Pika (NSS) - နိုဝင်ဘာ ၂၇ 

ထိုင်းနိုင်ငံတွင် နိုဝင်ဘာလ(၂၅)ရက်က ကျင်းပခဲ့သော မင်္ဂလာဆောင်ပွဲတစ်ခုတွင် သတို့သားက ၎င်း၏ သတို့သမီးဖြစ်သူ အပါအဝင် လူလေးဦးကို သေနတ်ဖြင့် ပစ်သတ်ခဲ့ကြောင်း သိရသည်။

အဆိုပါဖြစ်ရပ်သည် Nakhon Ratchasima ပြည်နယ် Wang Nam Khieo ခရိုင်ရှိ ရွာတစ်ရွာတွင် ဖြစ်ပွားခဲ့ခြင်း ဖြစ်ကြောင်း သိရသည်။ သတို့သားမှာ Chaturong Suksuk ဟု အမည်ရသူဖြစ်ကြောင်း Bangkok Post သတင်းဌာနက ဖော်ပြခဲ့သည်။

၎င်းသည် မသန်စွမ်းအားကစားပြိုင်ပွဲမှာ ရေကူးခြင်းနှင့် သေနတ်ပစ်ပြိုင်ပွဲများတွင် ထိုင်းကိုယ်စားပြု ဝင်ရောက် ယှဉ်ပြိုင်ခဲ့ဖူးသူဖြစ်ကြောင်း သိရသည်။ အသက်(၂၉)နှစ်အရွယ် Chaturong Suksuk သည် Kanchana Pachunthuek ဆိုသည့် အမျိုးသမီးနှင့် နိုဝင်ဘာလ(၂၅)ရက် နံနက်တွင် လက်ထပ်ခဲ့ခြင်းဖြစ်ကြောင်း သိရသည်။

၎င်းတို့နှစ်ဦးသည် လက်ထပ်ရန် မဆုံးဖြတ်မီ ချစ်သူစုံတွဲအဖြစ် သုံးနှစ်ကြာအောင် အတူနေထိုင်ခဲ့ခြင်းဖြစ်ကြောင်း သိရသည်။ နိုဝင်ဘာလ(၂၅)ရက် ညတွင် မင်္ဂလာပွဲကိုကျင်းပခဲ့ပြီး Chaturong Suksuk သည် ထင်မှတ်ထားသည့်အတိုင်း  ပျော်ရွှင်ခြင်းမျိုးမရှိခဲ့ကြောင်း မိသားစုဝင်များနှင့် ဧည့်သည်များက ပြောကြားခဲ့သည်။

ထို့နောက် ၎င်းသည် ပါတီမှ ခဏတာထွက်ခွာသွားခဲ့ပြီးနောက် (၉)မီလီမီတာပစ္စတိုနှင့်အတူ ပြန်လာခဲ့ခြင်းဖြစ် ကြောင်း မျက်မြင်သက်သေများက ပြောကြားခဲ့သည်။ Chaturong Suksuk သည် သတို့သမီးဖြစ်သူ Kanchana Pachunthuek၊ ၎င်း၏ မိခင်နှင့် ညီမဖြစ်သူတို့ကို သေနတ်ဖြင့် ပစ်သတ်ခဲ့ခြင်းဖြစ်ကြောင်း သိရသည်။

အဆိုပါပစ်ခတ်မှုအတွင်း ဧည်သည့်နှစ်ဦးလည်း သေနတ်ထိမှန်ခဲ့ပြီး ခရိုင်ဆေးရုံသို့ အလျင်အမြန် ပို့ဆောင်ခဲ့သော်လည်း တစ်ဦးမှာ ဆေးရုံတွင် သေဆုံးသွားခဲ့ကြောင်း သိရသည်။ အဆိုပါပစ်ခတ်မှုနှင့်ပတ်သက်ပြီး Chaturong Suksuk ကို မည်သည့်အရာက တွန်းအားပေးခဲ့သလဲဆိုသည့်အချက်ကို ရဲတပ်ဖွဲ့များက ဆက်လက်စုံစမ်းစစ်ဆေး နေဆဲဖြစ်ကြောင်း သိရသည်။

အစောပိုင်း စုံစမ်းစစ်ဆေးမှုများအရ ၎င်းတို့စုံတွဲသည် ပါတီချိန်အတွင်း စကားများမှုများရှိခဲ့ကြောင်း The Nation သတင်းစာက ဖော်ပြခဲ့သည်။ Chaturong Suksuk က ၎င်းသည် မသန်မစွမ်းဖြစ်နေသည့်အတွက် ၎င်း၏ ဇနီးဖြစ်သူက အခြားယောကျာ်းယူသွားမည်ကို စိုးရိမ်ကြောင်းပြောဆိုရာမှ စကားများအငြင်းပွားမှုများရှိခဲ့ကြောင်း မျက်မြင်သက်သေများက ပြောကြားခဲ့သည်။

ရိန်းဂျားဟောင်းဖြစ်ခဲ့ဖူးသော Chaturong Suksuk သည် တာဝန်ကျစဉ်အချိန်အတွင်း မတော်တဆမှုတစ်ခုကြောင့် ၎င်း၏ ညာဖက်ခြေထောက်ကို ဆုံးရှုံးခဲ့ကြောင်း သိရသည်။ Chaturong Suksuk သည် ၂ဝ၂၂ ခုနှစ်တွင် အင်ဒိုနီးရှား နိုင်ငံမှာ ကျင်းပခဲ့သော(၁၁)ကြိမ်မြောက် အာဆီယံမသန်စွမ်းအားကစားပြိုင်ပွဲတွင် ငွေတံဆိပ်တစ်ခုရ ရှိခဲ့ကြောင်း Khaosod သတင်းစာက ဖော်ပြခဲ့သည်။ 

ထိုင်းနိုင်ငံတွင် သေနတ်ကိုင်ဆောင်ခွင့် လိုင်စင်ထုတ်ပေးမှုကို တစ်နှစ် ရပ်ဆိုင်းရန် အမိန့်ကို ထိုင်းပြည်ထဲရေး ဝန်ကြီး Anutin Charnvirakul က လက်မှတ်ရေးထိုးပြီးနောက် ရက်ပိုင်းအကြာ နိုဝင်ဘာလ(၂၅)ရက်တွင် အဆိုပါဖြစ်ရပ်ဖြစ်ပွားခဲ့ခြင်းဖြစ်သည်။