Pika (NSS) - နိုဝင်ဘာ ၂၈ 

ဒေသတွင်းတွင် ကြီးထွားလာသော တရုတ်၏ ဩဇာလွှမ်းမိုးမှုများကို ရင်ဆိုင်ရန်အတွက် ဂျပန်နှင့် ဗီယက်နမ် နိုင်ငံတို့သည် ၎င်းတို့၏ လုံခြုံရေး နှင့် စီးပွားရေးဆက်ဆံမှုများကို ပိုမိုမြှင့်တင်ရန်အတွက် နိုဝင်ဘာလ (၂၇) ရက်တွင် သဘောတူညီခဲ့ကြကြောင်း သိရသည်။

ဂျပန်ဝန်ကြီးချုပ်ဖူမီအိုကီရှီဒါ နှင့် ဗီယက်နမ်သမ္မတ Vo Van Thuong တို့သည် တိုကျိုမြို့တွင် တွေ့ဆုံခဲ့ကြပြီး နှစ်နိုင်ငံကြား လုံခြုံရေးဆိုင်ရာပူးပေါင်းဆောင်ရွက်မှုများကို ပိုမိုချဲ့ထွင်ရန်၊ ကာကွယ်ရေးပစ္စည်းကိရိယာများ နှင့် နည်းပညာလွှဲပြောင်းပေးမှုများလုပ်ဆောင်ရန် နှင့် ဒေသတွင်းရှိ ဖွံ့ဖြိုးဆဲနိုင်ငံများ၏ စစ်တပ်တို့အတွက် ဂျပန်နိုင်ငံ ၏ အကူအညီ အစီအစဉ်သစ်တို့ကို ဆွေးနွေးရန် သဘောတူညီခဲ့ကြကြောင်း သိရသည်။

ဂျပန် နှင့် ဗီယက်နမ်နိုင်ငံတို့၏ ဆက်ဆံရေးသည် မဟာဗျူဟာမြောက်မိတ်ဖက်ဆက်ဆံရေးတစ်ခု ဖြစ်လာမည် ဖြစ်ပြီး နှစ်နိုင်ငံကြား ပူးပေါင်းဆောင်ရွက်မှုများသည် အဆင့်အတန်းတစ်ခုဆီသို့ ရောက်ရှိသွားမည်ဖြစ်ကြောင်း ဂျပန်နိုင်ငံခြားရေးဝန်ကြီးဌာန၏ ပူးတွဲထုတ်ပြန်ချက်တွင် ဖော်ပြထားသည်။ 

ဂျပန်နိုင်ငံသည် တရုတ်နိုင်ငံ၏မြင့်တက်လာသော ဩဇာလွှမ်းမိုးမှုများကိုရင်ဆိုင်နေရပြီး ဒေသတွင်းတွင် လုံခြုံရေး နှင့် စီးပွားရေးအရ အရေးပါသောအရှေ့တောင်အာရှနိုင်ငံတစ်နိုင်ငံဖြစ်သည့် ဗီယက်နမ်နိုင်ငံနှင့် ပိုမိုနီးကပ်သော ဆက်ဆံရေးများရရှိအောင် ကြိုးပမ်းလျက်ရှိကြောင်း သိရသည်။ နိုဝင်ဘာလ(၂၇)ရက် ထုတ်ပြန်ကြေညာချက်အရ ဂျပန်နိုင်ငံသည် အမေရိကန်၊ တရုတ် နှင့် အိန္ဒိယနိုင်ငံတို့နှင့်အတူ ဗီယက်နမ်နိုင်ငံ၏ ထိပ်တန်းမိတ်ဖက်နိုင်ငံအဖြစ် ရပ်တည်နေပြီဆိုသည့်အချက်ကို ပြသနေကြောင်း သိရသည်။

ဂျပန်ဝန်ကြီးချုပ် ဖူမီအိုကီရှီဒါ က "ဗီယက်နမ်နိုင်ငံဟာ လွတ်လပ်ပွင်းလင်းတဲ့ အင်ဒို-ပစိဖိတ်ဒေသကို ရရှိဖို့ အတွက် အရေးကြီးတဲ့ အဓိကမိတ်ဖက်နိုင်ငံတစ်နိုင်ငံဖြစ်ပါတယ်။ နှစ်နိုင်ငံကြား မိတ်ဖက်ဆက်ဆံရေးဟာ ဒေသတွင်းမှာ လုံခြုံရေးနဲ့ သာယာဝပြောရေးတို့ကို အထောက်အကူဖြစ်စေတယ်လို့ ဗီယက်နမ်သမ္မတ Vo Van Thuong က ပြောခဲ့ပါတယ်" ဟု ပြောခဲ့သည်။

ပြီးခဲ့သည့်နှစ်များအတွင်း ဂျပန်နိုင်ငံသည် ပင်လယ်တွင်းတွင် ဗီယက်နမ်နိုင်ငံ၏ ကင်းလှည့်စွမ်းရည်များ ပိုမို ကောင်းမွန်လာစေရန်အတွက် ကင်းလှည့်သင်္ဘောများစွာကို ဗီယက်နမ်နိုင်ငံသို့ ကူညီပံ့ပိုးပေးခဲ့ဖူးကြောင်း သိရသည်။ ဗီယက်နမ်နိုင်ငံသည် အငြင်းပွားနေသော တောင်တရုတ်ပင်လယ်တွင် ၎င်းတို့၏ ပိုင်နက်အကျိုးစီးပွားကို ကာကွယ်နေသည့် နိုင်ငံများထဲမှ တစ်နိုင်ငံဖြစ်ကြောင်းသိရသည်။