအတွက် ရပ်တည်ပေးသင့်ကြောင်း နေတိုးအဖွဲ့အကြီးအကဲ ဂျန်စတိုလ်တန်ဘာ့ချ်က ပြောကြားခဲ့သည်။

ထို့အပြင် နေတိုးအဖွဲ့သည် ယူကရိန်းလိုအပ်သော ခဲယမ်းမီးကျည်များကို ထောက်ပံ့ပေးရန်အတွက် ကာကွယ်ရေး စက်မှုလုပ်ငန်းများ တည်ထောင်ပေးရန် ပျက်ကွက်ခဲ့ကြောင်း ဂျန်စတိုလ်တန်ဘာ့ချ်က ပြောခဲ့သည်။ ရုရှားသည် လာမည့်ဆောင်းရာသီတွင် ယူကရိန်းကို တိုက်ခိုက်ရန်အတွက် ဒုံးကျည်များ စုဆောင်းသိုလှောင်နေကြောင်း ယခု သီတင်းပတ်အစောပိုင်းတွင် ဂျန်စတိုလ်တန်ဘာ့ချ်က သတိပေးပြောဆိုခဲ့သည်။

ထို့အပြင် ယူကရိန်းရှေ့တန်းစစ်မြေမျက်နှာပြင်တွင် ပြောင်းလဲမှုများမရှိသေးကြောင်း ဂျန်စတိုလ်တန်ဘာ့ချ်က အသိအမှတ်ပြုပြောဆိုခဲ့ပြီး စစ်ပွဲများသည် အစီအစဉ်ဆွဲရန် ခက်ခဲကြောင်း ထပ်မံပြောဆိုခဲ့သည်။ 

ဂျန်စတိုလ်တန်ဘာ့ချ် က "သတင်းဆိုးတွေအတွက် ကျွန်တော်တို့ ပြင်ဆင်ထားသင့်ပါတယ်။ စစ်ပွဲက ဆက်လက် ဖြစ်ပွားနေပြီး ကျွန်တော်တို့ဟာ ကောင်းတဲ့အချိန်ဖြစ်ဖြစ် ဆိုးတဲ့အချိန်ဖြစ်ဖြစ် ယူကရိန်းနဲ့အတူ ရပ်တည်သင့်ပါတယ်။ ပြီးတော့ ခဲယမ်းမီးကျည်ထုတ်လုပ်မှုကိုမြှင့်တင်ခြင်းဟာ စစ်ပွဲအဆုံးအဖြတ်အတွက် အလွန်အရေးကြီးပါ တယ်" ဟု ပြောခဲ့သည်။

ထို့အပြင် ရုရှားသည် လာမည့်ဆောင်းရာသီတွင် ယူကရိန်း၏ ဓါတ်အားလိုင်းများနှင့် စွမ်းအင်အခြေခံအဆောက် အဦးများအပေါ် တိုက်ခိုက်ရန် ကြိုးပမ်းမှုအသစ်များကို မြင်တွေ့ရနိုင်ဖွယ်ရှိကြောင်း ဂျန်စတိုလ်တန်ဘာ့ချ်က နိုဝင်ဘာလ(၂၉)ရက်တွင် ဘရပ်ဆဲလ်မြို့မှာ ကျင်းပခဲ့သည့် နေတိုးအဖွဲ့နိုင်ငံခြားရေးဝန်ကြီးများ အစည်းအဝေး အပြီးတွင် ထုတ်ဖော်ပြောကြားခဲ့သည်။

ဂျန်စတိုလ်တန်ဘာ့ချ်က "ကျွန်တော်တို့ ရုရှားကို အထင်မသေးသင့်ပါဘူး။ ရုရှားရဲ့ကာကွယ်ရေးလုပ်ငန်းတွေဟာ အနေအထားတစ်ခုမှာ ရှိနေတာဖြစ်ပြီး သူတို့ရဲ့တပ်ဖွဲ့တွေကို ခဲယမ်းမီးကျည်တွေ၊ စွမ်းရည်အသစ်တွေနဲ့ ပြန်လည် ဖြည့်တင်းမှုတွေ လုပ်ပေးနိုင်ပါတယ်" ဟု ပြောဆိုခဲ့သည်။

ထို့အပြင် တန်ပြန်ထိုးစစ်ဆင်မှုများ စတင်လုပ်ဆောင်ခဲ့သည့် ပြီးခဲ့သည့်ဇွန်လတည်းက ဒီဇင်ဘာလ(၁)ရက်အထိ ယူကရိန်းသည် တပ်ဖွဲ့ဝင်(၁၂၅ဝဝဝ)ကျော် ဆုံးရှုံးခဲ့ရကြောင်း ရုရှားကာကွယ်ရေးဝန်ကြီးဌာန၏ နောက်ဆုံး ခန့်မှန်းချက်များအရ သိရသည်။